▲ مۇراجايدىڭ عيماراتى اعاش ۇستالىعىنىڭ عاجايىپ ۇلگىسى ساناتىندا ءارى تاريح جانە ساۋلەت ەسكەرتكىشى رەتىندە مەملەكەت قورعاۋىنا الىنعان. بۇل عيمارات 1908 جىلى ۆەرنىي قالاسىنىڭ اتاقتى ارحيتەكتورى ا.زەنكوۆتىڭ جوباسى بويىنشا پۋشكين سكۆەرىنە سالىنعان. بۇگىندە ول الماتى قالاسىنىڭ تاريحي-مەموريالدى كەشەنى سانالاتىن 28 پانفيلوۆشىلار پاركىندە ورنالاسقان.
▲ ەڭ العاش قازاق حالىق مۋزىكا اسپاپتار مۋزەيى ءوز ەسىگىن كورەرمەندەرىنە 1980 جىلى ايقارا اشتى.
▲ وتىز جىلدان استام تاريحى بار قازاق حالىق مۋزىكا اسپاپتار مۋزەيى قازىرگى ۋاقىتتا قازاقستان رەسپۋبليكاسىندا تەڭدەسى جوق قازاق مۋزىكا مادەنيەتىنىڭ باعا جەتپەس قازىناسى، ماقتانىشى.
▲ مۋزەي پايدا بولعالى، كوپ جىلدار بويى كوپتەگەن ۇلتتىق مۋزكالىق اسپاپتار كوللەكتسياسى جيناقتالدى. بۇلار – ماڭىزدى بولىگى اتاقتى ورىنداۋشى-كومپوزيتورلاعا جاتاتىن، ءوزىنىڭ بىرەگەي تاريحى مەن ماعىناسى بار مىڭنان استام ەكسپوناتتار.
▲ كەلىپ كورۋشىلەرگە جەتى كورمەسورە زالدارى قىزمەت كورسەتەدى: ارحەولوگيا زالى، سوقپالى-شۋلى جانە ۇرلەمەلى اسپاپتار زالى، مەموريالدىق-مۋزىكالىق اسپاپتار زالى، دومبىرا مەن قوبىز زالى، الەم حالىقتارىنىڭ مۋزىكالىق اسپاپتارى زالى، ۋاقىتشا كورمەلەر مەن تانىستىرۋلار زالى جانە كاسىبي مۋزىكانتتاردىڭ ونەر كورسەتۋىنە ارنالعان كونتسەرتتىك زال.
▲ مۇراجايدا تاقىرىپتىق جانە جالپى شولۋ ەكسۋرسيالارى ءۇش تىلدە (قازاق، ورىس، اعىلشىن) جۇرگىزىلەدى جانە ەكسكۋرسيا جۇرگىزۋشىلەرى بالالار مەن ەرەسەكتەرگە قىزىقتى، اسەرلى جانە تارتىمدى قىلىپ تۇسىندىرەدى. سونىمەن قاتار كورەرمەندەر دىبىستىق-گيد قىزمەتىن دە پايدالانىپ، ال ەگەر اسپاپتار تۋرالى، كومپوزيتورلار حاقىندا، ورىنداۋشىلار جايىندا، شىعارمالار تۋراسىندا جان-جاقتى اقپارات الىپ، تەرەڭىرەك بىلگىسى كەلسە، اۋقىمدى دەرەككوزدەرى بار Media-Table قىزمەتىن پايدالانا الادى.
▲ مۇراجايدا قازىرگى قولونەر تۋىندىلارى مەن سىيبۇيىمداردى ساتاتىن دۇكەن دە بار. اسپاپتاردى جاساۋ جانە ولاردى تارتىپ ۇيرەنۋ شەبەرلىك ساباقتارى جۇرگىزىلەدى. مۋزىكالىق كافە دە سىزگە قىزمەت ەتۋگە ءازىر. مۋزەي كوللەكتسياسىندا قازاقستاننىڭ تۇپكىر-تۇپكىرىنەن كونە مۋزىكالىق اسپاپتار مەن اباي، جامبىل، ماحامبەت، امىرە قاشاۋباەۆ، دينا نۇرپەيسوۆا، نۇرعيسى تىلەنديەۆ سىندى ونەر مايتالماندارىنىڭ اسپاپتارى دا جيناقتالعان.
▲ جاراس باقسىنىڭ نارقوبىزى.
▲ كۇيشى، كومپوزيتور سۇگىر ءاليۇلىنىڭ دومبىراسى.
▲ قازاقتىڭ ۇلى اقىنى اباي قۇنانبايۇلىنىڭ دومبىراسى.
ء▲ «لايلىم شىراقتى» شىرقاعان ءبىرجان سالدىڭ دومبىراسى.
▲ كۇيشى دينا نۇرپەيىسوۆانىڭ دومبىراسى.
▲ جامبىل جاباەۆتىڭ دومبىراسى مەن جەكە زاتتارى.
▲ ورتەكە، دومبىرا اسپابىنىڭ سۇيەمەلدەۋىمەن ورىندالاتىن ويىن قۇرالى.
▲ جەتىگەن، ادىرنا، سازگەن، دۋدىعا، توقىلداق سياقتى كوپتەگەن مۋزىكا اسپاپتارى حالىق اۋزىنان جانە جازبا دەرەكتەردەن الىنىپ، حالىق شەبەرلەرىنىڭ ەتنوگرافيالىق سيپاتتاماسى بويىنشا جاڭعىرتىلعان.
اسقار بەكوۆ.
