مەملەكەت باسشىسى وقۋ كابينەتتەرىن ارالاپ كوردى جانە «قازاقستان-2050» ستراتەگياسىنا ارنالعان اشىق ساباققا كىردى. نۇرسۇلتان نازارباەۆ وقۋشىلارعا ەلدىڭ 2050 جىلعا دەيىنگى دامۋىنىڭ نەگىزگى باسىمدىقتارى تۋرالى اڭگىمەلەدى، سونداي-اق بولاشاق ماماندىق تاڭداۋعا قاتىستى كەڭەستەرىن ايتتى.

– ستراتەگيادا قازاقستاننىڭ الداعى دامۋىنىڭ باعىت-باعدارى جازىلعان. ءبىز دامىعان 30 مەملەكەتتىڭ قاتارىنا قوسىلعىمىز كەلەدى. سول ءۇشىن ءبىلىم بەرۋدى، دەنساۋلىق ساقتاۋدى، جاڭا تەحنولوگيالار مەن  يننوۆاتسيالاردى دامىتۋمەن اينالىسىپ، ينفراقۇرىلىمدار قالىپتاستىرۋدامىز. ءبىز الدىمىزعا قويىپ وتىرعان ەڭ باستى مىندەت – حالىق تۇرمىسىن جوعارى دەڭگەيگە كوتەرۋ. بۇل ستراتەگيا سىزدەردىڭ بۋىن ءۇشىن جاسالدى، ويتكەنى ونى سىزدەر جۇزەگە اسىرىپ، ناتيجەسىن كورەسىزدەر. دامۋعا ىلەسۋ ءۇشىن ماماندىقتى دۇرىس تاڭداۋ كەرەك. جاس كەزىڭدە بارىنە ۇلگەرگىڭ كەلەدى، بىراق وعان ۋاقىت جەتە بەرمەيدى. سوندىقتان ءبىر كاسىپكە توقتالىپ، بۇگە-شىگەسىنە دەيىن زەرتتەگەن ءجون، سوندا جەتىستىككە جەتەتىن بولاسىزدار. كەز كەلگەن ۇجىمدا كاسىپقوي مامانداردى قۇرمەتتەيدى جانە ءاردايىم ولاردىڭ ايتقانىن تىڭدايدى، – دەدى قازاقستان پرەزيدەنتى.

نۇرسۇلتان نازارباەۆ مەكتەپ مۇعالىمدەرىمەن دە اڭگىمەلەسىپ، ولاردىڭ قىزمەتىنىڭ ماڭىزدىلىعىن اتاپ ءوتتى.

– بالالاردىڭ ساپالى دايارلىعى ءۇشىن ۇنەمى جۇمىس ىستەپ، ولاردىڭ الەۋەتىن جۇزەگە اسىرۋ ءۇشىن قاجەتتى جاعدايدىڭ ءبارىن جاساۋ كەرەك. ولار حالىقارالىق وليمپيادالاردا جەڭىسكە جەتۋگە ءتيىس. وزگەلەرگە ۇلگى بولاتىن جوعارى ءبىلىمدى، ۇيلەسىمدى دامىعان تۇلعالاردى ءوسىرۋ كەرەك. ولاردىڭ ءارى قاراي ءبىلىم الۋى ءۇشىن استانادا جاڭا ۋنيۆەرسيتەت سالىنىپ، جۇمىس ىستەپ جاتىر. سونىڭ ارقاسىندا قازىر جوعارى ساناتتى ءبىلىم الۋ ءۇشىن شەتەلگە شىعۋدىڭ قاجەتتىلىگى جوق. سول ۋنيۆەرسيتەتكە قاراپ وزگەلەرى دە بوي تۇزەۋى ءتيىس، – دەدى مەملەكەت باسشىسى.

باق وكىلدەرىنە ارنالعان بريفينگتە قازاقستان پرەزيدەنتى بارشانى ءبىلىم كۇنىمەن قۇتتىقتاپ، وقۋشىلارعا، اتا-انالار مەن مۇعالىمدەرگە مىقتى دەنساۋلىق جانە تابىس تىلەدى.

– ەلىمىزدە شامامەن 8 مىڭعا جۋىق مەكتەپ ەسىگىن اشىپ، 2,6 ميلليون بالا وقۋىن باستايدى. وقۋشىلاردىڭ سانى وتكەن جىلمەن سالىستىرعاندا 70 مىڭعا ۇلعايدى. بۇل كۇنى بۇكىل ەلىمىز بويىنشا جاڭادان 63 مەكتەپ ىسكە قوسىلدى. جالپى، تاۋەلسىزدىك جىلدارىندا ەلىمىزدە مىڭداعان مەكتەپ سالىندى، بۇل وسكەلەڭ ۇرپاققا دەگەن قامقورلىقتى بىلدىرەدى، – دەدى مەملەكەت باسشىسى.  

قازاقستان پرەزيدەنتى رەسپۋبليكادا 300 مىڭ مۇعالىم جۇمىس ىستەيتىنىن، سونىڭ 11 مىڭنان استامى ەلوردالىق مەكتەپتەردە ساباق بەرەتىنىن اتاپ ءوتتى.

– قازاقستاننىڭ بولاشاعى مۇعالىمدەردىڭ قولىندا. بالالاردى پاتريوتتىق پەن تولەرانتتىلىق رۋحىندا تاربيەلەۋ كەرەك. ولار دوستىققا ادال بولىپ، اتا-انا مەن ۇلكەندەردى قۇرمەتتەۋى ءتيىس. وسىنىڭ ءبارى – ءبىزدىڭ قوعامنىڭ ەشقاشان ءمانىن جوعالتپايتىن قۇندىلىقتارى، ءبىز ونى بالالارىمىزعا ميراس ەتۋىمىز كەرەك، – دەدى نۇرسۇلتان نازارباەۆ.

№75 كوپبەيىندى جاڭا مەكتەپ-گيمنازيادا 1300-دەن استام ەلوردالىق بالا وقيتىن بولادى. وقۋ ورنى زاماناۋي وقۋ جابدىقتارىمەن قامتىلعان، وقۋشىلاردىڭ عارىشتانۋ، مەديتسينا سالاسىنداعى عىلىمي-زەرتتەۋ جۇمىستارىنا قاتىسۋىنا مۇمكىندىك بەرەتىن زەرتحاناسى، سونداي-اق پەداگوگيكالىق جانە اقپاراتتىق تەحنولوگيالار ينتەگراتسياسى ورتالىعى بار.

Akorda.kz