اقش يراكتىڭ سولتۇستىگىندەگى كۇردتەرگە يسلامشىل سودىرلارمەن سوعىسۋىنا كومەكتەسۋ ءۇشىن تىكەلەي قارۋ-جاراق جەتكىزە باستادى دەپ حابارلادى 11 تامىز كۇنى اتى-ءجونىن ايتۋدى قالاماعان امەريكالىق شەنەۋنىكتەر. ولاردىڭ سوزىنشە، ازىرگە تەك اۆتوماتتى ۆينتوۆكالار مەن وق-دارىلەر عانا جەتكىزىلىپ جاتىر. ازاتتىق راديوسىنىڭ جازۋىنشا اقش وكىلى قارۋ-جاراقتى ورتالىق بارلاۋ باسقارماسى (تسرۋ) جەتكىزىپ جاتقانىن، بىراق تاياۋدا قورعانىس مينيسترلىگى دە كۇردتەردى قارۋلاندىرا باستاۋى مۇمكىن ەكەنىن ايتقان.

كۇردىستاننىڭ استاناسى ەربيل قالاسى ماڭىندا كۇرد قارۋلى توبى - “پەشمەرگا” جاساقتارى “يسلام مەملەكەتى” ۇيىمىنىڭ سودىرلارىنا قارسى كۇرەسىپ جاتىر. اقش قارۋلى يسلامشىل راديكالداردىڭ پوزيتسيالارىنا اۋەدەن سوققى بەرگەن سوڭ 10 تامىز كۇنى كۇرد جاساقتارى يراكتىڭ سولتۇستىگىندەگى ەكى قالانى باقىلاۋىنا العان.