قازاق– ەرتەدەن «قىزىم – بارىم، ارىم، قوناعىم» دەپ قاستەرلەگەن حالىق. تۋمىسىنان باتىر حالىقتىڭ تۇمار مەن زاريناداي پاتشاسى، ادىلدىك پەن ادىلەتتىلىكتىڭ اق تۋىن ۇستاعان ايشا ءبيبى جانە قاراشاشتاي شەشەندەرى، جارىنىڭ وشاعىن سوندىرمەي، ءبۇتىن ءبىر ەلدى باسقارعان ايعانىمداي كوسەمدەرى، كەشەگى نەمىس فاشيستەرىنە قارسى كۇرەستە مانشۇك پەن ءالياداي قورعانى، تاۋەلسىزدىكتىڭ ەرتەڭى ءۇشىن كۇرەسكەن ءلاززات پەن سابيراداي باتىر قىزدارى بولدى. كوركىنە اقىلى ساي قازاقتىڭ قىزى، مىنە، وسىنداي تەكتى. وسىنداي باتىر حالىقتىڭ تاعى ءبىر قىزى بۇگىندە 17 جاسىندا الەمدى اۋزىنا قاراتىپ، سۇلۋلىعىمەن ميلليونداعان تابىنۋشىنىڭ كۋميرىنە اينالدى. ول كىم دەپ وتىرعان شىعارسىزدار. سوڭعى ەكى اپتا ىشىندە عالامتور سايتتارى مەن الەۋمەتتىك جەلىلەردىڭ تاڭدانىسىن تۋدىرىپ، سۇلۋلىق قۇپياسىن جارىسا جازىپ جاتقان شەتەل باسىلىمدارىنىڭ جۇلدىزى - قاراپايىم قاس-ساقتىڭ ھاس سۇلۋى سابينا التىنبەكوۆا. العاش قازاق قىزىنىڭ كەلبەتىن قىتايلىقتار بايقاعان. ونى «ازيا بىرىنشىلىگىندەگى ەڭ سۇلۋ ۆوللەيبولشى» دەپ اتاعان-شەتەلدىك «دaily Mail» باسىلىمى. ال شەتەلدىك 9gag.com سايتىنداعى سابينا التىنبەكوۆانىڭ جاريالانىمى مەن فوتوسۋرەتى 300 000 پىكىر جيناعان. قولدانۋشىلار سابينانىڭ تابيعي سۇلۋلىعى مەن جاپوندىق انيماتسيا كەيىپكەرلەرىنە ۇقسايتىندىعىن ايتقان. ال ۋكرايندىق ua.tribuna.com پورتالى قازاق قىزىنىڭ تايپەيدەگى جارىستاعى فوتوسۋرەتتەرىن عالامتورعا جاريالاپ: «قازاق قىزى سابينا التىنبەكوۆا – ەڭ جاس، سۇلۋ سپورتشى»، – دەپ مويىنداپ، ماقالا جازعان. ال يندونەزيالىق bandung.bisnis.com پورتالى: «سابينا التىنبەكوۆا ءوزىنىڭ تابيعي سۇلۋلىعىنىڭ ارقاسىندا ەلدىڭ نازارىندا ءجۇر. ونىڭ سۋرەتتەرى – ءتۇرلى باق-تىڭ ناعىز ۆيرۋسى»، – دەپ جار سالدى. بۇگىندە وتاندىق باق پەن شەتەلدىك الەۋمەتتىك جەلىلەر ۆولەيبولشى سابينا التىنبەكوۆا تۋرالى جارىسا جازىپ جاتىر. ونىڭ سىرت كەلبەتىنىڭ وزىندىك قۇپياسى تۋرالى تامسانىپ، قازاقتىڭ قارشاداي قىزىنىڭ تابىنۋشىسىنا اينالعاندار قانشاما. بيىلعى جىلى قازاق سپورتىندا فەنومەن قالىپتاستىرعان سابينا التىنبەكوۆا تۋرالى جاڭاشىلدىقتى باسىنان باستاپ بايانداساق.

سپورتشى سابينا التىنبەكوۆا ۆولەيبولدان قازاقستان جاستار قۇراماسىنداعى – جالعىز قازاق قىزى. ءبارىمىز بىلەتىندەي، قۇراما كوماندالاردان قاراكوزدەرىمىزدى نەكەن-ساياق كورىپ قالاتىنىمىز بار. نەگىزىنەن، ءبىزدىڭ ەلدىڭ نامىسىن ۇلتتىق قۇرامالاردىڭ وزىندە شەتەل لەگيونەرلەرى مەن وزگە ۇلت سپورتشىلارى قورعاپ كەلەدى. جالعىز قارىنداسىمىز سابينا التىنبەكوۆا ۇلتتىق قۇرامامەن قىتايدىڭ تايپەي ارالىندا وتكەن ۆولەيبولدان ازيا بىرىنشىلىگى سىنىنا قاتىسۋعا جولداما الىپ، ەل نامىسىن قورعاپ قايتتى. بىراق بۇل جولى ەلىمىزدىڭ ۆولەيبولدان قىزدار قۇراماسى بىرىنشىلىكتە جەڭىسكە جەتە قويمادى، ءتىپتى، سوڭعى ورىنداردىڭ ءبىرىن ءبولىسىپ قايتتى. ەسەسىنە سابينا التىنبەكوۆا قىتاي مەن تايپەي، ازيا قۇرلىعىنىڭ ميلليونداعان تابىنۋشىسىن وزىنە ءتانتى ەتتى. اياقاستىنان الەۋمەتتىك جەلىلەردىڭ جۇلدىزىنا اينالعان سابينا التىنبەكوۆانى ەلگە ورالعان بويدا الدىمەن جۋرناليستەر قاۋىمى قارسى الىپ، بۇل جاڭاشىلدىقتى بولىسۋگە شاقىردى. سابينا التىنبەكوۆا ءوزىنىڭ باسىنا قونعان باق پەن اتاقتى، وعان قالاي قارايتىنىن بىلاي جەتكىزدى: «شىنىمدى ايتسام، ءوزىم دە تاڭ قالدىم. قازاقستاننىڭ حالىقارالىق جارىستاردا جوعارعى ورىن الىپ جۇرۋىنە ءوز ۇلەسىمدى قوسىپ جۇرگەن قاراپايىم قىزبىن. مۇنداي ايگىلىلىك مەنى تاڭداندىردى دەپ ايتا المايمىن». ونىڭ سوزىنە قاراعاندا، ۆولەيبولدان وتكەن ازيا بىرىنشىلىگى بارىسىندا تايپەيدە ءار قادامىنا مۇمكىندىك بەرمەپتى. «نەگە ولاي بولعانىن بىلمەدىم. ءوزىم دە وسى سۇراقتى قويامىن. نەگە ءدال مەن؟ ماعان جاقسى كومپليمەنتتەر ايتىپ، سىيلىقتار بەرگەنى جاقسى، ارينە. ەڭ باستىسى، كوپتەگەن ادامدار قازاقستان تۋرالى دا ءبىلىپ قالادى. ازيادا ءبىزدىڭ تۋىمىزبەن سۋرەتكە ءتۇسىپ، بىزگە جانكۇيەر بولدى»، – دەپ ءوزىنىڭ تاڭدانىسىن دا جۋرناليستەر قاۋىمىمەن ءبولىستى. الەۋمەتتىك جەلىلەر مەن سايتتارداعى ايگىلىلىگى تۋرالى ول بىلاي دەپ جاۋاپ بەردى: «تۆيتتەردە» اككاۋنتىم جوق، Ask me ءوشىرىپ تاستاعان، تەك «ينستاگرام» مەن «ۆكونتاكتەدە» عانا اككاۋنتىم بار، بىراق كوبىسى مەنىڭ اتىمنان اشىپ الادى، ولار نەگە ولاي ىستەيتىنىن تۇسىنبەيمىن». ءبىر-اق كۇندە عالامتور جۇلدىزىنا اينالعان سابينانىڭ سوزىنە قاراساق، ول ءۇشىن اتاق پەن داڭق، ايگىلىلىك ماقسات ەمەس، ەلىنىڭ ەرتەڭگى سپورتىنىڭ بولاشاعىن الەمدىك سىنداردان بيىكتەتىپ، ەلىنىڭ اتىن شىعارۋدى عانا ويلايدى ەكەن. ارقاشان دا جۇلدىز ەمەس، قاراپايىم قازاقتىڭ قىزى بولۋ باستى ماقساتى. ءتىپتى، سىرتقى كەلبەتى مەن سۇلۋلىعى الەمدى مويىنداتقان سابيناعا قازىرگى تاڭدا ءتۇرلى مودەلدىك اگەنتتىكتەر ۇسىنىس بىلدىرۋدە، بىراق ولاردىڭ بارلىعىنا: «مەن ءسان اگەنتتىكتەرىندە جۇمىس ىستەۋگە قارسىمىن. مەن سپورتتى تاڭدادىم»، – دەپ جاۋاپ بەرگەن. ال سۇلۋ بيكەشتىڭ اناسى نۇريپا ءامىروۆا: «مودەل بولۋعا ۇسىنىستار ءتۇسىپ جاتقانىن بىلەمىز، الايدا ءبىز اتا-اناسى رەتىندە قارسىمىز، ول قارشادايىنان سپورتتى تاڭدادى. ول سول جولدا قىزمەت ەتەدى»، – دەيدى. ال سابينانىڭ جاتتىقتىرۋشىسى نۇرلان سادىقوۆ بولسا، بۇل اتاقتىلىققا اسا قۋانىشتى ەمەس ەكەنىن: «سابينا التىنبەكوۆا – ەڭبەكقور سپورتشى، وتە قاراپايىم. بىراق بۇل اتاقتىلىعى ونىڭ سپورتتىق كارەراسىنا سىزات تۇسىرەدى دەپ ويلامايمىن. بىراق كومانداعا اسەر ەتۋى مۇمكىن»، – دەپ قازاق قىزىنىڭ سپورتتىق كارەراسىنىڭ جالعاسۋىن تىلەيدى. لايىم، ءبىز دە سونى تىلەيىك. قازاقتىڭ ارۋ قىزى ءسان مودەلدەرى مەن جارناما اگەنتتىكتەرىندە جۇرگەنشە، ۇلتتىق قۇراما ساپىندا ەل نامىسىن قورعاپ ءجۇرسىن دەمەكپىز. الەم ەلى قازاقتىڭ سۇلۋلىعىنا تامسانىپ، «بورات» فيلمىندەگى كەيىپكەرلەر قازاق قىزدارى ەمەستىگىنە كوزى جەتەر بالكىم...

التىنبەك قۇمىرزاقۇلى

Abai.kz