اڭگىمەسى ءتۇزۋ الەۋمەتتىك  مينيستر

ەڭبەك جانە حالىقتى  الەۋمەتتىك قورعاۋ مينيسترىلىگى كەشەگى ناتاليا كورجوۆا حانىمنان باستاپ «تاياق جەۋمەن» كەلەدى. اسىرەسە كورجوۆانىڭ تۇسىندا اتالعان مينيسترلىك بۇقارالىق سىننان كوز اشپاعان ەدى. ەكس-ءمينيستردىڭ ءوزى دە الەۋمەتتىڭ تاراپىنان ەستىمگەن ءسوزدى ەستىپ ءجۇردى. گازەت بىتكەن شومەلەسىن توبەسىنە ۇيگەن سۇيكىمدى ءمينيستردى مىنەپ جاتاتىن. تەلەارنالار دا ونىڭ كورىكتى ءجۇزىن كورسەتە وتىرىپ جەردەن الىپ، جەرگە سالاتىن-دى. ءيا، دەگەندەي-اق، ول كەزدە الەۋمەتتىڭ الەۋمەتتىك احۋالى تۇرالاپ تۇردى. مەملەكەت الەۋمەتتىك جاۋاپكەرشىلىك پەن جاردەماقىلاردان بارىنشا تيىلىپ، بۇقارا حالىق قاتتى قينالدى. سول كەزدە اشۋ-ىزاعا بۋلىققان جۇرت ءبارى  الەۋمەتتىك قورعاۋ مينيسترىلىگىنە تىرەلىپ قالعانداي مينيستر حانىمعا قاراپ ءتىل بەزەيتىن ەدى (قازىر ايتۋعا ىڭعايسىز، سارجاعال باسىلىمدار كورجوۆانىڭ باسىنان باقايشاعىنا دەيىن ءسۇزىپ ءسوز قىلىپ ءجۇردى).

كورجوۆادان كەيىن مينيسترلىك ورىنتاققا جايعاسقان ءاليحان بايمەنوۆ جەكەلەگەن باق قوجايىندارىمەن قارىم-قاتىناسىنىڭ تۇزۋلىگى ارقاسىندا اۋىر سىننان ەپتەپ سىتىلىپ كەتەتىن. ونىڭ ۇستىنە، وزىمەن بىرگە قانداي دا ءبىر رەفورمالاردى ەرتىپ الىپ، جاڭالىعىمەن، جاڭاشىلدىعىمەن كوزگە تۇسەتىن بايمەنوۆ ايتەۋىر الەۋمەتتىك سالاداعى اجىك-كۇجىك اڭگىمەگە اسا كوپ ۇرىنا قويعان جوق. الايدا، بۇل ءبارىن بايمەنوۆ تىنىدىرىپ كەتتى دەگەن ءسوز ەمەس. ەڭبەك جانە حالىقتى  الەۋمەتتىك قورعاۋ مينيسترىلىگى بايمەنوۆتىڭ كەزىندە دە قيىن جاعدايدى باستان كەشتى. ەكس-مينيسترلەر گۇلشارا ابدىحالىقوۆا، سەرىك ابدەنوۆتەر دە الەۋمەتكە جاعىمدى جاڭالىق، جىلى ءسوز ايتا الماي كەتتى. سەرىك ابدەنوۆتى زەينەتاقى رەفورماسىنا ورىنسىز ۇرىندىرىپ باسىن داۋعا سالعان بيلىك ءتىپتى ونى ءورىستىلدى ءباسپاسوزدىڭ مازاعىنا قالدىردى. ايتپەسە، ابدەنوۆ ءىستىڭ ءجونىن بىلەتىن جىگىت ەدى.

وسىلايشا  «يت ءمىنىپ يرەك قامشىلاپ» كەلە جاتقان ەڭبەك جانە حالىقتى  الەۋمەتتىك قورعاۋ مينيسترىلىگىنىڭ جۇمىسى تامارا دۇيسەنوۆا حانىمنىڭ تاعايىندالۋىمەن كەنەت جاندانا باستاعان سياقتى. راسىندا، بۇل سالانىڭ قىزمەتى   دۇيسەنوۆا كەلىسىمەن دۇرىلدەپ كەتە قويعان جوق، بىراق، ءمينيستردىڭ ءسوز ءلامى ارەدىك ايدىك ەلگە ۇناپ قالۋدا. مىسالى، ول استانادا ءباسپاسوز وكىلدەرىمەن كەزدەسۋ بارىسىندا ءماسىموۆ پەن سەرىك احمەتوۆ ۇكىمەتى شورت توقتاتىپ تاستاعان قازاق كوشىنىڭ ءتۇيىنىن ءبىر-اق اۋىز سوزىمەن تارقاتىپ جىبەردى. «ەتنيكالىق قازاقتارعا، - دەدى مينيستر، - ءبىر جىلدىڭ شەگىندە ازاماتتىق بەرىلەدى. ۇكىمەت بەلگىلەپ وتىرعان ايماقتارعا قونىستاناتىن ورالماندارعا الەۋمەتتىك جەڭىلدىكتەر قاراستىرالادى».

كوشى-قوننىڭ شارۋاسى ءالى ناقتى شەشىمىن تابا قويمادى، دەگەنمەن دە ءىستىڭ بەتى بەرى قاراعانى تۋرالى اڭگىمە ءمينيستردىڭ اۋزىمەن ايتىلدى. ەندى مىنە، تامارا دۇيسەنوۆا زەينەتاقى تولەمدەرىن قايتا ەسەپتەۋ جونىندە جاميعاتقا جاعىمدى جاڭالىق تاراتىپ وتىر. ءمينيستردىڭ سوزىنە قاراعاندا، زەينەتاقى جۇيەسىنە ەنگىزىلەتىن جاڭا وزگەرىستەر 2017 جىلدىڭ 1-ءشى شىلدەسىنەن باستالماق. بۇل ماقساتقا بيۋدجەتتەن ءبىر جىلعا 275 ميلليارد تەڭگە قاراستىرىلادى. ءسويتىپ، 2017 جىلدان باستاپ بازالىق زەينەتاقى ەڭبەك ءوتىلى مەن زەينەتاقى جۇيەسىنە قاتىسۋىنا قاراي تولەنبەك. «31» ارنانىڭ جاڭالىقتار قىزمەتى ءمينيستردىڭ سوزىنە سىلتەمە جاساي وتىرىپ، «ەڭبەك ءوتىلى مەن زەينەتاقى جۇيەسىنە 10 جىلعا دەيىن قاتىسقاندار كۇن كورىس دەڭگەيىنىڭ 50 پايىزىن الادى. ال ەڭبەك ءوتىلى 20 جىلعا دەيىنگىلەر 70 پايىزىن، 35 جىلدان اسسا  كۇن كورىس دەڭگەينىڭ 100 پايىز شاماسىندا زەينەتاقى تاعايىندالادى. بۇعان دەيىن ۇزاق جىل تەر توككەندەر، جۇمىس ىستەمەي شىققاندارمەن بىردەي زەينەتاقى الىپ كەلگەن ەدى. ۇزاق جىلدار داۋ تۋعىزعان ماسەلەنى ەڭبەك ءمينيسترى تۇبەگەيلى شەشەمىز دەگەن ويدا» دەپ حابارلادى.

- 2018 جىلدان باستاپ بارلىق جۇمىس بەرۋشىلەر مىندەتتى 5 پايىز زەينەتاقى جارناسىن تولەيدى. بۇل ءبىزدىڭ 2020 جىلعا دەيىن جاساپ وتىرعان تۇجىرىمدامالارىمىز، دەيدى مينيستر.

ءشارىپحان قايسار

Abai.kz