مەنىڭ ءىنىم ۇلار سەرىكقۇلۇلى سەرىكبايدىڭ تاعدىرى  ءومىر ەسىگىن اشقاندا-اق قيىنداپ ەدى. ءسابي قىرقىنان شىققان سوڭ ەكى-ءۇش كۇن ۇزاماي اناسى قايتىس بولدى.

اناسىنىڭ ءولىمى بىلاي بولعان ەدى. اكەسى مەن شەشەسى ۇلاردى كوتەرىپ جولدىڭ ارعى بەتىنە وتپەك بولادى. بالاسىن قولىنا ۇستاپ تۇرعان جەڭگەمىز: «سەكە، بالانى ءسىز كوتەرەسىز بە؟»،-دەپ وتاعاسىنا بەرىپتى. وتاعاسى بالانى الىپ جولدان ءوتىپ كەلە جاتقاندا جۇبايى ارتىنان ىلەسكەن. سول مەزەتتە شيقىلداپ كەلىپ توقتاعان ماشينانىڭ داۋىسى ەستىلەدى. اعام ارتىنا جالت قاراسا جان جارىن كولىك قاعىپ، سوناۋ اسپان كوككە قۋىرشاقشا ۇشىرعان ەكەن. جول جيەگىندە جاياۋ جۇرگىنشىلەرگە ارنالعان بەلگىنى ەلەمەگەن جاس دۇنگەن جىگىتى بولىپ شىقتى. قابىرعاسىنان ايىرىلعانىن سەزگەن اعام سول جەردە قول-اياعى قيمىلعا كەلمەي ءبىر ورىندا تىپىرلاپ نە ىستەرىن بىلمەي قالادى. بۇل وقيعانىڭ كۋاسى بولعان ادامدار جەدەل جاردەم شاقىرتىپ،جەڭگەمىزدى ۇزىناعاشتىڭ ورتالىق اۋرۋحاناسىنا الىپ كەلەدى. جەڭگەمىز جانساقتاۋ بولمەسىنە كىرگەننەن كەيىن-اق، «بۇيرەكتەرى ىستەن شىقتى، ءبىز ونى قۇتقارا المادىق»،-دەدى اق حالاتتى جاندار. حوش، جازمىشتان وزمىش جوق دەدىك دە تاعدىردىڭ سالعانىنا كوندىك.

بۇدان كەيىن اعامىز بالالارىن جەتىمسىرەتپەيىن دەپ ەكىنشى ايەل الدى. ول جەڭگەمىز ۇلارعا ءوز ۇلىنداي قامقور بولدى. ءىنىمىز وقۋ بىتىرەردەن ءبىر اي بۇرىن جەڭگەمىز ۇيگە كەلىپ ونىڭ قىزىقتارىن ايتىپ ءبىزدى ءبىر كۇلدىرگەن ەدى. ءبىز سونداي جەڭگەمىز بارىنا اللاعا شۇكىرشىلىك ايتىپ، قۋانىپ قالعان ەدىك. بىراق، ول قۋانىشىمىز ۇزاققا سوزىلمادى. سەبەبى، ءبىز «التىن بەلگىگە» ۇمىتكەر بولىپ وتىرعان وزات وقۋشى، ءبىلىمدى دە بىلىكتى ءىنىمىز ۇلاردان دا ايىرىلىپ قالدىق. ول دا اناسى سياقتى جول اپاتىنان قايتىس بولدى. ءىنىمىز ءوزىنىڭ سىنىپتاستارىمەن بىرگە تۇنگى كوشەنى قىدارماق بولىپ سەرۋەنگە شىعادى. ءبىر ماشيناعا وتىرىپ كورشى اۋىلعا بارماق نيەتپەن جولعا شىعادى. جولدا كەلە جاتىپ رولدەگى سىنىپتاسى جىلدامدىقتى ۇدەتە تۇسەدى. كوزدى اشىپ جۇمعانشا زۋىلداعان كولىك ءبىر بۇرىلىسقا جەتىپ كەلەدى. رولگە يە بولا الماعان جەتكىنشەك اپاتتى جاعداي تۋدىرىپ جول جيەگىندەگى تالعا بارىپ ۇرىلادى. سول مەزەتتە كولىك ىشىندە وتىرعان دياس ەسىمدى بوزبالا كوز جۇمادى. جول بويىندا اۋدارىلىپ جاتقان كولىكتى كورگەن كۋاگەرلەر دە تەزارادا جەدەل جاردەم شاقىرتىپ ۇلگەرەدى. جەدەل جاردەم تەز كەلگەنمەن، اۋرۋحانادان حايىر بولمادى. ءىنىمىزدى تەزدەتىپ اۋرۋحاناعا جەتكىزگەنمەن، ول جەردە نەيروحيرۋرگ مامان مەن ۋزي جاسايتىن ارنايى قۇرال جوق بولىپ شىقتى. ء«بىز ۇلاردى اۋرۋحاناعا الىپ كەلگەندە ونىڭ قول-اياعى قيمىلداپ، كوزى ءبىر نۇكتەگە قاراپ، ەرنى جىبىرلاپ بىردەڭەلەردى ايتىپ جاتقان.بىراق مۇنداعىلار بىزدە ءتيىستى مامان جوق، قولىمىزدان ەشتەڭە كەلمەيدى دەپ، قالادان ءبىر نەيروحيرۋرگ شاقىرتتى. ول كەلگەنشە ءىنىم 5 ساعات جانساقتاۋ بولمەسىندە تىپىرلاپ جاتتى. وعان اۋرۋحانا دارىگەرلەرى ەش كومەك كورسەتە المادى»-دەيدى تۋعان اعاسى ەرمەك. بۇل جاعدايدى ەستىپ مەنىڭ دە بۇل اۋرۋحاناعا دەگەن ىزا-كەگىم ۇدەي ءتۇستى. بۇرىن-سوڭدى «ولگىڭ كەلسە ۇزىناعاشتاعى اۋداندىق ورتالىق اۋرۋحاناعا بار» دەگەن وسەك-اياڭدى ەستۋشى ەم. بىراق وعان مەن وزىمشە سەنبەي جۇرگەنمىن. وسى جاعدايدان كەيىن كوزىم جەتتى. ۇزىناعاشتىق دارىگەرلەردەن پايدا بولماعاسىن وبلىسقا، دەنساۋلىق ساقتاۋ مينيسترلىگىنە حابارلاپ، مىقتى مامانداردى الدىردىق. ولار ءىنىمنىڭ ومىرىمەن بەس كۇن بەس ءتۇن ارپالىستى. «بالانىڭ ورگانيزىمى جاس، ساۋىعىپ كەتەدى»،-دەدى بىزدەرگە. ءبىز سول سوزگە سەندىك. بىراق سەنىمىمىز بەس كۇننەن كەيىن-اق سۋ سەپكەندەي باسىلدى. ء«بىز ودان ايىرىلىپ قالدىق، بالانىڭ بۇيرەكتەرى ىستەن شىقتى، بەكەم بولىڭىزدار»، -دەدى جانساقتاۋ ءبولىمىنىڭ باسشىسىسىماق ءداۋ ءبىر ورىس ەركەك. ءبىز وعان سەنبەدىك، ءولدى دەگەنگە كونبەدىك.

ول ءوزىنىڭ تۋعان كۇنىنە، كاملەتتىك جاسقا تولۋىنا ءدال ءبىر اي قالعاندا بۇل ومىرمەن قوش ايتىستى. جىلادىق، جوقتادىق، سالعىرتتىق تانىتىپ، جەدەل كومەك كورسەتە الماعان اق حالاتتىلاردى دا بوقتادىق. جازمىشتان وزمىش جوق، ماڭدايعا جازىلعان تاعدىرى وسى شىعار دەپ تە ءوزىمىزدى جۇباتتىق. سوندا دا اۋداندىق اۋرۋحاناعا دەگەن وكپەمىز قارا قازانداي بولىپ ءجۇر ءالى دە. ول جەردە ءتيىستى ماماندار مەن ءتيىستى قۇرال – جابدىقتارى بار بولعاندا بالكىم ومىرىنە اراشا بوپ قالار ما ەدى دەيمىز كەيدە. بەس ساعات اۋرۋحانا توسەگىندە بوسقا جاتقانشا ەم-دوم جاسالىپ، وتا جاسايتىندار بار بولسا بۇنداي قايعىلى جاعدايعا تاپ بولماس پا ەدىك. بىلمەيمىن. ولگىڭىز كەلسە ءبىزدىڭ ۇزىناعاشتىڭ اۋرۋحاناسىنا كەل دەيمىن بە مەن دە سوندا؟ بۇل تۋراسىندا قالام تەربەپ جازعىم كەلمەپ ەدى. تەك وزەكتى جارىپ بارا جاتقان وكىنىش ونە بويىڭدى ورتەپ جىبەرەدى ەكەن.

ۇلارسىز تاڭ اتقانىنا، ۇلارسىز كۇن باتقانىنا 40 كۇن تولدى. جانىڭ ءجانناتتا بولسىن، سارى اۋىز بالاپانىم-اۋ... سەن كەتتى دەگەنگە، ومىردەن ءوتتى دەگەنگە ءالى دە سەنە الار ەمەسپىز. اللاھىم جاتقان جەرىڭدى جايلى قىلسىن التىنىم، قابىرىڭ جارىق بولسىن، جارقىنىم!

ە.ابدۋللا

Abai.kz