قازاقستان مۇسىلماندارى

ءدىني باسقارماسىنىڭ توراعاسى،

باس ءمۇفتي حازىرەت 

ەرجان قاجى مالعاجىۇلىنا

بيسميللاھي راحمانير راحيم. اسسالاۋماعالەيكۋم، ۋا راحماتۋللاحي، ۋا باراكاتۋھۋ.

قادىرلى ەرجان قاجى مالعاجىۇلى!

اللاعا شۇكىر، ەلىمىز تاۋەلسىزدىك العان سوڭ، قازاقستان حالقى اللانىڭ حاق ءدىنى يسلامعا جاپپاي بەت بۇردى. وسىناۋ شىنايى قۇلشىلىقتىڭ، اق تىلەۋدىڭ ارقاسىندا، جەرىمىزگە تىنىشتىق، قۇت-بەرەكە ورنادى. ۇلتىمىز باي-قۋاتتى تۇرمىسقا قول جەتكىزدى. ەلباسىنىڭ شاقرۋىمەن الەمگە تارىداي شاشىلعان قانداستار قازاقستانعا كوشىپ كەلە باستادى. باسىمىزعا باس قوسىلىپ، سانىمىز كوبەيدى، ىرىسىمىز تاسىدى...

دەگەنمەن، وسى سوڭعى بەس-التى جىلدىڭ كولەمىندە قازاق كوشى، بەلگىسىز سەبەپتەرمەن، سايابىرلاپ قالدى. كەيدە جەرگىلىكتى تۋىستاردان: «وسى ورالمانداردى قاپتاتىپ قايتەمىز» دەگەن كۇڭكىلدى دە ەستىپ قالىپ جاتامىز. حالىق بولعان سوڭ ايتاتىن شىعار. بارلىق ەلدىڭ ۇلتتىق سانا-سەزىمى، ءبىلىم-قابىلەتى بىردەي ەمەس قوي، كەيدە تۇسىنۋگە دە بولادى. دەسەدە، ءبىر كەزدە ءو.س سەكىلدى ەل اعاسى جاسىنداعى، ۇلت ماقتانىشىنا اينالعان كىسىلەردىڭ اۋزىنان ءدال وسىنداي سوزدەردىڭ شىعىپ، ەفيردەن، گازەت بەتىنەن دۇيىم ەلگە تاراۋى  جاعامىزدى ۇستاتقان بولاتىن. بۇل جاقسىلىقتىڭ نىشانى ەمەس ەدى، ارينە! شىنداپ كەلگەندە، ءبىز قازاققا شىتىناپ شەكەمىزدەن قارايتىن حالگە ءالى جەتكەن جوقپىز. تىم ازبىز. ەلباسىمىزدىڭ: «قازاقستان حالقىنىڭ سانىن 2020 جىلعا قاراي جيىرما ميلليونعا جەتكىزۋ كەرەك!» دەگەن ۇندەۋى بارىن ءوزىڭىز جاقسى بىلەسىز. ء«بىزدىڭ ەلىمىز – جاس، جەرىمىز – ۇلان-عايىر، حالقىمىزدىڭ سانى بولسا – كوپ ەمەس. سوندىقتان ەلباسى رەتىندە ەلىمنىڭ بولاشاعىن ويلاپ الاڭ­دايمىن» دەگەنى تاعى بار.

ونىڭ ۇستىنە، شەت ەلدەردەگى كوپ قازاقتار تىلىنەن، دىنىنەن، سالت-داستۇرىنەن ايىرلىپ، وزگە ۇلتقا جۇتىلىپ بارادى. بۇل جاعداي تاۋەلسىز ەلدىڭ ءاربىر يماندى ازاماتىن بەي-جاي قالدىرماسا كەرەك دەپ ويلايمىن. «كوپ تىلەسە – كول» دەيدى حالقىمىز.

سىزدەن وسى قانداستارىڭىزدىڭ قارا شاڭىراق - قازاقستانعا ورالۋىن، اللا ريزالىعى ءۇشىن ءار ۋاق وقىعان نامازىڭىز سايىن، جاراتقاننان جالبارىنا تىلەۋىڭىزدى سۇرايمىن. ءوزىڭىز عانا تىلەپ قويماي، قازاقستانداعى قمدب-نا قارايتىن بارلىق مەشىتتەردەگى يمامدارعا دا تاپسىرۋىڭىزدى، ۋاعىزعا قوسىپ، ۇزبەي ۇنەمى ايتتىرۋىڭىزدى وتىنەم.

سونىمەن بىرگە، قانداستارىمىزدىڭ كوشىنە كەدەرگى جاساپ، قويانبۇلتاققا سالعىسى كەلەتىندەرگە، جالا جاۋىپ، كەمسىتەتىندنرگە دە اللانىڭ زاۋالى بار ەكەنىن، ءوزىن قويىپ، تۇقىم-تۇقيانىنا دەيىن ەكى دۇنيەدە وڭباي كەتەتەتىنىن قاداپ ايتۋدى، قاتاڭ ەسكەرتە كەتۋدى ۇمىتپاعايسىز.

اللا كوپ بولىپ سۇراعان نارسەنى بەرەدى. اسىرەسە، وسى ايلاردىڭ سۇلتانى –  قاسيەتتى رامازان ايىندا. قازاق كوشى قايتا ءبىر سەرپىن الىپ، كولىگىن بەكەمدەپ اتاجۇرتقا قۇيىلىپ جاتسا، ءبولىنىپ-جارىلعان وتباسىلار ءبىر-بىرىنە قايتا قوسىلىپ جاتسا، قانداي كەرەمەت بولار ەدى!

ءتۇرلى كوزقاراستاعى ەلدىڭ دە تانىمىن، سەنىمىن وزگەرتۋگە، قازاق حالقىنىڭ بىرلىگىن، باۋىرمالدىعىن نىعايتۋعا اللانىڭ قۇلشىلىق ۇيىنەن وسىنداي ساۋابى مول كۇندەردە ايتىلعان بۇل تىلەك-دۇعانىڭ اسەرى ءتىپتى زور بولاتىنىنا مەنىڭ ەش ءشۇبام جوق.

اللا سىزگە مىقتى دەنساۋلىق، ۇزاق عۇمىر بەرسىن، ەرەكە! ەلىمىز امان، جۇرتىمىز تىنىش، قازاق كوشى كولىكتى، ۇستاعان ورازاڭىز قابىل بولسىن!

بۇل ءوتىنىشىم سىزگە امانات!

قۇرمەتپەن،

اقىن اۋىت مۇقيبەك

28.06.2014

استانا  

Abai.kz