«قاسقىردىڭ اۋزى جەسە دە قان، جەمەسە دە قان» دەمەكشى، جىبىرلاپ تيسەتىن ادەتىمىز كولەڭكەدەي  ارتتان قالمايتىنى جامان. وسى اپتادا شىعىستاعى ۇلى ابايدىڭ ەسكەرتكىشى  ءارتۇرلى اڭگىمەنىڭ ارقاۋى بولدى. بىرەۋلەر ءدال وسى ءساتتى پايدالانىپ، ساپارباەۆتى اياعىنان شالۋدىڭ ارەكەتىن جاساپ ءجۇر. تىپتەن دۇركىرەتىپ ماقالا جازىپ، اقىندار ولەڭ شىعارىپ كەتىپتى. نەدەگەن پىسىقپىز، ءا! تۇيمەدەيدى تۇيەدەي قىلىپ كورسەتۋ – ءۇي ىشىنەن ءۇي تىككەندەردىڭ ەجەلگى ادەتى عوي! ەگەردە ماعان حالىقتىڭ ورتاسىندا جۇرگەن قاي اكىمدى قولدايسىز دەسە، وندا مەن قوس قولىمدى توبەگە كوتەرىپ،  «ساپارباەۆ» دەر ەدىم. سەبەبى بەردىبەك مىرزا حالىقتىڭ ورتاسىندا جۇرگەن ازامات. كۇيى كەتىپ، ساپاسى سىن كوتەرمەگەن شىعىس قازاقستان وبلىسىن جانداندىرىپ، تىرشىلىگىن قالىپقا تۇسىرگەن اكىمگە العىس ايتقاننىڭ ورنىنا قارعىس جاۋدىرعانىمىز كۇنا ەمەي نەمەنە!؟ تىرناق استىنان كىر ىزدەپ، ازاماتتى قارالاۋ ارىمىزعا سىن. جەتىمىن جىلاتپاي، جەسىرىن قاڭعىرتپاي، مۇڭ-مۇقتاجدارىن تىڭداپ ءتيىستى كومەگىن كورسەتىپ وتىرعان اكىم بولسا، ول – ساپارباەۆ ەكەنى داۋسىز.

اكىمدەردىڭ دەنى «ۇيالشاقتىق» دەرتىنەن ايىعا الماي ءجۇر. ولار حالىقتى قابىلداماق تۇگىلى ەل الدىنا شىعىپ ءسوز سويلەۋدەن جاسقانادى. ولار ەكى جىل وبلىستى باسقارىپ، ءۇش جىل استانادا قىزمەت اتقارىپ، حالىقتىڭ قازىناسىن قازانىمەن جۇتىپ، ۇلتاراعىنان باستاپ التىنمەن اپتاتىپ، كۇمىسپەن قاپتاتىپ، جەتىنشى جىلى حراپۋنوۆ سياقتى شەتەل اسادى. ال پرەزيدەنتتىڭ تاپسىرماسىن مۇلتىكسىز ورىنداپ كەلە جاتقان ساپارباەۆتى قۇبىجىق ەتىپ كورسەتۋ – مەنمەنسىگەن نادانداردىڭ ءىسى ەكەنى انىق.

ءبىز بىلەتىن بەردىبەك ۇلى ابايدىڭ، ۇلى مۇحتاردىڭ توپىراعىنا سۋ سەۋىپ، پوليگوننان ۋلانىپ كوز اشپاعان حالىقتىڭ ماڭايىن نۇرلاندىرىپ ءجۇر. ەن دالانىڭ بويىنا قان جۇگىرتىپ، ادەبيەت پەن مادەنيەتتى وركەندەتىپ، ۇلت قايراتكەرلەرىنىڭ ءىزىن جوعالتپاي، توم-تومداپ كىتاپ شىعارىپ تا جاتىر.

ەندەشە، ساپارباەۆقا تەك قانا، ءسات-ساپار!

ەربول اقشولاقوۆ         

Abai.kz