ءبىزدىڭ قوستانايدا جىل ارالاتىپ حالىقارالىق  دەپ اتاق بەرىپ، ايدار تاعىلعان "زولوتوي ميكروفون" اتتى جاس انشىلەردىڭ كونكۋرسى وتەدى. الايدا كونكۋرستىڭ اتى قازاقشا جازىلمايدى دا، اۋدارىلمايدى. ء سىرا، مۇندا اندەر نەگىزىنەن سول كورشى ەلدىڭ تىلىندە ايتىلاتىندىعىنان  شىعار. ايتەۋىر، بۇل كونكۋرستىڭ قازاق ەلىندە ءوتىپ جاتقاندىعىن وعان قاتىساتىنداردىڭ ايقىن سەزىنىپ جۇرمەيتىندىگى ايدان انىق. بيىل وسى سايىستا وبلىسىمىزدىڭ ليساكوۆ دەگەن قالاسىنان جاندوس مۋحاممادي اتتى جاس ءوسپىرىم ەلدەن ەرەك داۋسىمەن قازىلار القاسىن تاڭ قالدىرىپ، باس جۇلدەنى قانجىعاسىنا بايلادى. بۇل كونكۋرستىڭ دەنى ورىسشا وتكەنىمەن جاندوستىڭ جەڭىسىنە شىن جۇرەگىمىزبەن قۋانعانىمىز انىق.
   بۇل از دەسەڭىز جاندوسىمىز وسى جىلدىڭ ماۋسىم ايىنىڭ باسىندا الماتىدا وتكەن تاعى دا حالىقارالىق دەگەن اتى بار "بوزتورعاي" بالالار شىعارماشىلىعى كونكۋرسىندا دا ەشكىمگە دەس بەرمەپتى. وسى ءوز ولكەمىزدەگى گازەتتەردىڭ جازۋىنا قاراعاندا ونداعى ءادىل قازىلار القاسى وسى جاس ونەرپازعا ءبىراۋىزدان وتە جوعارى باعا بەرىپ، تالانتىنا باس ءيىپتى.
  ء بارى دۇرىس قوي، ارينە. الايدا ءبىزدىڭ تاڭ قالعانىمىز بۇل جاس تالانت سول "بوزتورعايدا" ەكى انىمەن جۇرتتى تامساندىرعان كورىنەدى. جانە ول ەكى ءان انا تىلىمىزدە ەمەس، اعىلشىن مەن يسپان تىلىندە شىرقالىپتى. جەرگىلىكتى ورىس ءتىلدى ءباسپاسوز اكەسى ۇل تاپقانداي وسىلاي قۋانىپ جازىپ جاتىر. وتىرىك-راستىعىن كىم ءبىلىپتى، الايدا بۇل شىندىق بولسا قاسيەتتى ءتىلىمىزدى تاعى دا بوساعاعا سۇيرەپ تاستاعان جايىمىز بار ەكەن. ونسىز دا كوگەنكوز ءتىلىمىزدىڭ تۇساۋىن ودان سايىن تارىلتىپ، ايدى اسپانعا ءبىر-اق شىعارىپپىز. وزگە ءتىلدى ءان شىرقاپ، بوتەن ەلگە جاقسى اتتى كورىنۋگە ارنالعان بۇل "بوزتورعايدىڭ" ءبىزدىڭ ەلگە قانشا قاجەتتىگى بار ەكەندىگىن تۇسىنە المادىق.
     بۇل جايدى وتىرىك دەيىن دەسەڭ، اتالمىش كونكرۋستاعى ءبىر دەتال كوڭىلگە كۇدىك ۇيالاتا بەرەدى. ول جاندوستى جۇرگەنوۆ اتىنداعى ۇلتتىق ونەر اكادەمياسىنا اناۋ-مىناۋ ەمەس، بەلگىلى ءانشى لاكي كەسوگلۋ قولقالاپ شاقىرعان كورىنەدى. بۇل دا كەزدويسوق ەمەس شىعار. تازا قازاق تىلىندە ءان ايتاتىن ادامدى كەسوگلۋ جان-تانىمەن تۇسىنە قويار ما ەكەن؟

 مۇراتبەك داۋرەنۇلى.

Abai.kz