قۇلدان دا ءبىر سۇراق!..
«ەسەپ-قيساپ...»
قر ستاتيستيكا اگەنتتىگى. 2014 جىلعا ارنالعان ايلىق ەسەپتىك كورسەتكىش.
- ەڭ تومەنگى زەينەتاقا كولەمى – 20 782 تەڭگە.
- زەينەتاقىنىڭ ورتاشا كولەمى – 43 478 تەڭگە.
- ەڭ جوعارعى زەينەتاقى كولەمى – 54 171 تەڭگە.
- ...ەڭ تومەنگى كۇنكورىس دەڭگەيى – 19 934 تەڭگە.
- ...ازىق-تۇلىك سەبەتى – 11 960 تەڭگە.
- ...كەدەيلىك شەگى – 7 974 تەگە.
- ايلىق ەسەپتىك كورسەتكىش – 1 852 تەڭگە.
- ...ەڭ تومەنگى ەڭبەكاقى – 19 960 تەڭگە.
- ...ورتاشا ايلىق جالاقى (ەڭبەكاقى) – 116 927 تەڭگە...
قۇلدان دا ءبىر سۇراق!.. جاقسى... ال سوندا «بايلىق شەگى» قانشا؟.. 1 ميلليون دوللار ما؟!
جالپى، مەن وسى ستاتيستيكالىق اگەنتتىگىمىزدىڭ ەسەپ-قيسابىن تۇسىنبەيمىن!.. قاي ءبىر جىلى سوڭعى حالىق ساناعىنىڭ ناتيجەسىنە بايلانىستى اقپارات قۇرالدارىندا ءارتۇرلى پىكىرلەر ايتىلدى. قىسقاسى، نە كەرەك ءبىر جىل ىشىندە پرەمەر، پرەزيدەنت، اگەنتتىك توراعاسى ءۇش ءتۇرلى دەرەك كەلتىردى. پرەمەر (ول كەزدە دە وسى ك. ءماسىموۆ بولاتىن) قر جالپى حالىق سانىنداعى قازاقتاردىڭ ۇلەسى – 67 پايىز دەسە، پرەزيدەنت – 65, ال اگەنتتىك توراعاسى – 63 پايىز دەپ تۇيىندەدى.
باس جاعىنا بارماي-اق كوزىمىز كورىپ، قۇلاعىمىز ەستىگەن سوڭعى ءۇش حالىق ساناعىنىڭ ۇشەۋىنە دە كوڭىلىم تولمايدى... كۇمانىم بار!.. نەگە دەيسىز عوي؟!
سول ءۇش ساناقتىڭ ۇشەۋىندە دە مەنى، مەنى عانا ەمەس بۇكىل وتباسىمدى ەسەپكە تىركەگەن ءتىرى پەندە جوق.
سوڭعى 2009 جىلعى ساناق كەزىندە الماتىدا، «قازاق راديوسىندا» قىزمەت ىستەدىم. «ساناق قالاي جۇرەدى، قالاي تىركەلەمىز؟» دەگەن سۇراعىمىزعا «مەكەن-جايىڭا نە جۇمىس ورنىڭا كەلەدى» دەگەن سوڭ، قامسىز كۇتىپ جۇرە بەردىك. بىراق كەلگەن ادام بالاسى جوق. اقىرى ءسويتىپ، سانعا دا، ساناتقا دا قوسىلماي دالادا قالدىق!..
ءوزىم وتباسىممەن پاتەر جالداپ تۇرامىن. تاياۋدا عانا قوجايىنىم بوسات دەگەن سوڭ قونىس اۋىستىرعام... سوندىقتان، نەسىن جاسىرايىن، جۇمىسقا كەلەر دەپ ويلادىم!.. ويتكەنى، قازاق راديوسىنداعى قىزمەتكەرلەردىڭ كوبى – ءوزىم سياقتى جالدامالى پاتەردە تۇراتىندار... اسىرەسە، جاستار!..
«سەندەر نە قىلدىڭدار، ساناققا ىلىكتىڭدەر مە؟» - دەپ سىر تارتىپ كورسەم: «وي، اعا، ءسىز دە قىزىقسىز!.. ءبىزدى قايتەدى؟! سايلاۋ ناۋقانى كەزىندە اكىرەڭدەپ تىنىشتىق بەرمەيتىن اتقامىنەرلەر مەن جانالعىش-جاندايشاپتاردىڭ ەشقايسىسى سۇراعان جوق!» - دەسىن. سونىمەن، قالدى!..
بۇل – ءبىزدىڭ، ءبىر كەزدە ء«تورتىنشى بيلىك» اتانعان جۋرناليستەردىڭ جاعدايى... ال بالا-شاعاسىنا ناپاقا ىزدەپ جەر-كوكتى كەزىپ جۇرگەن بازارشىلار مەن قۇرىلىسشىلار، «ەر ازىعى مەن ءبورى ازىعى جولدا» دەپ كۇن-ءتۇن قاتپاي جورتىپ جۇرگەن جاستار مەن شۇبىرىندى قاراپايىم قازاقتار جايىندا، ءتىپتى، ءسوز ەتۋدىڭ ءوزى ەرسى!..
...ال ءسىز 63 پايىز دەيسىز!..
«سامارقاندا ءبىر اپكەم بار...»
اركىمنىڭ ءوز «دەرتى» بار... ايتەۋىر وسى سالادا نان تاۋىپ، ناپاقا تەرىپ جۇرگەن سوڭ، بيلىك باسىنداعىلار اۋىسقان سايىن «بىزدە دە ءبىر وزگەرىس بولا ما؟» دەپ ۇمىتتەنە باستايسىڭ!.. ء«ۇمىتسىز – سايتان»... ارينە، جاقسىلىق كۇتەسىڭ!..
بىراق... ءسىزدى قايدام، ءوز باسىم بۇل جولعى اۋىس-تۇيىستەن ەشتەڭە دامەتپەيمىن!..
مادەنيەت ءمينيسترى – ارىستانبەك مۇحامەديۇلى.
وبالى نەشىك، كورگەن ادامىم ەمەس! كورسەتپەي-اق قويسىن!.. «قوياننىڭ ءتۇرىن كورىپ قالجاسىنان ءتۇڭىل» دەگەن...
وسىدان ءبىراز ۋاقىت بۇرىن بۇكىل ەلدى دۇرلىكتىرىپ، «سامۇرىق» قازاقستان ۇلتتار تەاترىنىڭ تۇساۋكەسەرى ءوتتى. «ەستىمەگەن ەلدە كوپ»، تەاتردىڭ ەڭ باستى ەرەكشەلىگى – كەيىپكەرلەردىڭ ءبىر ساحنادا، ءبىر پەسادا بىرنەشە تىلدە تىلدەسۋى. بۇعان نە دەيسىز؟! ءماشھۇر ءجۇسىپ اتامىزدىڭ «تىرشىلىكتە كوپ جاساعاندىقتان كورگەن ءبىر تاماشامىز» دەيتىن شىعارماسى بولۋشى ەدى، بۇنى دا كوردىك!..
ال ەندى تىڭداڭىز، وسى يدەيانىڭ اۆتورى – بۇگىنگى مادەنيەت ءمينيسترىمىز ارىستانبەك مۇحامەديۇلى. راس، ول كەزدە فاميلياسى اليەۆ بولاتىن... بىراق بۇل – باسقا اڭگىمە!..
تەاتردىڭ كوركەمدىك جەتەكشىسى دە سول كىسى بولدى... مادەنيەتىمىزدىڭ بولاشاعىن وسىدان-اق بايقاي بەرىڭىز!..
ايتپاقشى، جاقىندا بەلگىلى تەلەجۋرناليست نۇرلان ەرىمبەتوۆ ءوزىنىڭ «ايتپارك» باعدارلاماسىندا «مىنىستىرىمىزدەن» «تاۋەلسىزدىك العالى بەرى مادەنيەت ءمينيسترى 20 رەت اۋىستى، بۇل جايىندا نە ايتاسىز؟» دەپ سۇراپتى. سوندا «ارىستان كوكەمىز»: «دليا مەنيا چاستايا سمەنا مينيستروۆ گوۆوريت و توم، چتو ەتوي سفەروي موجەت ۋپراۆليات كتو ۋگودنو ي سكولكو ۋگودنو!» - دەپ جاۋاپ بەرىپتى. (ينتەرنەتتەن الىنعان دەرەكتى سول كۇيى وزگەرتپەي بەرگەندى ءجون كوردىك)...
...ءمينيسترىمىزدىڭ ءسوزى – وسى! قالعانىن ءوزىڭىز شەشىڭىز!..
...كەلەسى كىم؟! ءمىنىستىر كەلەدى، كەتەدى... قالاتىن – ءسىز بەن ءبىز. بىراق ءبىزدى كىم تىڭداپتى؟! سوڭعى امىرشىلىك تۇسىندا تىلگە تيەك ەتەر تۇك بىتىرمەسە دە مۇحتار اعامىزبەن ءالى جىلاپ كورىسەرمىز!..
مەيلى... «سويسا دا – قاساپشى سويسىن!..»
نوسترادامۋس
ەلۋ ەلگە جەتەمىز دەدىك – جەتتىك! اللا جازسا، 30-دىققا دا كىرەمىز... وعان ەشقانداي كۇمانىڭىز بولماسىن!.. بۇل ءبىز ءۇشىن تۇككە تۇرمايدى!.. ويتكەنى...
ويتكەنى، ءبىز – كۇشتىمىز! ويتكەنى، ءبىز – مىقتىمىز! ويتكەنى، ءبىز – ايتقىشپىز!..
ايتقىش بولعاندا قانداي!.. نوسترادامۋس جولدا قالادى!..
202... جىلى قازاقستان حالقى تۇگەلدەي قازاقشا سويلەيتىن بولادى!..
202... جىلى ەلىمىزدەگى قازاق حالقىنىڭ سانى 85 پايىزعا جەتەدى!..
202... جىلى قازاقستان ازاماتتارىنىڭ ورتاشا ءومىر ءسۇرۋ جاسىنىڭ ۇزاقتىعى 100 جىل بولادى!..
...ويتكەنى، -------------------------------------------------------------------------------!..
اللا جازسىن! ءامين!..
تۇرماعانبەت كەنجەباەۆ – اقىن، قازاقستان جازۋشىلار جانە جۋرناليستەر وداعىنىڭ مۇشەسى.
Abai.kz
