بۇگىن پارلامەنت پالاتالارىنىڭ بىرلەسكەن وتىرىسىندا قازاقستاننىڭ سىرتقى قارىزى تۋرالى ءسوز بولدى. بۇل تۋرالى  Tengrinews.kz حابارلادى. وتىرىس بارىسىندا، "ۇلتتىق بانكتىڭ مالىمەتىنە سايكەس، قازاقستاننىڭ سىرتقى قارىزى 148,8 ميلليارد اقش دوللارىن قۇرادى. وسى قارىزدى تومەندەتۋ ءۇشىن ۇكىمەت نەندەي شارالاردى قولعا الىپ جاتىر؟ وسى كورسەتكىش بويىنشا قازاقستان قاي ورىندا ءوزى؟", - دەپ سۇراعان ءماجىلىس دەپۋتاتى ايگۇل نۇركينا.

پرەمەر-ءمينيستردىڭ ورىنباسارى - قارجى ءمينيسترى باقىت سۇلتانوۆ قازاقستاننىڭ سىرتقى قارىزىن ازايتۋ ماقساتىندا قانداي جۇمىستاردىڭ اتقارىلىپ جاتقانىن جەتكىزگەنى تۋرالى ايتىپ، دەپۋتات حانىمعا جاۋاپ بەرگەن. ءمينيستردىڭ ايتۋىنشا، بۇگىندە قازاقستاننىڭ جالپى سىرتقى قارىزى 150 ميليارد دوللاردى قۇراپ وتىر.  "سونىڭ باسىم بولىگى - ءىرى ينۆەستيتسيالىق جوبالارعا (سىرتتان - اۆت.) تارتىلعان قاراجات. شامامەن، 60 ميلليارد - كۆازيمەملەكەتتىك سالانىڭ قارىزى، قالعانى - بانكتەردىڭ بەرەشەگى. 2007-2008 جىلدارى داعدارىسقا قارسى ءىس-شارالار اياسىندا ولاردىڭ قارىزى قايتا قۇرىلىمداۋدان ءوتتى. سودان بەرى بانكتەردىڭ بەرەشەگى ازايىپ كەلەدى. وتكەن جىلدىڭ سوڭىندا بيۋدجەتتىك ساياساتتىڭ جاڭا تۇجىرىمداماسى قابىلدانعان بولاتىن. وعان سايكەس، 2020 جىلعا قاراي كۆازيمەملەكەتتىك سەكتوردىڭ قارىزى 20 پايىزعا ازايۋى ءتيىس. ال رەيتينگكە كەلەر بولساق، سوڭعى ەكى جىل بويى ءبىز 148 مەملەكەتتىڭ ىشىندە 14-ورىنعا يە بولىپ كەلەمىز", - دەپ جاۋاپ بەرگەن سۇلتانوۆ ءوز سوزىندە.

اباي-اقپارات