بۇگىن برازيليانىڭ سان-پاۋلۋ قالاسىندا فۋتبولدان الەم چەمپيوناتىنىڭ 20 كەزەكتى ويىنىنىڭ اشىلۋ سالتاناتى بولادى. ءوز الاڭىندا 1950 جىلدان كەيىن ەكىنشى رەت فۋتبولدان الەم چەمپيوناتىن وتكىزىپ وتىرعان برازيلياعا بار الەم كوز تىگىپ وتىر. 32 كوماندا سىنعا تۇسەتىن فۋتبول باسەكەسىندە ازيادان بار جوعى 3 مەملەكەتتىڭ كومانداسى وينايدى.     ەۋروپادان 13 كوماندا قاتىسپاق. ۋەفا-نىڭ ىرىكتەۋىنە قاتىسۋدان اسا الماي جۇرگەن قازاقستان فيفا-نىڭ ويىندارىنان قاشان كورىنەتىنى بەلگىسىز.

اتالعان چەمپيوناتتى فۋتبولسۇيەر قاۋىمعا وتاندىق ءۇش تەلە ارنا تىكەلەي ەفيردە تاراتادى. قازاقستان ۇتا، قاز سپورت ارناسى جانە ەۋرازيا-1 ارناسى. بۇل تەلە ارنالارعا دودانىڭ جۇرگىزۋشىسى بولۋعا امانگەلدى سەيىتحان، ەسەي جەڭىسۇلى سىندى ايتۋلى سپورت كوممەنتاتورلارى شاقىرىلماعانى الەۋمەتتىك جەلىلەردە وتكىر  تالقىلاندى. ءتىپتى، «ازاتتىق» سايتىنىڭ جازۋىنشا ەۆرازيا-1 ارناسى ەكى اي بويى دايىندالعان سپورت كوممەنتاتورلارى سەرگەي رايليان پەن ەۆگەني اكمانوۆتىڭ ورىنا رەسەيدەن ارنايى كوممەنتاتور شاقىرتىپتى. كورشىگە بۇگىن عانا جالتاقتاپ وتىرعان جوقپىز، بۇل بولەك اڭگىمە.

فۋتبول ويىندارى وتەتىن برازيليا ويىن الدىندا قانداي قاربالاس بولسا، فۋتبول دەسە جانى قالمايتىن كورەرمەندەر دە سوناداي قاربالاس. فۋتبول ويناۋدان بولماسا دا فۋتبول كورۋدەن جاعا جىرتىسۋعا بار قازاقستاندىق كورەرمەن كىمگە جانكۇيەر بولماق؟ كەشە عانا قازاقستان ارناسىنىڭ «تاڭشولپان» باعدارلاماسىندا فۋتبول تۋرالى ءسوز بولىپ، قفف سپورتتىق ديرەكتورىنىڭ ورىنباسارى قانات مۇساتاەۆ جانكۇيەرلىك تۋراسىندا: «بىزگە ەڭ جاقىنى روسسيا، سوندىقتان روسسياعا جانكۇيەر بولامىز»، - دەپ وتىر. ءبىر تۇسىنبەيتىنىم رەسەيدىڭ باسقا مەملەكەتتەن، ورىستاردىڭ باسقا ۇلتتاردان نە ارتىقشىلىعى بار بولۋى مۇمكىن، ءتىپتى ورىستار ءبىزدىڭ ناعاشىمىز با؟ الدە ءبىر جاقىن تۋىسقانىمىز با؟ ءسىز نە دەيسىز؟

نۇرعالي نۇرتاي

Abai.kz