ۇبت-دا الماتىلىق ەكى تۇلەك 11 جىلعى ءبىلىمىن دالەلدەپ 125 بالل جينادى. №178 ليتسەيدىڭ تۇلەگى ايعانىم ءابدىجاپپار مەن ى.التىنسارين اتىنداعى №159 گيمنازيانىڭ ءبىتىرۋشىسى ءاسيا مارات 125 بالل جيناپ، ۇزدىك ناتيجە كورسەتتى. «التىن بەلگىلەرىن» دە اقتادى. Baq.kz سايتى ۇبت-دا جوعارى ناتيجەگە قول جەتكىزگەن ەكى تۇلەكپەن وتكىزگەن «ۇلان» گازەتىنىڭ سۇحباتىن جاريالادى.

125 بالل جيناعان قوس تۇلەك وزدەرىنىڭ جەتىستىگىنىڭ سىرىن بىلاي تۇسىندىرگەن:

ايعانىم ءابدىجاپپار: 11-سىنىپقا اياق باسقالى «م-اگەنت، ۆكونتاكتە، فەيسبۋك، تۆيتتەر، ينستاگرام» ءبارىن ۇمىتتىم. عالامتورعا كىرۋدەن ءوزىمدى اۆتوماتتى تۇردە شەكتەدىم. اركىم ءوزى شەشەدى، ارينە. بىراق، ۋاقىتتى ءتيىمدى پايدالانۋ ءۇشىن بۇل ءتاسىل وتە ءتيىمدى. مەن وقيتىن مەكتەپ ماتەماتيكانى تەرەڭدەتىپ وقىتاتىندىقتان، ەسەپتەن قينالعان جوقپىن. قالعان ساباقتارعا تازا وقۋلىقپەن دايىندالدىم. وزگە دەرەك كوزدەرىنە جۇگىنىپ، باس اۋىرتۋدىڭ قاجەتى جوق. ويتكەنى، ۇبت-داعى بارلىق تاپسىرمالار مەكتەپ باعدارلاماسىنا نەگىزدەلگەن. ارنايى رەپەتيتورعا دا بارمادىم. قوسىمشا ساباقتى ءوزىمنىڭ ۇستازدارىمنان الدىم. ماعان كەلگەن نۇسقادا بۇرىن كەزدەسپەگەن سۇراقتار دا، لوگيكالىق تاپسىرمالار دا بولدى. ولارعا ويىمدى جيناقتاپ، سارالاي كەلە جاۋاپ بەردىم. ناتيجەدە، جاۋاپتارىمنىڭ ءبارى دۇرىس بولىپ، 125 بالدى ەنشىلەدىم. شپارگالكا قولدانبادىم. سەبەبى، كوشىرۋدىڭ ءوزىن كەلىستىرە المايمىن. قاسىمداعى تالاپكەرلەردىڭ نە ىستەپ وتىرعانىنا ءمان بەرەتىن ۋاقىتىم بولمادى. باسقالارعا الاڭدايمىن دەپ ۋاقىت جوعالتپاۋ كەرەك.

ءاسيا مارات: اۋديتوريادان شىققاندا، 125 سۇراقتىڭ جاۋابىن دۇرىس شەشكەنىمە سەنىمدى ەدىم. تەست كىلتتەرى شىعىپ، مەنىڭ ۇپايلارىمدى ەسەپتەگەندە 124 بولىپ قالدى. وسىلايشا قاي جاۋاپتىڭ قاتە بولعانىن ءبىلدىم. سويتسەم، قازاق تىلىنەن ءوزىم كۇماندانعان سۇراق ەكەن. تەست ورتالىعى ەكى دۇرىس جاۋاپ جازعان. وسىنى ايتقانىمدا، مەنىڭ جاۋابىمدى «قاناعاتتانارلىق» دەپ باعالاپ، ارتىنشا 1 ۇپايىمدى قوستى.

مەن 11 جىل بويى ۇزدىك وقىدىم. ساباقتى جاقسى وقىعانىمنىڭ ارقاسىندا وسىنداي ناتيجە كورسەتە الدىم. نەگىزى، ءار سىنىپتا جاقسى وقىپ، وقىعانىڭدى جادىڭا ساقتاي بىلسەڭ، تەست بارىسىندا ەش قيىندىق تۋىندامايدى.

ايعانىم دا، ءاسيا دا ناقتى قاي وقۋ ورنىنا قۇجات تاپسىراتىنىن ءالى شەشپەپتى. ەكەۋىنىڭ دە تاڭداۋ پاندەرى – گەوگرافيا. ءبىر انىعى ولار قازاقستاندا وقيدى.

اباي-اقپارات