«ۇلكەن جەتىلىك» باسشىلارى بريۋسسەلدە وتكەن سامميتتە، ۋكرايناعا قاتىستى ارەكەتتەرى ءۇشىن رەسەيگە جاڭا سانكتسيالار دايىن ەكەنى تۋرالى ەسكەرتپە ايتقان. G7 كوشباسشىلارى رەسەيدى  «ۋكراينا سۋۆەرەنيتەتىن بۇزۋدى جالعاستىرىپ كەلەدى» دەپ ايىپتايدى. بۇل تۋرالى BBC حابارلادى. بريۋسسەل ءسامميتى ماسكەۋدىڭ قىرىمدى اننەكتسيالاپ الىپ، سوچيدە جوسپارلانعان وتىرىس بولماي قالىپ،  G8 قاتارىنان رەسەي شىعارىلعاننان كەيىنگى الپاۋىت مەملەكەتتەردىڭ ءبىرىنشى كەزدەسۋى بولىپ تابىلادى.

سامميتتە گەرمانيا كانتسلەرى انگەلا مەركەل: ء"بىز ۋكرايناعا قولداۋ كورسەتەمىز جانە مىناداي وڭ قادام جاساۋ بويىنشا رەسەيمەن كەلىسسوزدەر جۇرگىزەمىز. ەگەر جاعداي وڭالماسا، وندا ەكونوميكالىق سانكتسيالار ەنگىزۋدىڭ ءۇشىنشى كەزەڭىن باستاۋ جايىن قاراستىرامىز. بۇل جاعداي كەلىسىلدى", - دەگەن. انگەلا مەركەلدىڭ سوزىنە قاراعاندا، نورمانديادا رەسەي پرەزيدەنتى ۆلاديمير پۋتينمەن كەزدەسۋگە قاتىسۋشىلار ءپۋتيندى ۋكراينانىڭ جاڭا پرەزيدەنتى پەتر پوروشەنكومەن ەلدەگى تۇراقتىلىقتى قامتاماسىز ەتۋدە ىنتىماقتاسا جۇمىس ىستەۋگە شاقىرماق. ودان وزگە G7 ەلدەرى رەسيدى باسقا دا قادامدار جاساۋعا ۇندەيدى. "سونىمەن قوسا، پۋتين ورىس-ۋكراين شەكاراسىنان ءوتىپ جاتقان سەپاراتيستتەر مەن قارۋ-جاراق لەگىن توقتاتۋعا اتسالىسۋى كەرەك", - دەپ مالىمدەدى انگەلا مەركەل.

سونىمەن قاتار پولشادا پەتر پورەشەنكومەن كەزدەسكەن اقش پرەزيدەنتى باراك وباما ۋكرايناعا 23 ميلليون دوللار كومەك قاراجاتىن بولەتىنى تۋرالى ايتقان.  بۇل كەزدەسۋدە سونداي-اق ۆاشينگتوننىڭ  قۇنى 5 ميلليون دوللار تۇراتىن بروندى جيلەتتەر مەن تۇندە كورەتىن اسپاپتاردى كيەۆكە بەرەتىنى تۋرالى حابارلاندى.

اباي-اقپارات