تۇركيا ساپارىنان جولجازبالار

تۇركياعا بارعان بويدا ەلدى مەكەننىڭ قايسىسىندا دا تۇرعىن ۇيلەر كوزگە ءبىرىنشى شالىنادى. قالارالىق تاسجولداردىڭ ەكى جاعى اندا-ساندا ۇزىلگەنى بولماسا، ەكى قاپتالىن الا سامساي جايعاسقان ۇيلەردەن كوز سۇرىنەدى. بىرقاتتى (قاباتتى وسماندىلار «قات» دەيدى، مۇنىسى ءبىزدىڭ «قاباتىمىزدان» گورى بارىنشا دۇرىس), قوسقاتتى، كوپقاتتى ۇيلەر بىرنەشە جوبامەن سالىنا بەرگەن، سالىنا بەرگەن.

ءارى-بەرىدەن سوڭ ۇيلەرگە قاراي بەرۋدەن جالىققانىمىزبەن، ويىمىزعا ەلدەگى باسپاناسىزدىق جايى ورالدى دا، تۇركيەنىڭ جايىن بىلەتىن كىسىلەردەن سۇراستىرعانىمىزدا بۇل حالىقتى باسپانامەن قامتۋدىڭ تۇركيەلىك نۇسقاسىنىڭ ناتيجەسى ەكەنىنە كوزىمىز جەتتى...

تۇرىك ساياساتى باستى قالالارعا عانا كوڭىل ءبولىپ، جىل ارالاتا سان قۇبىلاتىن قولجەتەر باسپانا باعدارلاماسىن ساياسي يدەولوگياعا اينالدىرۋدىڭ ورنىنا ەلدە جاپپاي تۇرعىنجاي تۇرعىزۋدى قولعا الىنعانى كورىنىپ تۇر. جاڭا ۇيلەر اۋىلدا دا، قالادا دا بىردەي سالىنعان. ناتيجەسىندە باس-اياعى ون جىل ىشىندە ماسەلە شەشىلگەن. ەندى جاس جانۇيالاردى ۇيمەن قامتۋ قولعا الىنىپتى. ول ءۇشىن حالىق اراسىندا «توكى» اتالاتىن، بىزشە كووپەراتيۆكە ۇقساس ارزان كوپقاتتى ۇيلەر سالىنا باستاۋدا. بۇنداعى پاتەرلەر جاستاردىڭ تابىسىنا سايكەس ءارى ارزان. ساپاسى ءبىزدىڭ استانادا سالىنىپ جاتقان مەملەكەتتىك باعدارلاما بويىنشا ەكونوم-كلاسس ۇيلەرىنەن جوعارى كورىنەدى.

جول جاعالاعان اۋىلدىق جاتاعان ۇيلەردىڭ توبەسىنە كۇن باتارەيالارى جايعاسقان، سول ارقىلى ىسسى سۋ مەن جىلۋدى تەگىن الىپ، شىعىندى ازايتىپ وتىر...

ەلدەگى باسپانا ماسەلەسىنىڭ شەشىلۋى پاتەر جالداۋعا دا اسەرىن تيگىزىپ ونى مەيلىنشە ارزانداتقان. ايتۋشىلارعا سەنسەك، انكارادا 40 000 تەڭگەگە ەكى بولمەلى پاتەر جالداپ تۇرۋ مۇمكىندىك بار ەكەن. ارينە، تەگىن جاتقان ەشتەڭە جوق، بۇل قاپتاعان پاتەر مەن ۇيلەردىڭ قۇنى اينالىپ كەلگەندە حالىقتىڭ قالتاسىنا «ۇڭىلەتىنى» راس. دەگەنمەن، يپوتەكالىق نەسيەگە ورتاشا وسمانلىنىڭ جالاقىسىنىڭ 30 پايىزى عانا جۇمسالادى ەكەن جانە ولاردا تەك قانا ەرى جۇمىس ىستەپ، كوبىنە ءبيبىسى ءۇي شارۋاسىندا وتىراتىنىن ەسكەرىڭىز... بۇعان تاعى دا اۆتوكولىكتى نەسيەگە العان تۇرىكتىڭ نەبارى 40-45 پايىز جالاقىسى نەسيەگە تولەنسە دە، وسمانلى باۋىرىمىز سونى دا كوپسىنەتىن كورىنەدى!  ارينە، بەنزين تىم قىمبات، ءليترى 300 تەڭگەنىڭ ماڭىندا. سوندىقتان دا تۇركيەلىكتەر «اشقاراق» كولىككە قۇمار ەمەس. دجيپ جوقتىڭ قاسى.

تۇرعىنجايمەن قامتۋدىڭ تۇركيەلىك نۇسقاسى باسپانانىڭ مەملەكەت تاراپىنان جاسالاتىن قامقورلىق نىشانى ەكەنىن ەرىكسىز بايقايسىڭ. 80 ميلليونعا جۋىق حالىقتى ۇيمەن قامتۋدىڭ ۇلگىسى سول بولسا كەرەك. 

سەرىك ابدىرەشۇلى

جولجازبانىڭ جالعاسى.

استانا – ىستامبول – ەسكىشەحير - استانا