قىتاي بيلىگى مىڭداعان قاۋىپسىزدىك پەرسونالدارىن اتتانىسقا كەلتىردى،-دەپ حابارلايدى «شانحاي دەيلي» (Shanghai Daily) وتىز ءبىرىنشى مامىرداعى اقپاراتىندا. «شانحاي دەيليگە» نەگىزدەلگەندە، تەرروريزم قاۋپىنەن ساقتانۋ دەگەن اتپەن بەيجىڭ مىڭداعان قاۋىپسىزدىك پەرسونالدارى مەن 850 مىڭنان ارتىق قاۋىپسىزدىك ۆولونتەرلار قوسىنىن اتتانىسقا كەلتىرگەن.

ۆولونتەرلاردان قۇرالعان «حالىقتىق كۇشتەر» قىتاي قاۋىپسىزدىك قىزمەتىنە  كومەكتەسەدى دەپ جازادى Beijing Youth Daily اقپاراتى.

كوشەدە اياق كيىم مايلايتىنداردان تارتىپ، گازەت ساتۋشىلار، اۆتو تۇراقتاردا جۇمىس ىستەيتىندەر، بيلەت ساتۋشىلار جانە قوناق ءۇي قىزمەتكەرلەرىنەن قۇرام تاپقان، جالپى سانى 100 مىڭنان اساتىن ەرىكتىلەر قوسىنى دا قىتايدىڭ قاۋىپسىزدىك سالاسىندا قىزمەت جاسايتىن ادامدارعا اقپارات بەرەدى جانە كەز-كەلگەن جاسىرىن قاۋىپ كەزىندە الدىن-الا حابارلايدى دەيدى اتالعان اقپارات كوزدەرى.

قالانىڭ بارلىق اۋماعىندا جابىلا جۇمىسقا كىرىسكەن، جالپى سانى ءبىر ميلليونعا جۋىق بۇل «قوسىن» اۋماقتىق باسشىلارىنىڭ نۇسقاۋى بويىنشا ارەكەت ەتەدى جانە ءوزارا بايلانىساتىن يكەمدى جەلى قۇرىپ، ءار قانداي كەزدە اقپاراتتاردى ءونىمدى جەتكىزەدى دەيدى.

بەيجىڭ قالاسىنىڭ وزىندە 192 جەردەن قۇرىلعان تەكسەرۋ ورىندارى قاتاڭ تەكسەرۋدى باستاپ كەتكەن. مەترودا جانە وزگە قوعامدىق كولىكتەردە «اۋەجاي ستيلىندەگى» قاۋىپسىزدىك تەكسەرۋلەرى قولعا الىنعان.

ال قالانىڭ قوعامدىق كولىك قىزمەتىنە قاۋىپسىزدىك قىزمەتكەرلەرى رەتىندە تاعى دا 1000 ادام جۇمىسقا تارتىلاتىن كورىنەدى. ال وسىعان دەيىن بەيجىڭنىڭ قوعامدىق كولىكتەرىندە 1002 قاۋىپسىزدىك قىزمەتكەرى جۇمىس ىستەپ كەلگەن-ءدى. وعان قوسا، اۆتوبۋس تۇراقتارىنىڭ كۇزەت قىزمەتكەرلەرىن 866-عا كوبەيتكەن.

قىتاي بيلىگى حالىقتىڭ تەرروريستەرمەن كۇرەسىنە ەكپىن بەرۋ ءۇشىن، بەيجىڭ قوعامدىق قاۋىپسىزدىك بيۋروسى جاڭا قولداۋ جۇيەسىن ىسكە قوسقان،-دەيدى «نيۋ-يورك تايمس». ەگەر كىمدە كىم تەرروريستەرگە قاتىستى ماڭىزدى قىلمىستى ارەكەتتى اشۋعا كومەكتەسسە، 40 000 يۋان (6400 امەريكا دوللارى) سياقى تولەيتىندىگىن جاريالاعان. وسىمەن ۇقساس ۋاقىتتا، لياونين پروۆينتسياسى دا كەلەر ايدىڭ باسىنان ءبىر جىلعا جالعاساتىن انتيتەرروريستىك وپەراتسيانى باستايتىندىعىن جاريالاعان.

قىتاي بيلىگىنىڭ مۇنشالىقتى قاتال جاعدايعا كەلۋىنىڭ سەبەبى جايىندا ساراپشىلار ءوز پىكىرلەرىن بىلدىرۋدە. قىتايدىڭ باتىس تەرىستىگىندەگى شىڭجاڭ اۆتونومياسىندا ارت-ارتىنان ورىن العان قاندى وقيعالاردان كەيىن، قىتاي ۇكىمەتى تەرروريستەرمەن كۇرەسۋدى شىنداپ قولعا الۋعا كىرىستى،-دەيدى كەيبىر ساراپشىلار.

ال قىتاي تاۋەلسىز جازۋشىسى دۋ گۋاندانىڭ قاراۋىنشا، قىتاي بيلىگى الدا كەلە جاتقان ء«تورتىنشى ماۋسىم وقيعاسىنىڭ» 25 جىلدىعىنان الاڭداپ وتىرعان كورىنەدى. 1989 جىلى قىتاي بيلىگى تيانانمەن الاڭىنداعى دەموكراتيالىق قوزعالىسقا قاتىسقانداردى قاندى قىرعىنعا ۇشىراتىپ، اسكەري كۇشپەن جانىشتاعان-دى.  بيلىك حالىقتىڭ ء«تورتىنشى ماۋسىم» وقيعاسىنا قاتىستى الدە قانداي شارالار وتكىزۋىنەن الاڭداپ وتىر دەيدى قىتاي جازۋشىسى. بىرنەشە اپتادان بەرى ء«تورتىنشى ماۋسىم» وقيعاسىنا بايلانىستى سەمينار ۇيىمداستىرعانداردى تەكسەرۋ جانە تۇتقىنداۋ ناۋقانى قاۋىرت جۇرگىزىلۋدە ەكەن. قازىرگە دەيىن وسى وقيعاعا قاتىستى جۋرناليست، پروفەسسور، حالىقارالىق زاڭگەر جانە ادام قۇقىعى بەلسەندىلەرىنەن جالپى ەلۋدەن ارتىق ادام تۇتقىندالعان. 

الايدا، بيلىككە ەڭ ۇلكەن ۇرەي ادام قۇقىعىن جاقتايتىن بەلسەندىلەر مەن ديسسيدەنتتەردەن كەلىپ وتىرعان جوق،-دەيدى ساراپشىلار. جاقىننان بەرى قىتايدا قاندى وقيعالاردىڭ تۋىلۋى جيىلەپ كەتتى. سول سەبەپتى دە قىتاي ۇكىمەتى بار كۇشىن انتيتەرروريستىك وپەراتسيالارعا شوعىرلاندىرۋدا. الايدا، سي تسينپين باسشىلىق ەتكەن قىتاي كوممۋنيستىك پارتياسى بۇل ماسەلەنى شەشۋدىڭ دۇرىس جولىن قاراستىرا المادى. سەبەبى، بۇل قاندى وقيعالار ۇلتارالىق قاتىناستاردىڭ وڭتايلى جولمەن شەشىلمەۋى جانە ۇلتارالىق تەڭسىزدىكتەن تۋىنداعان دەيدى. ونىڭ ۇستىنە، بيلىك پەن حالىق اراسىنداعى تۇسىنبەۋشىلىك تە نەگىزگى فاكتورلاردىڭ ءبىرى كورىنەدى. اسىرەسە، ەتنيكالىق قايشىلىقتاردىڭ ءورشۋى كىسى ولىمىمەن اياقتالاتىن قاقتىعىستاردىڭ ەڭ نەگىزگى سەبەبى دەيدى ساراپشىلار. 

«شانحاي دەيلي» اقپاراتى مەن «نيۋ-يورك تايمس» گازەتىنىڭ ماقالالارىنا شولۋ جاساعان تالعار دالەلعازى

دەرەككوزى:http://www.shanghaidaily.com/national/Volunteer-force-to-help-fight-terror-in-Beijing/shdaily.shtml

Abai.kz