ەۋرازيالىق ەكونوميكالىق وداق اياسىندا بىرىڭعاي ازاماتتىق بولمايدى. بۇل پۋنكت وداق شارتىنان الىنىپ تاستالعان. قر سىرتقى ىستەر ءمينيسترىنىڭ ورىنباسارى  سامات ورداباەۆ  كەشە وسىلاي دەپ سەندىردى.  ونىڭ ايتۋىنشا جىلدىڭ باستى قۇجاتىنا قول قويىلار الدىندا ءۇش ەلدىڭ ساراپشىلارى ەكى مىڭعا جۋىق بەتتەن تۇراتىن قۇجاتتى ۇقىپتى زەردەلەپ، تالاس تۋدىراتىن ماسەلەلەردى شەشكەن. جاۋاپتى ساراپشىلار قۇجات دايىندالۋ بارىسىندا ءار مەملەكەتتىڭ ۇلتتىق قۇندىلىقتارى ايرىقشا ەسكەرىلگەنىن ايتىپ وتىر.

مينيستر ءوز سوزىندە اۋەلدەن ونداي سۇراقتى قوسۋ ماسەلەسى تالقىلانعانىن ايتا كەلىپ: «تاراپتار كەلىسىمى بويىنشا  ساياسي ارىپتەستىك رەتىندە جالپى ازاماتتىق، كوشى-قون ساياساتى، ۆيزا ماسەلەسى، قاۋىپسىزدىك ماسەلەسى رەگلامەنتتەرى ساقتالادى. بارلىق كۇماندى جانە تالاس تۋدىراتىن ماسەلەلەر ەكونوميكالىق وداق  قۇجات شارتتارىنان الىنىپ تاستالدى. قازاقستان  بيلىگى سىرتقى ساياساتى مەن مەملەكەتتىك قاۋىپسىزدىگىن قورعاۋ ماسەلەلەرىن ەۋرازيالىق ەكونوميكالىق وداقپەن كەڭەسپەي، ءوزى شەشەدى»، - دەدى.

بەيسەنبى، 29 مامىردا استانا قالاسىندا ەۋرازيالىق ەكونوميكالىق وداقتىڭ قۇرىلۋىنا قول قويىلماق. پۋتين جاقىندا  ەۋرازيالىق وداقتى سسسر-مەن سالىستىرماۋدى سۇراپ، بۇل وداق تەك ەكونوميكالىق وداق بولاتىنىن، ساياسي قاتىناستارعا اسەر ەتپەيتىنىن ايتقان بولاتىن.

نۇرعالي نۇرتاي

Abai.kz