قۇرتتىڭ، ماماي، قور قىلدىڭ!
«اشىق الاڭ - تريبۋنا» وپپوزيتسيالىق گازەتىنىڭ سوڭعى سانىندا ساكەن ءجۇنىسوۆ دەگەن بىرەۋدىڭ «ورىس ءتىلى ەكىنشى مەملەكەتتىك ءتىل بولۋى كەرەك!» دەگەن ماقالاسى جارىق كورگەن. بۇل تۋرالى اۋەلى سەرىك ساپارعالي فەيسبۋكتەگى پاراقشاسىنا اتالعان گازەتتىڭ شىعارۋشىلارى، قوعامدىق بەلسەندىلەر: جانبولات ماماي مەن ينگا يمانبايعا قاراتا: «ءتىل ماسەلەسى، ۋكراينادا كورگەندەي، تاۋەلسىزدىكپەن پارا-پار ماسەلە! سوندىقتان، ساتقىن، اقىماق جۇنىسوۆكە تريبۋنا بەرگەندەرىڭ سەندەردىڭ دە ساتقىندىقتارىڭ، جانبولات -ينگا! الدە بۇل ءابىلازوۆشىلاردىڭ نۇسقاۋى ما؟» دەپ باتىرا جازدى.
مۇنداي ماسقارانى كورە تۇرىپ شىداي الماعان «قازاق ءۇنى» گازەتىنىڭ قۇرىلتايشىسى، اقىن قازىبەك يسا دا جانبولاتتارعا اركىمنىڭ قولجاۋلىعىنا اينالىپ، ارانداتۋمەن اينالىسۋدى توقتاتىڭدار دەپتى:
«قاراپايىم تىلمەن قازاقشا ايتقاندا، ورىس تىلىنە مەملەكەتتىك ءتىل ستاتۋسىن سۇراۋ – قازاق تىلىنە قارسىلىق بولىپ تابىلادى. قازاق تىلىنە قارسىلار – قازاققا قارسىلار! مەملەكەتتىك تىلگە – مەملەكەتتىك مۇددەگە قارسىلىق! ەندەشە، بۇل «اشىق الاڭ» («تريبۋنا») گازەتىنىڭ الدەكىمنىڭ ورىس تىلىنە – مەملەكەتتىك ءتىل ستاتۋسىن سۇراۋىن جاريالاۋى – ەل تىنىشتىعىن شايقاۋعا ارنالعان اشىق ارانداتۋ! قوجايىندارىنىڭ قولجاۋلىعىنا اينالعان جانبولات پەن ينگا قازاق حالقىنىڭ الدىندا جاۋاپ بەرىپ، رەسمي كەشىرىم سۇراسىن!»
شىنىمەن دە، «ورىس ءتىلى ەكىنشى مەملەكەتتىك ءتىل بولۋى كەرەك! قازاقستانداعى 130 ۇلتتىڭ دا تىلىنە رەسمي مارتەبە بەرۋ كەرەك» دەگەن دۇشپانىڭ ايتپايتىن سۇمدىق سۋىق ءسوزدى قاعىنان جەرىگەن ساكەن ءجۇنىسوۆ دەيتىنگە ايتقىزىپ، ونى جاريالاپ وتىرعان گازەتتىڭ كوكسەگەنى نە؟
سوندا «ەلىم دەگەندە ەتەگى جاسقا تولىپ، حالقىم دەگەندە قابىرعاسى قايىسقان» ءتۇر تانىتىپ جۇرگەن جانبولات مامايدىڭ بەتپەردەسىنىڭ ار جاعىنان كىمنىڭ شىنايى بەينەسى كورىنىپ تۇر؟
جانبولات ماماي كىم ەدى؟
و باستا «رۋح پەن ءتىل» دەگەن ۇيىم قۇرىپ، سونىڭ توڭىرەگىنە توپتاسقان ءبىراز قىز-جىگىتتەردىڭ ورتاسىندا، وپپوزيتسيالىق توپتار مەن ۇيىمداردىڭ اراسىندا جۇرگەن جاس تالاپكەر ەدى. اقىرى، مىنە، ساكەن ءجۇنىسوۆتىڭ «ورىس ءتىلى ەكىنشى مەملەكەتتىك ءتىل بولۋى كەرەك!» اتتى ماقالاسىن گازەتىنە باسىپ، مەملەكەتتىكتىڭ تۇتاستىعىنا قاۋىپ توندىرەتىن جانە رەسەيشىل كۇشتەردىڭ «كوكتەن ىزدەگەنىن، جەردەن تابۋعا» جاردەمدەسەتىن وتە قاۋىپتى قادامعا باردى.
دەمەك، جانبولاتتىڭ قازاق دەسە، جانى شىعىپ كەتە جازدايتىنى وتىرىك بولسا كەرەك. شىن ۇلتشىل، مەملەكەتشىل ادام مۇنداي ارانداتۋشى ءھام مەملەكەت پەن قوعامعا زور قاۋىپ اكەلەتىن دۇشپاندىق ارەكەتكە بارمايدى.
ايتپاقشى، جانبولات مامايدىڭ رەسەيلىك الدەبىر پوتكين دەيتىن ارانداتۋشى-الاياقپەن بايلانىسى بار دەگەن ءسوز شىققان. ىلە ساكەن ءجۇنىسوۆ سەكىلدى ماڭگۇرتتىڭ ماقالاسىن جاريا ەتىپ وتىر... بۇدان سوڭ، ارينە، ماماي پوتكيننىڭ تاپسىرماسىن ورىنداۋعا شىنداپ كىرىسكەنگە ۇقسايدى دەپ كىم بولسادا بايلام جاسارى انىق. قايتكەندەدە «ورىس ءتىلى ەكىنشى مەملەكەتتىك ءتىل بولۋى كەرەك!» دەگەن سىڭارجاق ماقالا «ۇلتشىل» ازامات جانبولاتتىڭ گازەتىندە جارىق كورمەۋى ءتيىس-تۇعىن. قۇرتتىڭ، ماماي، گازەتىڭدى قور قىلدىڭ!
Abai.kz
