ەلباسى ۇنەم تۋرالى ايتىپ ەدى، ەلدىڭ ءبارى وسى كۇنى ۇنەم ماسەلەسىنە ۇدەرە كوشۋگە كىدىرىسسىز كىرىسىپ كەتتى. اندا دا – ۇنەم، مىندا دا – ۇنەم. قىردا دا – ۇنەم، ويدا دا – ۇنەم. ءبىزدىڭ ناۋقانشىل قوعامعا وسىنداي بىردەڭەنى ويلاپ تاۋىپ بەرىپ وتىرماساڭ  بولمايدى. ۇنەم، ارينە، ۇيرەنەتىن نارسە. بەك جاقسى ءىس. بىراق وسى ۇنەمنىڭ «ۇيدەي پالەسىن» كورەتىن قاراپايىم حالىق، قاتارداعى بيۋدجەت قىزمەتكەرلەرى بولادى دا، پايداسىنا ءۇنسىز كەنەلەتىن سول باياعى جۋان ءىشىپ، نىقتاپ تىشاتىن باي-باعىلاندار بولاتىنى ءسوزسسىز. سەبەبى ولار –(ناقتىلاي ايتقاندا، بيلىكتىڭ مايلى جىلىگىن ۇستاعان ازعانا توپ) الاقانىنا تۇسكەن ازىن-اۋلاقتى (قۇرتتى، ىرىمشىكتى، ت.ب.) سىعىپ بەرەتىن ساراڭ قاتىننىڭ ادەتىن ۇستانعان بيلىكتىڭ بۇقاراعا بەيىلسىزدىگىنەن كۇن كورىپ كەلە جاتىر ەمەس پە؟ انىقتاي ايتساق، جەتەر جەرىنە جەتپەي جەلكەسى قيىلاتىن قارجى - الاياق الپاۋىتتاردىڭ جەمساۋىن تولتىراتىن جەم. سوندىقتان ۇنەم – ۇندەمەيتىن حالىق ءۇشىن عانا – ۇنەم. ال، مەملەكەت قازىناسىن ۇپتەۋدى مەملەكەتتىڭ ءومىر ءسۇرۋ سالتىنا اينالدىرعان جەمقورلىق جۇيە ءۇشىن ۇنەم – كەزەكتى رەت قارپۋ مەن  شومىشتەن قىسا ءتۇسۋدىڭ امالى عانا سياقتى. «لايىم مەن قاتەلەسەيىن»، «لايىم مەنىڭ دەگەنىم-اق بولماي-اق قويسىن»، - دەپ قارعانىپ-سىلەنىپ سويلەيتىن بيلىككە جاقىن، بيشىكەش ءبىر اعامىز بار، سول كىسى ايتپاقشى: مەن-اق قاتەلەسەيىن. ۇنەمشىلدىككە ۇلكەن-كىشىمىز، بۇقارا-بيلىگىمىز بۇتىندەي ءۇيىر بولايىق تا قارجى داعدارىسىنان قابىرعامىزدى الدىرماي امان-ەسەن شىعايىق. پايعامبارىمىز مۇحاممەد (س.ع.س) تە  ىسىراپشىلدىقتىڭ اللاعا ۇنامايتىنىن ەسكەرتەدى.  الايدا، پايعامباردىڭ ۇمبەتىنە تەگىس ۇنەمشىلدىك ءناسىپ ەتىلمەپتى. بىرەۋ باي، بىرەۋ كەدەي. ال، بايدا مەيىر، جالشىدا پەيىل دە جوق، اڭداستىرعان ەكەۋىن قۇدايىم-اي! (اباي). تەگىندە، كەدەيدىڭ  پەيىلسىزدىگى بايدىڭ اسىپ-تاسۋىنا قاراي اسقىنادى. ءبىزدىڭ اڭگىمەمىزگە وراي بولاتىن ءبىر مىسال، مىنە،  وسىدان شىققالى تۇر.

دۇنيەنى قۇرساۋلاپ العان دۇنيەجۇزىلىك قارجى داعدارىسىنىڭ سالدارىنان الداعى جىلدارى الەمدە اسا ءىرى بايلاردىڭ قاتارى ازايۋى ىقتيمال دەيتىن بولجامدار بار. اقش-تا اسا ءىرى الپاۋىتتاردىڭ تابىسىنا سالىق تۇرلەرى ارتپاق. دامىعان باتىس ەلدەرىندە شارۋاشىلىق سۋبەكتىلەرى مەن ءۇي شارۋاشىلىقتارىن نەسيلەندىرۋ ماسەلەسى قايتا قارالماق. ال، بىزدە... جاڭا قۇرىلىس اتاۋلى توقتايدى. بۇ كۇنگە دەيىن بوي كوتەرگەن تۇرعىن ۇيلەردى يگەرىپ پايدالاناساق تا جەتەدى، جاڭا قۇرىلىس جايلى ەندى جاق اشۋدىڭ ءوزى ارتىق. بۇنى ەلباسىنىڭ ءوزى ەسكەرتتى. ەسەسىنە، ميللياردتاپ قارجى قۇيىلاتىن ەكسپو-2017 ءۇشىن تيىن ۇنەمدەدۋدىڭ قاجەتى بولمايتىنعا ۇقسايدى. ءتىپتى ونى ءسان-سالتاناتپەن وتكزۋدىڭ قامى دا قازىردەن قۇمبىل ويلاستىرىلۋدا. ماسەلەنكي، كوممۋنيست-دەپۋتات جامبىل احمەتبەكوۆ (سۋرەتتە)ەكسپو-نى ەلدەن ۇيالماي وتكىزۋ ءۇشىن استانانىڭ ابات كەلبەتىنە الباستىداي نۇقسان كەلتىرىپ جۇرگەن قاڭعىباس تىلەنشىلەردى (بومجداردى) قۋ كەرەك دەپ ۇسىنىس تاستادى.

-      بومجدار ءبىزدىڭ قوعامنىڭ اۋرۋىنا اينالدى! ولار استانامىزدىڭ  كەلبەتىن بۇزىپ جاتىر! جاقىندا ەكسپو-2017 وتەدى، وعان شەتەلدىك تۋريستەر كەلەدى. سوندا ءبىزدىڭ ۇيسىزدەر قايىر سۇراپ جۇرسە، تۋريستەردىڭ ساناسىندا ءبىزدىڭ گۇلدەنگەن ەل تۋرالى قانداي وي قالىپتاسادى؟ مىنە، مىنالارىڭ ەكسپو وتكىزىپ جاتىر، ال  حالقى كەدەيلەنىپ, ءۇيسىز ءجۇر دەمەي  مە؟ بۇعان جول بەرۋگە بولمايدى! – دەپ كىجىندى پرولەتارياتتار مەن ەزىلگەن جۇرتتىڭ جوقتاۋشىسى بولىپ 70 جىل جەلكەمىزدە وتىرعان بۇرىنعى قىزىل وكىمەتتىڭ بۇگىنگى وكىلى.

«...ءوز حالقى كەدەيلەنىپ، ءۇيسىز ءجۇر دەمەي  مە؟»

ءاي، دەگەنمەن كوممۋنيست-دەپۋتاتتىڭ ءىشى ءبىر نارسەنى سەزىپ ايتاتىن سياقتى.

ءيا، ەكسپو كەلە جاتىر. وعان دەيىن ۇيسىزدەردى، جۇمىسسىزداردى، كاسىپ-قارەكەتىنەن قاعىلعانداردى، قاڭعىباستاردى قايدا جىبەرسەك بولادى ەكەن؟

داۋرەن قۋات.

Abai.kz