تالدىقورعان قالاسىنىڭ اكىمى ەرمەك الپىسوۆ، وبلىس ورتالىعىنىڭ ارداگەرلەر كەڭەسىنىڭ توراعاسى مۇرات قالىق جانە «نۇر وتان» پارتياسىنىڭ قالالىق فيليالى توراعاسىنىڭ ءبىرىنشى ورىنباسارى ءاسيا احمەتوۆا ونشاقتى ۇلى وتان سوعىسى ارداگەرىن ۇيلەرىنە بارىپ قۇتتىقتادى. 

قالا باسشىسى مايدانگەرلەردى ەلباسى اتىنان قۇتتىقتاپ، ولارعا ارنايى سىيلىقتار تابىس ەتتى. ءاربىر ارداگەر مەملەكەت باسشىسى نۇرسۇلتان نازارباەۆتىڭ اتىنان قۇتتىقتاۋ حات پەن ەستەلىك سىيلىقتارعا يە بولدى.

ۇلت كوشباسشىسىنىڭ العاشقى قۇتتىقتاۋىن 1941-1942 سوعىس جىلدارى اقساۋ اۋدانىنداعى ماتاي ستانساسى تەمىرجولىندا ەڭبەك ەتىپ جۇرگەن جەرىنەن سۇراپىلعا اتتانىپ، ستالينگراد شايقاسىنا قاتىسقان التىناي ەسبولات الدى. ول مايدانگەرلەرگە كورسەتىلىپ جاتقان بۇل قۇرمەتكە زور العىسىن ءبىلدىردى. 
سونداي-اق قالا اكىمى تىنىق مۇحيت فلوتىندا تەڭىز جاياۋ اسكەرى قۇرامىندا 13 گۆارديالىق بريگادا قۇرامىندا شايقاسقا قاتىسقان الەكساندر چەرنىحتى دا قۇتتىقتادى. ال ۋكراينا مايدانىنا قاتىسقان جاپار ورازالينوۆ جيتومير، ۆەليكيە لۋكي، بەرديچەۆ ءتارىزدى قالالاردى ازات ەتۋ جولىنداعى قاندى شايقاستار تۋرالى اڭگىمەلەپ بەردى. 
قيىن-قىستاۋ سوعىس جىلدارى جايلى باسقا دا ارداگەرلەر سىر شەرتتى. 
- بۇگىنگى تاڭدا تالدىقورعاندا 96 سوعىس ارداگەرى تۇرادى. كەلەسى جىلى ءبىز ۇلى جەڭىستىڭ 70 جىلدىعىن اتاپ وتەمىز، بۇل ايتۋلى مەرەيتويدى اتاپ ءوتۋ شارالارىنىڭ جوسپارىن قابىلداپ تا قويدىق، - دەدى قالا اكىمى. 
ەستەرىڭىزگە سالا كەتەيىك، جاڭا جىل قارساڭىندا، 26 جەلتوقسان مەن 30 جەلتوقسان ارالىعىندا قازاقستان پرەزيدەنتىنىڭ بۇكىل ەلىمىز بويىنشا ۇلى وتان سوعىسىنىڭ ارداگەرلەرىن قولداۋ جونىندەگى جالپىۇلتتىق بىرەگەي اكتسياسى وتۋدە. ونىڭ اياسىندا رەسپۋبليكادا تۇراتىن 5115 سوعىس ارداگەرىنىڭ ارقايسىسىنا وبلىس، قالا جانە اۋدان اكىمدەرى ارنايى بارىپ قۇتتىقتاپ، مەملەكەت باسشىسى اتىنان جاڭاجىلدىق سىيلىقتار جيىنتىعىن تاپسىرۋدا.

اباي-اقپارات.

(ماقالا «قازاقپارات» حاا دەرەكتەرى نەگىزىندە ازىرلەندى).