الماتى قالاسى ىشكى ساياسات باسقارماسىنىڭ الماتى قالاسىندا ۇكىمەتتىك ەمەس ۇيىمدارمەن الەۋمەتتىك ماڭىزى بار جوبالاردى جۇزەگە اسىرۋ بويىنشا تاپسىرىسى اياسىنداعى تىكەلەي قولداۋىمەن «جەرۇيىق» قوعامدىق بىرلەستىگى «الاتاۋ» كونتسەرت زالىندا 9 جەلتوقساندا، كەشكى ساعات 17.00-دە باستالاتىن «قاسيەتتىم - جەلتوقسان!» اتتى كونتسەرتكە شاقىرادى.

كونتسەرتتە 1986 جىلعى جەلتوقساندا الاڭدا شىرقالعان اندەرمەن قاتار، جەلتوقساندى جىرلاعان شىعارمالار  جانە دە ەل تاۋەلسىزدىگىن تولعايتىن وتانشىلدىق رۋحتاعى اندەر ورىندالادى.

اتالعان جوبا اياسىنداعى «جەرۇيىق» قوعامدىق بىرلەستىگىنىڭ باستى ماقساتى - 1986 جىلعى جەلتوقسان وقيعاسى تاقىرىبىندا جارىق كورگەن مۋزىكالىق شىعارمالار مەن اندەردى ناسيحاتتاۋ. بۇل - 1986 جىلعى جەلتوقسان وقيعاسى تاقىرىبىنداعى اندەرگە ارنالعان كونتسەرت تۇڭعىش رەت ۇيىمداستىرىلىپ وتىر.

كونتسەرتتە كەزىندە جەلتوقسان الاڭىندا شىرقالعان «اتامەكەن» انىنەن باستاپ، وقيعادان كەيىنگى ۋاقىتتا شىققان «جەلتوقسان  تاعىلىمى»، «جەلتوقسان  جەلى»، «بوستاندىقتىڭ  بويتۇمارى  جەلتوقسان»، «قارا  باۋىر قاسقالداق»، «جەلتوقسان مارشى»، «جەلتوقسان جاستارى مارشى» جانە «قايسار قازاق» سىندى جەلتوقسان تاقىرىبىنا ارنالعان اندەر ورىندالادى.

  جەلتوقسان اندەرى - ازاتتىق، وتانشىلدىق، ۇلتتى ءسۇيۋ سەكىلدى كيەلى ۇعىمداردىڭ سۇبەلى جالعاسى ىسپەتتى - قازاق حالقىنىڭ، ازاتتىق سۇيگىش بارشا ادامزات بالاسىنىڭ ەركىندىككە ۇمتىلعان اڭسارىنا دەگەن ەسكەرتكىش سەكىلدى. بۇل مۋزىكالىق شىعارمالار - 1986 جىلعى جەلتوقساندا بۇلقىنعان جاستاردىڭ جۇرەك قاعىسى، سوناۋ ازاتشىل ۇلىق باستامانىڭ جالعاستىرۋشىسى، جاناشىر جىلناماشىسى.

اسىرەسە، بۇگىنگى جاس ۇرپاقپەن قاتار، جەلتوقسان وقيعاسىن جۇرەگىنەن وتكىزگەن قايسار ۇل-قىزدارىمىز ءۇشىن بۇل كونتسەرت ۇلكەن تاعىلىم بولماق. جەلتوقساننىڭ رۋحتى اندەرى كىم-كىمدى دە ويعا جەتەلەيدى، نامىسىن وياتادى، جىگەرىن جانيدى.

    كونتسەرتكە بەلگىلى انشىلەر نۇرعالي ءنۇسىپجانوۆ، باعدات سامەدينوۆا، مۇراتبەك سارباسوۆ، قۇدايبەرگەن بەكىش، قۇرمانبەك پەن ريزا الىمعازى، ءادىل سلامحان مەن دانا، ءبىرجان حاسانعاليەۆ، ءاليا ابىلقايىر، ارتۇر ىزتىلەۋوۆ جانە دە «الاشۇلى»، «اعايىندىلار»، «ساعىم» مەن «دارا» توپتارى سىندى ت.ب. ونەر جۇلدىزدارى قاتىساتىن بولادى. كونتسەرتكە كىرۋ تەگىن، جەلتوقسان اندەرىن تاماشالايمىن دەۋشىلەرگە ەسىك اشىق.  

 وتەتىن جەرى:

«الاتاۋ» كونتسەرت زالى 

وتەتىن ۋاقىتى:

9 جەلتوقسان، كەشكى ساعات 17.00

Abai.kz