الەمدىك دەڭگەيدەگى كوللەدج اشۋعا تالپىنىس جاساپ جاتقان ءبىلىم سالاسى شەنەۋنىكتەرىنىڭ ارەكەتى ءماجىلىس توراعاسىنىڭ ورىنباسارى داريعا نازارباەۆا تاراپىنان سىنعا ۇشىراعان بولاتىن. ەلدەگى ء«ۇشىنشى» ادامىنىڭ «وڭ قولى» قىزدى-قىزدىمەن بۇل يدەيانى «كولحوزبايلىق» پەن «مامبەتيزم» دەپ سالعان-دى...

بۇگىن ءبىلىم جانە عىلىم ءمينيسترى اسلان ءسارىنجىپوۆ ايتىلعان سوزگە قاتىستى پىكىرىن ءبىلدىردى. ءمينيستردىڭ ويىنشا، الەمدىك دەڭگەيدەگى كوللەدج اشۋ يدەياسى جوق جەردەن پايدا بولماعان.

«بۇل باستامانى كانادالىق ماماندارمەن بىرلەسىپ قولعا العانبىز. جوبا بويىنشا ەلىمىزدە ءساتتى باستالعان نازارباەۆ ۋنيۆەرسيتەتى، نازارباەۆ ينتەللەكتۋالدى مەكتەپتەرى سياقتى جاھاندىق جۇيەدە ءبىلىم بەرەتىن وقۋ ورىندارى قۇرىلادى. ال، سىننىڭ ايتىلۋى ورىندى، ءبىز كەز-كەلگەن سىنعا كونسترۋكتيۆتى قارايمىز» - دەگەن ءسارىنجىپوۆ ءوز باستامالارىن اياعىنا دەيىن قورعاۋعا ءازىر ەكەندىگىن دە ايتتى.

ايتپاقشى، ول نازارباەۆانىڭ اۋزىنان شىققان «كولحوزبايلىق»، «مامبەتيزم» سەكىلدى سوزدەرگە قاتىستى پىكىر ايتپاي، «no comments» دەدى...

Abai.kz