28-قاراشا كۇنى ەلوردا تورىندە III حالىقارالىق «دالا داۋىسى» راديوفەستيۆالى وتەدى. قازاق راديوسىنىڭ مۇرىندىق بولۋىمەن  وسىمەن ءۇشىنشى رەت وتكىزىلىپ وتىرعان قازاقتىڭ ءداستۇرلى جانە زاماناۋي اندەرىن اسقاقتاتاتىن بۇل ءان بايقاۋىندا ء«داستۇرلى ءان»، «اكادەميالىق ورىنداۋشى»، «ەسترادا»، «ەتنو ەسترادا»، «جاڭا ەسىمدەرى» اتالىمدارى بويىنشا باق سىناپ، جەڭىمپاز اتانعان ورىنداۋشىلار سالتاناتتى تۇردە ماراپاتتالادى.  

ء«اۋ» دەمەيتىن قازاق جوق. كەزىندە اسەم داۋىسىمەن قازاقتىڭ ءداستۇرلى ءانىن شىرقاپ، ونى الەمگە مويىنداتقان امىرە قاشاۋباەۆ، قالي بايجانوۆ، ماناربەك ەرجانوۆ، كۇلاش بايسەيىتوۆا، جۇسىپبەك ەلەبەكوۆ، دانەش راقىشەۆ، قايرات بايبوسىنوۆ، ەركىن شۇكىمانوۆ، جولامان قۇجىمانوۆ، جامال وماروۆا سىندى كۇمىس كومەي انشىلەرىنىڭ سالىپ كەتكەن سارا جولىن ۇزبەي، قازاقتىڭ ءان ونەرىنىڭ الەۋەتىن اسقاقتاتۋ ماقساتىندا 2012 جىلى قازاق راديوسىنىڭ باستاماسىمەن «دالا داۋىسى» جوباسى اشىلدى. بۇل – قازاق مۋزىكاسى ارقىلى انا ءتىلىمىزدى الەم حالىقتارىنىڭ اراسىندا بارىنشا ناسيحاتتايتىن ەلىمىزدەگى ءبىرىنشى ءارى، جالعىز راديوفەستيۆال. باستى تالاپ - فەستيۆالعا قاتىسۋشىلاردىڭ، ءتىپتى ول شەت ەلدىك ۇمىتكەرلەر بولسا دا، قازاق ءانىن ناقىشىنا كەلتىرىپ ورىنداۋ. سول سەبەپتى دە وسى از عانا ۋاقىت ىشىندە بۇل جوبا راديوفەستيۆال شەڭبەرىنەن اسىپ، بەدەلدى مۋزىكالىق شەرۋگە اينالىپ وتىر.

كاسىبي ورىنداۋشىلار اراسىندا اتالمىش شارانىڭ جىلدان-جىلعا  بەدەلى ءوسىپ، شەت ەلدىك ورىنداۋشىلاردىڭ قىزىعۋشىلىعىن ارتتىرۋدا. وتكەن جىلى «دالا داۋىسى» روديوفەستيۆالىنە قاتىسۋعا وتاندىق انشىلەرمەن قوسا، رەسەي، تۇركيا، قىتاي، مانعوليا جانە قىرعىزستاننان دا ۇمىتكەرلەر نيەت بىلدىرگەن بولاتىن.

ال بيىلعى جىلى ءوتىنىش قىتاي، رەسەي، ۋكراينا، بەلورۋسيا، تاتارستان، قىرعىزستان، لاتۆيالىق ورىنداۋشىلاردان دا كەلىپ ءتۇستى. «دالا داۋىسىنىڭ» ىرىكتەۋ تۋرىنان وتكەن ءاربىر شىعارما بىرنەشە ميلليونداعان تىڭدارمانعا قازاق راديوسىنىڭ ەفيرى مەن عالامتور ارقىلى تارادى. وسىلايشا حالىقتىڭ كوڭىلىنەن شىعىپ، 100%  داۋىس جيناعان ۇزدىك ورىنداۋشى بايقاۋ فينالىنا جولداما الدى. ال، اقتىق سايىستا «دالا داۋىسى»  سىيلىعىنىڭ يەگەرلەرى 40% تىڭدارماننىڭ داۋىس بەرۋىمەن، 40% مامانداردىڭ ساراپتاۋىمەن، 20% جوبا ۇيىمداستىرۋشىلارىنىڭ ۇسىنىسى بويىنشا انىقتالادى. ولاردىڭ ەسىمدەرى III حالىقارالىق «دالا داۋىسى» راديوفەستيۆالىنىڭ گالا-كونتسەرتىندە جاريالانىپ، سالتاناتتى تۇردە ارنايى ديپلوم جانە «دالا داۋىسىنىڭ» ەكسكليۋزيۆتى ستاتۋەتكاسىمەن ماراپاتتالادى.

ەندەشە  «دالا داۋىسى - 2014» حالىقارالىق راديوفەستيۆالىندە كىمدەر ۇزدىك ورىنداۋشى بولىپ تابىلادى. ءدۇبىرلى ونەر دوداسىندا كىمدەردىڭ باعى شاباتىنىن انىقتايتىن ساتتە جاقىن.