«تۇرعىن ءۇي قۇرىلىس جيناق بانكى» جانىنداعى قوعامدىق كەڭەستىڭ ارالاسۋىنان كەيىن پاۆلودار قالاسىنداعى قۇرىلىسى اياقتالماعان ءۇيدىڭ ماسەلەسى وڭ باعىتتا شەشىلدى.

قازىرگى تاڭدا باسپانا كەزەگىندە تۇرعان 96 وتباسى پاتەر كىلتتەرىنە يە بولىپ، قونىس تويىن تويلاۋدا. قالانىڭ 1 - شاعىن اۋدانىننان بوي كوتەرگەن بۇل تۇرعىن ءۇيدىڭ قۇرىلىسىن اياقتاۋ مەرزىمى كەيىنگە شەگەرىلىپ كەلگەنىنە جىلعا جاقىنداعان ەدى. سالىمشىلاردىڭ بانك تاراپىنا جولداعان شاعىمدارىنان كەيىن ماسەلەگە قوعامدىق كەڭەس ارالاسىپ، ءتيىستى شارالاردى قولعا العان بولاتىن. اتقارۋشى بيلىك تاراپىنان بەرىلگەن ۋادەگە سايكەس، ەندى باسپانا تولىق پايدالانۋعا بەرىلدى.

قوعامدىق كەڭەس انىقتاعانداي، تۇرعىن ءۇي قۇرىلىسىنىڭ مەرزىمىندە اياقتالماۋىنا باس مەردىگەردىڭ ماتەريالدىق-تەحنيكالىق بازاسىنىڭ السىزدىگى مەن كاسىبي قۇرىلىسشى مامانداردىڭ جەتىسپەۋشىلىگى سەبەپ بولعان ەكەن. سول سەبەپتەن، جەرگىلىكتى اكىمدىك قۇرلىستى توقتاتىپ، قايتالاپ تەندەر جاريالاۋعا ءماجبۇر بولعان. وسىدان كەيىن بارىپ قانا قۇرىلىس جۇمىستارى قىزىپ، ناتيجەسىندە سالىمشىلار ءوز باسپانالارىنا قول جەتكىزىپ وتىر.

سونداي-اق، بۇل كۇندەرى تاعى دا 205 پاۆلودارلىق تۇرعىندار جاڭا ۇيگە قول جەتكىزدى. ولار قالانىڭ 3- شاعىن اۋدانىنان بوي كوتەرگەن توعىز قاباتتى ءزاۋلىم نىساننىڭ العاشقى قونىستانۋشىلارى اتاندى. تۇرعىنداردىڭ قونىس تويىنىڭ العاشقى قوناعى رەتىندە قۋانىشىن بولىسۋگە كەلگەن  پاۆلودار وبلىسىنىڭ اكىمى قانات بوزىمباەۆ پەن «تۇرعىن ءۇي قۇرىلىس جيناق بانكى» اق باسقارما توراعاسىنىڭ ورىنباسارى ەربول قاراشوكەەۆ پاتەر يەلەرىنە كىلت تاپسىردى.

ال، جاقىن كۇندەرى وسى قالانىڭ تولستوي كوشەسىندە دە قۋانىشتى شارا وتپەك. «قول جەتىمدى باسپانا - 2020» باعدارلاماسى اياسىندا سالىنىپ جاتقان تاعى ءبىر تۇرعىن ءۇي قۇرىلىسى اياقتالىپ، 180 پاتەر پايدالانىلۋعا بەرىلمەك.

جالپى، مەملەكەتتىك باعدارلاما جۇزەگە اسىرىلا باستاعان كەزەڭنەن بەرى پاۆلودار وبلىسىندا 477 پاتەرلىك 6 تۇرعىن ءۇي سالىندى. بۇل 29 مىڭ شارشى مەتردى اۋماقتى قۇرايدى.  پاتەرگە يە بولۋ ءۇشىن سالىمشىلارعا «تۇرعىن ءۇي قۇرىلىس جيناق بانكى» تاراپىنان ارزان زايمدار بەرىلدى. ۇستىمىزدەگى جىلدىڭ 1-قاراشاسىنداعى دەرەكتەر بويىنشا پاۆلودار وبلىسىنىڭ اكىمدىگىمەن اراداعى كەلىسىم بويىنشا 2 ملرد. 600 ملن. تەڭگەدەن استام قارجى يگەرىلگەن.

ايتا كەتۋ كەرەك، «تۇرعىن ءۇي جيناق بانكى» اق «بايتەرەك» ۇلتتىق باسقارۋشى حولدينگى اق-نىڭ ەنشىلەس كومپانياسى بولىپ تابىلادى. حولدينگتىڭ قۇرىلۋ ماقساتى ۇلتتىق ەكونوميكانى ساۋىقتىرۋ مەن وركەندەتۋ جانە ينۆەستيتسيالار تارتۋ، سونداي-اق كلاستەرلىك جۇيە مەن كورپوراتيۆتى باسقارۋ ءىسىن جەتىلدىرۋدى كوزدەيدى.