ەلباسىنىڭ بيىلعى جولداۋىن ەل ىشىنەن گورى سىرت كوز ەجىكتەپ وقۋعا كىرىسكەن سىڭايلى. ءبىز ەرىن ۇشىمەن ەمەۋرىن تانىتىپ ۇلگەرگەنشە، باسقا جۇرتتىڭ ءباسپاسوزى باس قۇجاتتى بۇتارلاپ تالداۋدى باستاپ جىبەرىپتى...

اسىرەسە، اقوردانىڭ ءار ادىمىن اڭدىپ-باققان ورىس ساراپشىلارى «نۇرلى جولدىڭ» بولاشاعىن بولجاپ، ساۋەگەيلىك ايتىپ جاتىر. مىنەكي، ماسكەۋلىك slon.ru سايتىنىڭ «نازارباەۆ گوتوۆيتسيا پرومەنيات روسسيۋ نا كيتاي» اتتى ماقالاسى سوعان دالەل.

كرەمل قابىرعالارىنداعى كۇبىر-سىبىرعا قۇلاعى تۇرىك ءجۋرناليستتىڭ پايىمداۋىنشا، الەمدىك دەرجاۆالار تاراپىنان جاسالىپ جاتقان قىسىم ماسكەۋدىڭ ەجەلگى وداقتاستارىن ويلانۋعا ءماجبۇر ەتۋدە. ەگەر رەسەي ەكونوميكاسى كۇيرەۋ جاعدايىنا جەتسە، ەلارالىق تاۋار اينالىمى ورتاق قازاقستاننىڭ دا قوساق اراسىندا كەتەرى انىق. ماسەلەن، قازىرگى تاڭداعى قازاقستان نارىعىنداعى رەسەيلىك ونىمدەردىڭ ۇلەسى 36 پايىزدى قۇراسا، رەسەي نارىعىنداعى قازاقستاندىق ۇلەس نە ءبارى 7 پايىزدىق مەجەدە. دەمەك، رەسەيدىڭ باسىن قىسقان نوقتا، قازاقستاننىڭ دەمىن تارىلتاتىنى بەلگىلى. دەي كەلگەندە، «Slon.ruدىڭ» ساراپشىسى رەسەيگە سالىنعان ەكونوميكالىق سانكتسيالاردى اينالىپ ءوتۋدىڭ جولىن تابۋ ءۇشىن قازاقستان ەندىگى جەردە ەكىنشى الەۋەتتى مەملەكەتكە ارقا سۇيەۋى مۇمكىن دەپ توپشىلايدى. جانە ول وداقتاستىڭ قىتاي حالىق رەسپۋبليكاسى بولاتىندىعىن دا كەسىپ-ءپىشىپ وتىر. ويتكەنى، قازاقستان نارىعىنداعى قحر تاۋارلارىنىڭ ۇلەسى از جىلدار ىشىندە 16 پايىزعا جەتىپ، كۇن وتكەن سايىن قارقىن الىپ كەلەدى.

Abai.kz