قاراشانىڭ 14-ءى كۇنى پرەزيدەنتتىڭ توراعالىعىمەن ۇلتتىق قوردى باسقارۋ جونىندەگى كەڭەستىڭ وتىرىسى ءوتتى دەپ حابارلايدى aqorda.kz سايتى.

وتىرىستا مەملەكەت باسشىسىنىڭ  «نۇرلى جول – بولاشاققا باستار جول» اتتى قازاقستان حالقىنا بيىلعى جولداۋىن جۇزەگە اسىرۋ ءۇشىن ۇلتتىق قوردان بولىنەتىن قاراجاتتى پايدالانۋ جولدارى تالقىلاندى. 

نۇرسۇلتان نازارباەۆ جاڭا ەكونوميكالىق ساياسات اياسىندا اۋقىمدى جۇمىس كۇتىپ تۇرعانىن اتاپ ءوتتى.

– ەكونوميكا ءوسىمىنىڭ قارقىنىن باسەڭدەتۋگە، حالىق اراسىندا جۇمىسسىزدىقتىڭ بەلەڭ الۋىنا جول بەرمەۋ ءۇشىن ءبىز جاڭا باعدارلامانى ىسكە قوستىق. الەمدە قالىپتاسقان احۋال جاعدايىندا سىرتتان كەلەتىن قاراجات ەكونوميكا ءۇشىن جەتكىلىكسىز. سوندىقتان ءبىز ۇلتتىق قوردىڭ قاراجاتىن پايدالانۋدى ۇيعاردىق. جاڭا ەكونوميكالىق ساياساتتى جۇزەگە اسىرۋعا ءۇش جىل بويى جىل سايىن 3 ميلليارد دوللار بولىنەدى. سونىمەن بىرگە حالىقارالىق قارجىلىق ۇيىمداردىڭ نەسيە جەلىلەرى، سونداي-اق بىلتىر بولىنگەن 1 تريلليون تەڭگە بار. وسى قاراجاتتاردى جۇمساۋ مەحانيزمىن ناقتى ايقىنداۋ كەرەك، – دەدى قازاقستان پرەزيدەنتى.

سونىمەن قاتار، مەملەكەت باسشىسى قارجى رەسۋرستارىنىڭ ماقساتقا ساي ءارى ءتيىمدى جۇمسالۋىن باقىلاۋدىڭ ماڭىزدىلىعىنا نازار اۋداردى.

مەملەكەت باسشىسى وتىرىس قورىتىندىسى بويىنشا بىرقاتار ناقتى تاپسىرمالار بەردى.

اباي-اقپارات