استانادا ءبىر توپ ازامات باس قوسىپ، ەلدىك دەڭگەيدەگى ماسەلەلەردى قاراۋعا ىڭعايلى اقىلداسۋ الاڭىن جاساقتاۋعا كىرىستى.

جاڭا كلۋب - "ەل" ۇلتتىق جوبالار ورتالىعى ءوزىنىڭ اسا كۇردەلى ءارى مەملەكەتتىك دەڭگەيدەگى "الەۋمەتتىك-دەموگرافيالىق دامۋ جوباسىن" ورتاعا سالىپ ساراپتادى. "جەرۇيىق" اتالعان جوبا ەلدەگى باستى ءۇش ماسەلەنى شەشۋگە باعىتتالعان: اۋماقتاردىڭ مەشەۋلىگى مەن جاپاندالۋدى ەڭسەرۋ، الەۋمەتتىك بوسقىندىقتى جويۋ، باسپاناسىزدىق پەن جۇمىسسىزدىقتى زاماناۋي اۋىلدار مەن كەنتتەر سالۋمەن ازايتۋ. جوبادا تەمىرجولدار مەن تاسجولدار بويى، ەكولوگيالىق تازا ءاءرى ادامسىراعان اۋماقتارعا سالىناتىن جاڭا مەكەندەرگە الەۋمەتتىك-ەكونوميكالىق ەركىن ايماق مارتەبەسىن بەرۋ ارقىلى الەۋمەتتىك-دەموگرافيالىق ماسەلەنى شەشۋ جانە شەتەلدەگى قازاقتاردى كەلتىرۋ جاعدايى قاراستىرىلعان.

كلۋب وتىرىسىنا قاتىسقان ەكونوميستەر جانگەلدى شىمشىق پەن مارات ۋاتقان، بيزنەسمەن ازات كارىم، ەكس-سەناتور ءۋاليحان قايسار، جۋرناليستەر نادىربەكوۆ جۇماكەلدى، جۇمامۇرات ءشامشى مەن ءمادي ماناتبەك، جازۋشى بولات تولەپبەرگەن، جەلتوقسان وقيعاسىنىڭ ارداگەرى، ديزاينەر جاناتبەك جاقىپ جانە راحات يكيباەۆ، سەرىك ەرعالي جوبانى ودان ءارى ءۇش باعىت بويىنشا: ساياسي قۇرىلىمدار نازارىنا سالۋ، عىلىمي ورتادا جەتىلدىرۋ جانە پراكتيكالىق ۇلگىسىن جۇزەگە اسىرۋ جونىندەگى شەشىم قابىلدادى.

ج.نادىربەكوۆ اتالمىش جوبا تۋرالى ەل باسشىسى قۇلاعدار بولىپ، مەمەلكەتتىك دەڭگەيدە قولعا الىنۋى كەرەك دەگەن ءۋاجىن ايتتى. ەكونوميست مارات ۋاتقان «بۇل جوبا يدەيا تۇرىندە كەرەمەت، الايدا بۇنى جۇزەگە اسىرۋ ءبازيسى، ياعني مەنشىك ۇلگىسى قازاقستاندا جەتكىلىكسىز، بۇعان مۋنيتسيپالدىق مەنشىك ەلدە ەنگىزىلمەيىنشى بۇل جوبانىڭ جولى بولۋى قيىن» دەدى. ءوز كەزەگىندە استانالىق ەكونوميكا ينستيتۋتىنىڭ ديرەكتورى ج.شىمشىق جوبانىڭ ۋاقىت تالابىنا قاجەتتىگى مەن ماڭىزىن ايتا كەلە، بۇل باستاما عىلىمي تۇردە ساراپتالىپ، رەسمي بيلىك تىلىنە كوشىرىلۋى كەرەكتىگىن جانە بۇعان كەمى 2 جىل كەتەتىنىن ايتتى. ر. يكيباەۆ ءوز پىكىرىمەن قارسى تۇرىپ، «كوز – قورقاق، قول – باتىر» دەي كەلىپ، قازىردىڭ وزىندە ءبىر توپ ازامات استانادا تۇرعىن-ءۇي قۇرىلىس كووپەراتيۆىن قۇرىپ، وعان جەر العاندىعىن، كوپقاباتتى ءۇي سالۋعا كىرىسەتىندىكتەرىن، قاجەت بولسا، مۇنداي زاڭدى فورمامەن باسقاسىن دا ۇيىمداستىرۋعا بولاتىنىن جانە اتالمىش جوبانىڭ ۇلگىسىن وسىنداي جولمەن باستاي بەرۋ قاجەتتىگىن جەتكىزدى.

جوبانى تالقىلاۋ بارىسىندا ونى ءۇش باعىتتا: ساياسي جانە عىلىمي، سونداي-اق پراكتيكالىق ۇلگىسىن قولعا الۋ ارقىلى ىسكە كىرىسە بەرۋ قاجەتتىگى تۋراسىندا شەشىم قابىلداندى.
"ەل" ورتالىعىن ودان ءارى جاڭا جوبالاردى تالداۋ مەن ءپىسىرۋ ارقىلى جانداندىرۋ تۋراسىندا ۇسىنىستار ءبىلدىرىلدى.

«اباي-اقپارات»

جوبانىڭ مۇراتى (ميسسياسى):

قازاقستاندا زاماناۋي اۋىلدار مەن كەنتتەر ۇلگىسىن قالىپتاستىرۋ.

جوبانىڭ مازمۇنى:

- ەلدە پايدا بولعان ستراتەگيالىق جول-كوممۋنيكاتسيالىق ينفراقۇرىلىمدى مەملەكەتتىڭ الەۋمەتتىك-دەموگرافيالىق ماسەلەسىن شەشۋدەگى تەتىككە اينالدىرۋ;

- تەمىرجول مەن تاسجولدىق كۇرەجولدار بويىنداعى اۋىلداردى زامان تالابىنا ساي كەنتتەرگە اينالدىرۋ نەمەسە جاڭا كەنتتەر سالۋ جانە ولاردى دەموگرافيالىق ورتالىقتار ەتۋ.

جوبا شەشەتىن ماسەلەلەر:

1. ءوزىن ءوزى قامتيتىن جاڭا اۋىل-كەنتتەر ۇلگىسىن دامىتۋ ارقىلى اۋىلعا قاتىستى ماسىلدىق كوزقاراستى جويۋ;

2. اۋىلدار مەن كەنتتەردى الۋان ءتۇرلى سەرىكتەستىكتەر مەن شارۋاشىلىقتار شوعىرىنىڭ الەۋمەتتىك-ميگراتسيالىق كورىنىسىنە اينالدىرۋ;

3. قالالارداعى باسپاناسىز الەۋمەتتىك بوسقىندار ەسەبىنەن ءوزىن ءوزى قامتيتىن اۋىلدىق تۇرعىندار قالىپتاستىرۋ;

4. شەتەلدىك قازاقتاردى كەلتىرۋدىڭ ءتيىمدى تەتىگىن جۇزەگە اسىرۋ;

5. قازاقستاندىق مازمۇنداعى اۋىل شارۋاشىلىق ونىمدەرىن ءوندىرۋدىڭ العىشارتىن جاساۋ;

6. يەن دالا مەن اۋماقتاردى يگەرۋ – جاپان كەڭىستىكتى مەملەكەتتەندىرۋ.

جوبا كەنتىنىڭ قىسقاشا سيپاتى:

- 1000-5000 تۇرعىندىق كەنت;

- 1-3 ورتا مەكتەپ;

- 2-10 بالاباقشا;

- جاستارعا ارنالعان جاتاقحانا;

- بالالار ءۇيى;

- قارتتار ءۇيى

- اۋرۋحانا;

- ورتالىق سۋمەن، جىلۋمەن قامتۋ;

- مادەنيەت ءۇيى;

- ستاديون;

- شارۋاشىلىقتار مەن كاسىپتەر;

- كاسىپتەر ورتالىعى/ورتا-تەحنيكالىق كوللەدج;

جوبانىڭ ساتىلارى:

1.قاناتقاقتى جوبا رەتىندە استانانى اينالدىرا 10 كەنت سالۋ نوبايىن ۇسىنۋ;

2. وڭىرلىك دامۋ اگەنتتىگى ارقىلى ەل اۋماعىندا 100 كەنت نوبايىن قولداۋ جوباسىن جۇزەگە اسىرۋ;

3.1000 كەنتتى دامىتۋ ءۇشىن جەرگىلىكتى جوبانى وڭىرلىك دامۋ وبەكتىسىنە اينالدىرۋ.