مەنىڭ ءبىر وكىنىشىم، قانشاما ىقىلاستى نيەتىم بولعانىمەن، ەلگە كەلىپ، ەلپىلدەگەن قازاقي كوڭىلدىڭ قۇشاعىنا ورانىپ، مەيىرىمدىلىك باقىتىنىڭ بازارىنا كەنەلىپ جۇرگەن  مۇستافامەن  كوزى تىرىسىندە ۇشىراسا المادىم...

    ول كەزدە «قازاقستان» تەلەارناسى قارا شاڭىراعىندا قوعامدىق ساياسي رەداكتسياعا جەتەكشىلىك ەتەتىنمىن. مۇستافانىڭ وسى شاڭىراققا بىرنەشە رەت كەلىپ قازاقتىڭ جالپاق تىلىمەن شۇيىركەلەسىپ اڭگىمە وتكىزىپ كەتكەنىن دە ارىپتەستەرىمنەن ەستىپ ءبىلىپ ءجۇردىم. ول كەزدە مەملەكەتتىك جالعىز تەلەارنا بولعان سوڭ ەلدى ەلەڭ ەتكىزەتىن حابار ەڭ الدىمەن وسى شاڭىراقتان تارايتىن، وسى جەردەن كورسەتىلەتىن. اتا جۇرتىن ساعىنىپ كەلگەن مۇستافانىڭ ەلگە كەلگەندەگى العاشقى بارلىق قادامى مەن وتكىزگەن كەزدەسۋلەرى وسى شاڭىراق  ارقىلى سول كەزدە ەلگە جەتتى، بۇيرا شاشى جەلبىرەگەن اتپال ازاماتىمىز ەل ماحابباتىنا بولەندى. ءتىرى اڭىزعا اينالدى.

     سول كەزدە دومبىرانىڭ قوڭىر داۋىسىمەن تۇڭعىشبايدىڭ ورىنداۋىنداعى مۇساتافاعا ارنالاعان «بارىپ قايت، بالام، اۋىلعا» ءانى سامالعا قوسىلىپ بۇكىل قازاق دالاسىن تەربەپ شارلاعانداي بولدى. ونىڭ الماتىداعى ورتالىق ستاديونداعى كەزدەسۋدەگى ايتقان: «مەن ۇلى قازاقتىڭ ءبىر جامان بالاسىمىن. وسى اۋىلدىڭ بالاسىمىن. قىسقاشا ايتقاندا مەن سولمىن»، - دەپ كۇلىپ تۇرىپ ايتقان جۇرەك جاردى ىقىلاستى ءسوزى سول كەزدە قازاقى قانى بار ءار كەۋدەگە وت بولىپ قوندى جانە سول قارپايىم ءسوزى قونعان ءار كەۋدە وعان ماقتانىشپەن، زور سۇيىسپەنشىلىكپەن قارادى. سول سۇيىسپەنشىلىك يەلەرى ونى جادىنان شىعارمادى، ەلەڭدەپ ءۇمىت ارتتى. سونداي جاننىڭ ءبىرى مىنا ءوزىم بولدىم.

    مۇستافا وزتۇرىك اتا قونىس ەلىنە  شوق بولىپ كەلىپ  الاۋ بولىپ جانىپ كەتتى.  ونىڭ ەلگە ورالۋىمەن مىڭداعان ۇل قىز سپورت ويىندارىنا تارتىلدى. ول از عانا ۋاقىت ارالىعىندا قازاقستانداعى قانشاما مەكتەپتەرگە، ينتەرناتتارعا، بالالار ۇيلەرىنە قايىرىمدىلىق قىزمەتتەرىن كورسەتۋگە كۇش جۇمسادى. اتا باباسىنىڭ تۋىپ وسكەن جەرىنە جەتكەن ازاماتتىڭ «اللاتاعالاما مىڭ العىس، ەندى تۋعان جەردە ولسەم ارمانىم جوق»- دەگەن لەبىزىن ءجيى قايتالايتىنىن ءاردايىم ەستۋشى ەدىك، سول تىلەگى پەرىشتەنىڭ قۇلاعىنا شالىنىپ كەتتى مە، 1995 جىلدىڭ 15 ناۋرىزىندا 41 جاسىندا، قىرشىن جاستا ومىردەن ءوتتى. «ەلىم، تۋعان جەرىم»- دەپ كەلگەن ازاماتتىڭ وتانىم دەپ سوققان جۇرەگى ەرتەرەك توقتادى.

   جاراتۋشىنىڭ ءار ادام بالاسىنا مولىنان بەرگەن، بىراق پەندەگەرشىلىكپەن جۇرگەندە ءوزىمىز اڭعارا بەرمەيتىن ءبىر ۇلى قاسيەتى بار. ول – رۋح. رۋحتىڭ ەكى دۇنيەلىك تىرشىلىگى بار. رۋح جاقىندىعى، رۋحاني جاقىندىق وسىدان شىعادى. رۋح – جانىڭدا جۇرگەندە جاقسى - جاماندى سەزدىرەدى، بولاتىن جايتتى بىلدىرەدى، ءتىپتى كەيبىر حاباردى مويىندا، مويىنداما – اينا قاتەسىز جەتكىزەدى دە. وسى ءبىر ءتۇيىندى پىكىردى ايتقاندا مۇستافانىڭ رۋحى مەنىمەن ۇنەمى بىرگە جۇرگەندەي سەزىنەمىن.

    مۇستافا ومىردەن وزىپ، تۋعان توپىراعى تۇركياعا سۇيەگى جونەلتىلەتىن كۇنى جاناشىر ەلى ونىڭ ومىردەن وتكەنىنەن ءا دەگەندە تولىق حاباردار دا بولعان جوق، ءتىپتى ەمحاناعا قانداي جاعدايدا ءتۇسىپ قالعانىنان دا ناقتىلى حابارسىز بولدى. مەن سول كۇنى، قازىر عوي ەكى ءۇيدىڭ بىرىندە تۇرعان، سول كەزدە رەسپۋبليكالىق «قازاقستان» تەلەارناسىنا ازەر جەتكەن بەس Panasonic كامەراسىنىڭ ءبىرىن ازەر الىپ، سول كەزدەگى الماتى ستانتسياسىنىڭ باستىعى، «قازاقستاننىڭ قۇرمەتتى تەمىرجولشىسى» ءامىرحان تورەحانوۆ جايلى تەلەوچەرك دايىنداعالى كەلە جاتقانمىن. ۆوكزال ماڭىنداعى سول كەزدەگى تاشكەنت، قازىرگى رايىمبەك داڭعىلى بويىندا ورتالىق مەشىتكە قاراي اعىلىپ بارا جاتقان كوشەدەگى ادامدار ءنوپىرىن كورىپ، كوز تامىرىم تارتقىشتاي بەرگەن سوڭ، ايالداپ سۇراۋعا تۋرا كەلدى. قايران مۇستافا وزتۇرىك ومىردەن وزىپتى! سول كەزدە ءوز ەلىنىڭ ماحابباتىنا اينالعان وزتۇرىك، اتى اڭىزعا اينالعان وزتۇرىك، قىرشىن جاستاعى وزتۇرىك! ەلىم دەپ  كەلگەن مۇستافاعا تۋعان جەر توپىراعى دا بۇيىرماي سۇيەگى تۇركياعا كەتكەلى جاتىر ەكەن!  ەڭىرەگەن ەلدىڭ سوڭىنان ىلەسىپ، جۇمىستى جيىپ قويىپ، مەن دە كەتە باردىم.

    ول كەزدە بۇگىنگى باس مەشىتتىڭ ورىنىندا ەسكى مەشىت بولاتىن. مۇستافانىڭ سۇيەگى سوندا جەتكىزىلىپ، كىرە بەرىس ۇلكەن ەسىكتىڭ الدىنا قويىلىپتى، ءمايىت قازاقتىڭ كوك تۋىمەن جابىلىپتى. مەنىڭ بىلەتىنىم - بۇل مەشىتتە مۇنداي جورالعى، قارالى جيىن بۇرىن سوڭدى وتپەگەن.   قارالى جيىندى مەملەكەت قايراتكەرى، سول كەزدە ۋاقىتشا قىزمەتتە جوق بولۋى كەرەك، تانىمالى قازاق جاستارىنىڭ جەتەكشىسى سەرىك ابدراحمانوۆ;

       -التىنىمىزدان ايىرىلدىق. جارقىراعان جۇلدىزىمىز ءسوندى. قابىرعامىز قايىسىپ تۇر. ادەمى سويلەيتىن جەر بۇل جيىن ەمەس شىعار. دەگەنمەن، سوڭعى كەزدە قالىپتاسقان ءداستۇر بويىنشا قارالى جيىندى اشىق، -  دەپ باستادى.

   مۇنان سوڭ ءسوز العان ءدىن قايراتكەرى  حاليفا التاي شاعىن دۇعا وقىپ، قىسقا اياتتا ءاربىر ومىرگە كەلگەن ادام بالاسىنىڭ دۇنيەگە كەلگەن سوڭ پانيدەن قايتا  وتەتىندىگىن ايتتى. ولمەيتىن ادام جوق.  بىراق، سول اجال بىرەۋگە ەرتە، بىرەۋگە كەش كەلەدى. مۇستافا باۋىرىمىز جۇرە تۇرسا بولاتىن ەدى. بىراق، جاراتۋشى وسىلاي ەتسە نە شارا؟ قازاعا سابىر تىلەيىك. رازى بولۋىمىز كەرەك، شۇكىرشىلىك ەتەيىك. ءار ادامعا جاناشىرلىق كورىنىسى كوركەم جانازا وسىنداي-اق بولسىن. قانشاما ادام جينالىپ وتىر. ايتۋعا قيىن بولسا دا، بۇل دا جاناشىرىنا - قۋانىش، ءارى جۇبانىش. بۇل مۇستافا باۋىرىمىزدىڭ حالىقتىڭ بالاسى بولعاندىعىن، حالقى ونى سۇيگەندىگىن كورسەتەدى.  مۇستافا باۋىرىمىز دا ءوز حالقىن ەرەكشە سۇيەتىندى. مەن مۇنى قۋانىش دەپ ەسەپتەيمىن. مۇنان سوڭ تەبىرەنە ءسوز العان اقىن مارقۇم قاجىتاي ءىلياس;

    - اكەدەن جالعىز ەدى، مىنا بۇركىت دەگەن قۇس كوپ جۇمىرتقالامايدى ءبىر-ەكى عانا جۇمىرتقا شىعارادى. بۇل جىگىت ەرجۇرەك قابانباي باتىردىڭ  تۇقىمى.  قازىر ون ميلليون قازاق وسىندا بولسا، مىنا جانازا باسقاشا بولار ەدى دەپ ءسوزىنىڭ سوڭىندا كەمسەڭدەپ، كەيىن كىتابىنا ەنگىزگەن; 

باعىم-اي، بازارىم-اي، باۋىرىم-اي!

قازانىڭ جەر كوتەرمەس اۋىرىن-اي.

ءار ەلدە جۇگى جانىپ، كۇلى قالىپ،

جۇلدىزداي شاشىراعان اۋىلىڭ-اي!

قىران ەڭ ەركىن وسكەن قورعالاماي،

تۇڭعيىق ءتۇستى ەكەنسىڭ تورعا قالاي.

قۇسبەگى از، تاۋىقشىسى كوپ زاماندا،

قازاقتىڭ قايتا-قايتا سورلاعانى-اي!

ەل شەرلى، دوسىڭ مۇڭدى، ءۇيىڭ ناراۋ،

وشاعىڭ قيىر جەتپەس قيىردا اناۋ...

ەلىڭە «ەلىم-ايلاپ» كەلسەڭ داعى،

توپىراق اتا جۇرتتان بۇيىرمادى-اۋ دەپ ەڭىرەپ اياقتادى. ۇركەكتەي وتكەن وسى قىسقا قارالى جيىندى جاباردا  س. ءابدىراحمان;

    - بۇگىن قوشتاسىپ قالايىق دەپ وسى جيىندى دا اياق استى ۇيىمداستىرىپ وتىرمىز. كوپ رەسميلىك جوق. بەيىت باسىندا ەشكىمگە ايىپ تاعايىق دەپ وتىرعانىمىز جوق. بىزگە ەندى كەشىرە قاراڭىزدار. مەن ەندى وسى ميكرافوندى قولىما الىپ تۇرعان سەبەبىم، 1990 جىلى ميۋنحەنگە بارىپ، مۇستافاعا بارىپ، كورىپ، تانىسىپ، تىرلىگىن بايقاپ، اتا مەكەنىن ساعىنعان سەزىمىن بايقاپ، «كەلدە كەل»- دەپ سول جىلى شاقىرتىپ العان ەدىم.  مىنە، ەندى شىعارىپ سالىپ تۇرمىز. ازاماتىمىزعا اتا مەكەننىڭ توپىراعى بۇيىرماعانى قابىرعامىزعا باتىپ تۇر. امال قانشا، اناسىنىڭ ايتۋىنان اتتاي المادىق. سول سەبەپتەن سىزدەردىڭ اتتارىڭىزدان «باۋىرىم قوشش»- دەپ ايتۋعا تۋرا كەلىپ تۇر. قوش بول باۋىرىم، توپىراعىڭ تورقا بولسىن.

 سەرىكتىڭ ايتقان وسى سوڭعى ءسوزى جانازاعا قاتىسقان كوپشىلىكتى قايىستىرىپ كەتتى، تەڭسەلدىرىپ كەتتى. سونىڭ  كورىنىسى  وسى قارالى قوشتاسۋدان سوڭ توبىن جازباعان قارالى شەرۋ مۇستافانىڭ ۇلكەن بەينەسىن الدارىنا ۇستاپ  الماتى مەشىتىنەن الماتى اەرپورتىنا  قاراي ءسۇيىنباي كوشەسىمەن ساپ ءتۇزىپ ساپار شەكتى. وعان ەشكىم بوگەت بولا المادى.

     جازىپ سىزاتىن ادامداردىڭ كەيبىر تاريحي دەرەكتەردى ءوز مۇراعاتىندا جادىگەر ەتىپ جينايتىنى بار. مەنىڭ سول كۇنى ۆيديو كامەرانى جۇمىس بابىمەن الا شىققانىم كادەگە جاراپ، سول قارالى ساتتە  اەروپورتتا، مۇستافا دەپ قابىرعاسى قايىسقان ازاماتتاردىڭ ءبىرازىنىڭ ايتقان اڭگىمەسى بۇگىنگە جەتىپ وتىر. قاراپ وتىرسام ول ازاماتتاردىڭ دا ءبىرازى باقيلىق بولىپتى. بۇل جادىگەر - مۇستافانىڭ الداعى 60 جىلدىعى مەن ءتورت-بەس ايدان سوڭ ونىڭ ومىردەن وزعانىنا 20 جىل تولۋ قارساڭىندا ەلدى ويلاندىرار، مۇستافانىڭ كىم بولعانىن بۇگىنگى ويلى ۇرپاققا جەتكىزەر قۇندى دۇنيە بولار دەپ ويلايمىن.   وسى ماقالادا سول بەينە تاسپاداعى ءبىراز ازاماتتىڭ كوز جاسىن كول ەتە وتىرىپ سويلەگەن ءسوزىن قىسقارتىپ بەرە كەتكەننىڭ ارتىقتىعى بولماس دەپ وتىرمىن.

     بەرىكبولات بەيسەكەنوۆ;

-          بۇكىل قازاق مۇسىلمان قاۋىمى، الماتىنىڭ بۇكىل ازاماتتارى، قازاقپىن دەيتىن ازاماتتار بۇگىن مۇستافانى شىعارىپ سالىپ جاتىر. مەن مۇستافانىڭ ەڭ جاقىن دوسى ەدىم. ەكىنشى جاعىنان ەكەۋمىز تۋىسقان ەدىك. اتا باباسى جاتقان جەرگە اپارىپ قۇران باعىشتاتىپ ەدىم، بۇگىن مىنە ەندى دوسىمدى، بۇكىل ەل بىلەتىن دوسىمدى، بۇكىل جۇرت، بۇكىل الەم بىلەتىن دوسىممەن قوششتاسىپ وتىرمىز. ءتىپتى اۋىر بولىپ تۇر. بۇل ازاماتتى قازاق جەرىنە جەرلەۋىمىز كەرەك ەدى، بىراق تا مۇستافنىڭ اناسىنىڭ تىلەگىمەن سول تۇرىك جەرىنە سۇيەگى كەتىپ بارا جاتىر. ويتكەنى مەن ءوزىم تەلەفون ارقىلى جارتى ساعات سويلەستىم، ءوزىنىڭ جاقىن اعاسىمەن. وعان مۇستافانىڭ اناسىنىڭ ايتقانى «مەنىڭ ۇلىم، حالىقتىڭ ۇلى، ەلدىڭ بالاسى، بۇكىل قازاقتىڭ بالاسى، سەندەردىڭ بالالارىڭ، بىراق تا سۇيەگى مەنىكى. اكەسىنىڭ جانىندا بولسىن. باسىنا بارىپ تۇرام، قۇران باعىشتاپ تۇرام دەپتى، سودان سول جاققا شىعارىپ بارامىز. سوندىقتان بۇكىل قازاق بۇل ازاماتتى ۇمىتپاۋىمىز كەرەك. ارقاشاندا مۇستافانىڭ ارۋعىنا باعىشتاپ، ارقاشاندا ءبىزدىڭ قازاقتىڭ مۇستافاداي ازاماتى بولعانىن ءبىزدىڭ قازاعىمىزدىڭ ەكىنشى قاجىمۇقانى بولعانىن ەشقاشاندا ۇمىتپاۋىمىز كەرەك اعايىن.

سەرىك ءابدراحمانوۆ:

  -بۇل عاسىردا كىم بار دەسەك مۇستافا بىردەن ەسكە تۇسەدى. پالۋاندىعىمەن، جۇرەگىمەن، اقىلدىلىعىمەن، بىلىمدىلىگىمەن. اللايدا ۇكىمەت ءۇنسىز قالدى. وسىنداي ءجۇز جىلدا ءبىر تۋار ازاماتى كەتىپ بارا جاتقاندا سوڭعى ساپارىنا سونداي سىي قۇرمەتتى حالىقتىڭ اتىنان كورسەتە المادىق.

بەكسەيت تۇلكيەۆ:

    -دوسىم، ءارى ۇستازىم ءوزىڭ ايتۋشى ەدىڭ عوي. بەكسەيت، سەن مەنىڭ اقىرەتتىك دوسىمسىڭ دەپ. سەن ەلدىڭ نامىسىن قورعايتىن ازاماتتاردى تاربيەلەيتىن ونەرىڭدى ۇيرەتىپ، ولاردى تاربيەلەدىڭ. بەس جىل بويى قازاقستاندا سپورت ابرويىن بىرگە كوتەردىك، بىرگە جۇردىك. بەس جىلدىڭ ىشىندە جارقىراتا ەڭبەك ەتتىڭ. ءبىزدىڭ تايكۆوندو شەبەرلەرىنەن قانشاما قارا بەلبەۋلىلەر دايىنداپ كەتتىڭ، ءبىزدىڭ ارمانىمىز  مۇمكىن ءالى تولىق ورىندالمادى،بىراق ورىندالادى.  اناڭنىڭ سوزىنەن اتتاپ كەتە المادىق. سوندىقتان مۇستافا سەنىڭ ءىسىڭ ماڭگىلىك. مەن دوس رەتىندە دە، فەدارتسيا جەتەكشىسى رەتىندە دە سول ارمانىڭدى ىسكە اسىرۋعا كۇشىمدى سالامىن. جانىمدا جىگىتتەر بار. جانىبەك بار، ماقسۇت بار، سەن ارمانداعان قازاقستاندا كەم دەگەندە سەندەي تالانتتى ۇلداردى   بار كۇشىممەن تاربيەلەيمىن دەپ قارالى جۇرتتىڭ الدىندا سەرت بەرەمىن. دوسىم مۇستافا، سەنىڭ ارمانىڭدى - ۇلدارىڭ، قىزدارىڭ، كەيىنگى شاكىرتتەرىڭ ورىنداسىن.

    انناڭنىڭ سوزىننەن اتتاپ كەتە المادىق. كوكتوبەگە سۇيەگىڭدى قويا المادىق. سەن ايتۋشى ەدىڭ: «ادامنىڭ ءومىرى ماڭىگىلىك بولۋ ءۇشىن دوستاردىڭ جۇرەگى ماڭىگى بىرگە سوعا ءبىلۋ كەرەك»- دەپ. اڭىز بولىپ قالدىڭ. بەس جىلدا الەمگە تانىلدىق. سەن ءوز ءومىرىڭدى ماڭگىلىك دەپ سانا. سەنىڭ ءوز ءومىرىڭ ماڭگىلىك. توپىراعىڭ تورقا، جانىڭ جانناتتا بولسىن دوسىم.

      حاليفا التاي:

-         تۇركياداعى اعايىندارعا ەلدەن راحمەت ايتىپ بارامىز. جانازدا تاعى ءبىر نارسەنى ايتۋىمىز كەرەك. مۇستافاعا قارىزى بار، الاشاعى بار ازاماتتار بار ما؟ وسى جەردە ايتىپ قالىڭدار، ازاماتتىڭ موينىندا قارىز كەتپەۋى كەرەك.

    راتبەك نىسانباي:

  - دۇرىس ايتادى، شاريعات ۇكىمى بويىنشا اقىرەتكە قارىز بولىپ كەتپەۋى كەرەك.  بىرەۋدەن قارىز الدى ما المادى ما سونى سۇراپ ءبىلىۋ وتە ورىندى. بۇل شاريعي جولىمەن باۋىرىمىزدى شىعارىپ سالعانىمىز بولادى. مىنە، قارىزى جوعىن بىلدىك. ساۋاپتان بولسىن باۋىرىمىزعا

ح.التاي:

- الماتىداعى مەشىتتە مەن كورگەلى العاش رەت مەملەكەت باسشىلارى بولسىن، دەپۋتاتتار بولسىن، باسقا قايراتكەر ازاماتتار بولسىن قازاقتىڭ كوك تۋىنا ورالىپ جانازاسى شىعارىلعان ەمەس. تۇڭعىش رەت وسىنداي جاعدايدا مۇستافانىڭ جانازاسى مەشىتتە وقىلدى. اللاتاعالام مۇنداي ابرويدى ەكى ادامنىڭ بىرىنە بەرە بەرمەيدى. قايعىرىپ تۇرىپ مەن وسىعان قۋاندىم.

     قارالى حالىقتىڭ مۇستافا باۋىرىمىزدى ءوزىنىڭ تۋعان توپىراعى تۇركياعا وسىلاي شىعارىپ سالعاننان كەيىن جوعارى جاقتان نۇسقاۋ بولماسا دا سول كەزدەگە ديرەكتورىمىز، مارقۇم رافاەل جۇماباەۆپەن كەلىسىپ، «ماڭگىلىكسىڭ مۇستافا» دەگەن تاقىرىپپەن كەلەسى كۇنى كەشكىلىك باعادارلامادا قايتالاۋدا تۇرعان ءبىر حاباردى الىپ تاستاپ، 25 مينۋتتىق حابار ەتىپ وتكىزىپ جىبەردىم، سوعان لايىق ۇرىقساتسىز حاباردى ەفيردەن جىبەرگەنىم ءۇشىن سول كەزدە ءتيىستى تاياعىن دا جەدىم. سول ايقايمەن جۇرگەندە ءوزىم دايىنداعان حاباردى كوزىمنىڭ قاراشىعىنداي وزىمدە ساقتاپ قالۋعا مۇمكىندىك تۋدى.

     ەندى ماقالادا قويىلىپ وتىرعان تاقىرىپقا ورالايىن. مۇستافانىڭ رۋحى دەگەننەن شىعادى، ءوزىم جاساعان وسى حاباردان سوڭ بۇرىن سپورت جۇمىسىمەن اينالىسپاعان ماعان ءبىراز وسى باعىتقا بەت بۇرۋعا تۋرا كەلدى. مۇستافا ومىردەن وزعان سوڭ وتكەن ايت مەرەكەسىندە اناسى رازيامەن ۇشىراستىم. سول جەردە حاليفا التاي اعامىزبەن بەتپە-بەت ۇشىراستىرىپ، مۇستافانىڭ سۇيەگىنىڭ تۇركياعا كەتۋ سەبەبى جايلى سۇرادىم. «مۇستافانىڭ سۇيەگىن تۇركيادا جەرلەۋگە  حاليفا التاي سەبەپكەر بولدى دەپ جۇرگەندەرگە ايتارىم، شىندىعىندا ولاي ەمەس، كەرىسىنشە وسىندا قالدىرايىق دەپ اقىل قوسقان العاشقى ادام وسى كىسى بولدى، بىراق ول كەزدە مەنىڭ پالەن دەپ ايتارلىق شامام جوق ەدى عوي، انا دەگەن ەلدەن اسىپ قايدا بارۋشى ەدى، ەلى وسىلاي ۇيعاردى دەپ سۇيەگىن وسىندا قالدىرسا مەنىڭ قولىمنان نە كەلۋشى ەدى؟» دەپ مەنىڭ وزىمە سۇراق تاستادى ول كىسى. «قاپ اي ءا...» دەپ ويلانىپ قالدىم...

    مەن 2006 جىلى قازاقستان رەسپۋبليكاسىنىڭ تۋريزم جانە سپورت جونىندەگى اگەنتتىگىنە قاراستى الماتى قالاسىنداعى الەم چەمپيونى، الەم كۋبوگىنىڭ يەگەرى اسقار شاحيەۆ اتىنداعى تاەكۆوندو كلۋبىنىڭ پرەزيدەنتى بولىپ سايلانعان سوڭ، كلۋب جۇمىسىن جانداندىرۋدا، جاستاردى وسى باعىتتا تاربيەلەۋدە، ءبىراز جۇمىستار جاساۋعا تۋرا كەلدى. ورالدا بولىپ ەسىمى ەلەۋسىز قالىپ بارا جاتقان ا.شايحيەۆ تۋرالى ماسەلەنى قايتا كوتەرۋگە تۋرا كەلدى. ۇستازىنان سوڭ ۇزاماي قاندى قول قاراقشىلاردىڭ قولىنان قازا تاپقان بەكسەيىتتىڭ 50 جىلدىعىنا بايلانىستى الماتىدا وتكەن ءتۋرنيردىڭ ۇيىمداستىرۋ جۇمىستارىنا ارالاستىق. وعان ارنالاعان، جاستاردى بەكسەيتتىڭ جولىنا شاقىرعان «بەكسەيتشىل جاستارعا» تولعاۋ جىرىم سول جيىندا وقىلدى. پەكين وليمپياداسىندا تاەكۆوندودان قولا جۇلدەمەن ورالعان ارمان ءشىلمانوۆتى باس جاتتىقتىرۋشىسى ماقسۇتتىڭ وتىنىشىمەن مەنىڭ باتاممەن باس مەشىتتەن شىعارىپ سالىپ، كەلگەندە  تسەلينىي كينوتەارى الدىنداعى مەيرامحانادا سالتاناتتى داستارحاندا كۇتىپ الدىق.  سوندا وقىلعان ارمانعا ارنالعان ارناۋ ولەڭىم سول كەزدە «سپورت» گازەتىندە جاريالاندى. ول كەزدە ولار بالكىم «قازاقستان قاجىلارى» ءدىني بىرلەستىگىنىڭ توراعاسى ەكەندىگىمدى ەسكەرگەن بولار.

     بۇل دەرەكتەردى كەلتىرىپ وتىرعانىم، وسى جۇمىستىڭ ءبارىن اتقارىپ جۇرگەندە مەنىڭ قاسىمدا ۇنەمى مۇستافانىڭ رۋحى بىرگە جۇرگەندەي بولادى. رۋح ولمەيدى، جاقسى جاندىردىڭ رۋحى ەكى دۇنيەدە قاتار جۇمىس جاساي بەرەدى دەۋىم سودان.

    قازىر الداعى كەلە جاتقان مۇستافانىڭ 60 جىلدىعى مەن ومىردەن وزعانىنا 20 جىل تولۋ كۇندەرىنە وراي مۇراعاتىمدا ساقتالعان سول بەينە ءفيلمىمدى قايتا قاراپ، ەفيرگە ازىرلەپ جاتىرمىن، دەمەۋشى تابىلىپ جاتسا، ۇزاماي جارىق كورىپ قالار. ماڭىلىك ءومىر يەسى مۇستافا سياقتى ازاماتتاردىڭ ەسىمى مەن جارقىن بەينەسى ءار قاشان دا حالىق جانىندا بولا بەرمەك.

 باقتىباي اينابەكوۆ،

جازۋشى

Abai.kz