قر مادەنيەت مينيسترلىگىنىڭ «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ» باعدارلاماسى بويىنشا  جاقىندا الماتىداعى «رۋح بگ» باسپاسىنان بالۋان شولاق (نۇرماعامبەت) بايمىرزاۇلى تۋىندىلارىنىڭ جيناعى  جارىق كوردى. كىتاپ حالقىمىزدىڭ مادەنيەتىندە ەرەكشە ورىن الاتىن ايگىلى ءانشى-كومپوزيتور، اقىن، قازاق تسيرك ونەرىنىڭ نەگىزىن سالۋشى، سال-سەرىلەر ءداستۇرىن جالعاستىرۋشى بالۋان شولاقتىڭ (1864–1919) تۋعانىنا 150 تولۋىنا ارنالىپ وتىر. جيناقتى قۇراستىرعان –بالجان حابدينا.

كىتاپ ەكى بولىمنەن تۇرادى. العاشقى بولىمىنە بالۋان شولاقتىڭ ارتىندا قالعان شىعارماشىلىق مۇراسى – ولەڭ-جىرلارى مەن اندەرىنىڭ ماتىندەرى – ءتۇرلى باسىلىمدار بەتتەرىنەن الىنىپ، جيناقتالىپ بەرىلگەن. ونىڭ جالپى كولەمى ەكى مىڭ جولداي. ەكىنشى بولىمگە ءسابيت مۇقانوۆ، كەنەن ازىرباەۆ، قالماقان ابدىقادىروۆ، احمەت جۇبانوۆ، بوريس ەرزاكوۆيچتىڭ جاۋىرىنى جەرگە تيمەگەن اتاقتى پالۋان, ءانشى-سازگەر تۋرالى ەستەلىكتەرى مەن زەرتتەۋلەرى توپتاستىرىلعان. وسى بولىمدە، سونداي-اق، قازاق ادەبيەتى كلاسسيكتەرىنىڭ ءبىرى ءسابيت مۇقانوۆتىڭ رومانتيكالىق سيپاتتاعى «بالۋان شولاق» اڭىزى بار. ال كىتاپتىڭ بەتاشارى رەتىندە بەرىلگەن تانىمدىق ماقالادا جازۋشى، تاريح عىلىمدارىنىڭ كانديداتى بەيبىت قويشىباەۆ بالۋان شولاقتىڭ ءومىرى مەن شىعارماشىلىعىنىڭ سيپاتى جايىندا وي تولعايدى.  

حابارعا بالۋان شولاق پەن كىتاپ مۇقاباسىنىڭ  سۋرەتتەرى تىركەلدى.

اباي-اقپارات