ءال-فارابي اتىنداعى قازاق ۇلتتىق ۋنيۆەرسيتەتىندە قازاقستان رەسپۋبليكاسى ۇلتتىق عىلىم اكادەمياسىمەن بىرلەسە وتىرىپ ءال-فارابي مۇراسى بويىنشا دايىندالعان كىتاپتاردىڭ تۇساۋكەسەر ءراسىمى ءوتتى.

شاراعا ۋنيۆەرسيتەت رەكتورى عالىم مۇتانوۆ، قازاقستان ۇلتتىق عىلىم اكادەمياسىنىڭ پرەزيدەنتى، اكادەميك مۇرات جۇرىنوۆ، حالىقارالىق اباي كلۋبىنىڭ پرەزيدەنتى، جازۋشى روللان سەيسەنباەۆ، فيلوسوفيا عىلىمدارىنىڭ دوكتورى، پروفەسسور ابدىمالىك نىسانباەۆ، تەحاس تەحنولوگيالىق ۋنيۆەرسيتەتىنىڭ فيلوسوفيا دەپارتامەنتى ديرەكتورى، پروفەسسور مارك ۆەبب، سونداي-اق ءال-فارابي اتىنداعى قازۇۋ-دىڭ وقىتۋشى-پروفەسسورلار قۇرامى، دوكتورانتتار، ماگيسترانتتار مەن ستۋدەنتتەر قاۋىمى قاتىستى.

        «وسىدان 23 جىل بۇرىن، 1991 جىلى 23 قازاندا قازۇۋ-عا شىعىستىڭ اتاقتى ويشىلى، عالىم-ەنتسيكلوپەديست ءابۋ ناسىر ءال-فارابي ەسىمى بەرىلگەن بولاتىن. ءال-فارابي ەسىمىن ارقالاعان ۋنيۆەرسيتەتتىڭ ۇلى ويشىل يدەيالارىن دارىپتەۋ مەن ناسيحاتتاۋدى وزىنە بورىش ساناۋى زاڭدىلىق»، – دەدى قازۇۋ رەكتورى عالىم مۇتانوۆ. سونداي-اق ول بەلگىلى عالىم مۇراسىن زەرتتەپ-زەردەلەۋ ءىسىنىڭ، اسىرەسە، قازۇۋ-دىڭ 80 جىلدىق مەرەيتويى كەزىندە قىزۋ قارقىن العانىن اتاپ ءوتتى.

        2013 جىلى 23 جەلتوقساندا ۋنيۆەرسيتەتتە ءال-فارابي بابامىزدىڭ ىزگىلىك قالاسى تۋرالى ىلىمىنە  نەگىزدەلگەن «Al-Farabi university smart city» عىلىمي-يننوۆاتسيالىق جوباسى باستاۋ الدى. جوبانى جۇزەگە اسىرۋ ماقساتىنداعى ماڭىزدى شارالاردىڭ ءبىرى رەتىندە ءال-فارابي مۇراسىن قالىڭ كوپشىلىككە جەتكىزۋگە باعىتتالعان وقۋ قۇرالىن قازاق جانە ورىس تىلدەرىندە دايىنداۋ ءىسى جۇزەگە اسقان بولاتىن. مىنە، كەشەگى وتكەن شارادا ء«ال-فارابي جانە قازىرگى زامان» دەپ اتالاتىن وسى وقۋ قۇرالى كەلۋشىلەردىڭ نازارىنا ۇسىنىلدى. سونىمەن قاتار، قازۇۋ-داعى الەم حالىقتارى ادەبيەتىنىڭ ينستيتۋتى مەن ء«ال-فارابي» ورتالىعى بىرلەسىپ، عالىمنىڭ «قايىرىمدى قالا» مەن «مۋزىكا تۋرالى كىتاپ» اتتى ەڭبەكتەرىنىڭ ەكى تومدىعىن، «اقىل كىتابىن» – «The Book of Mind» جانە ء«ال-فارابي تۋرالى كىتاپ» جيناعىن جارىققا شىعارعان ەدى. تۇساۋكەسەر اياسىندا كوپشىلىك بۇل ەڭبەكتەرمەن دە تانىسۋعا مول مۇمكىندىك الدى. 

        جيىنعا قاتىسۋشىلار قازۇۋ عالىمدارى مەن عىلىمي-زەرتتەۋ ينستيتۋتتارىنىڭ ءال-فارابي مۇراسىن دايىنداۋ بارىسىندا اتقارعان اۋقىمدى جۇمىستارى ەڭ الدىمەن شىعىس جانە ورتا ازيا حالىقتارىنىڭ، تۇرىك جانە قازاق مادەنيەتىنىڭ دامۋىنا وزىندىك ۇلەسىن قوسقاندىعىن، سونداي-اق عالىم مۇراسىنىڭ شىعىس پەن باتىس مادەنيەتتەرىنىڭ بىرلەسۋى مەن ءوزارا تۇسىنىستىگىنىڭ نىشانى ەكەندىگىن تىلگە تيەك ەتتى.

    شارا سوڭىندا قازۇۋ رەكتورى عالىم مۇتانوۆ عىلىم مەن ءبىلىم بەرۋ سالاسىنا، قوعامدىق جانە حالىقارالىق قىزمەتكە قوسقان ايتۋلى ۇلەستەرى ءۇشىن بىرقاتار عالىمداردى ماراپاتتادى. ۋنيۆەرسيتەتتىڭ عىلىمي كەڭەسى شەشىمىمەن ء«ال-فارابي اتىنداعى قازۇۋ-عا سىڭىرگەن ەرەن ەڭبەگى ءۇشىن» ۇلكەن كۇمىس مەدالىنە ابدىمالىك نىسانباەۆ پەن كلارا تادجيكوۆا يە بولسا، ء«ال-فارابي اتىنداعى قازاق ۇلتتىق ۋنيۆەرسيتەتىنە 80 جىل» مەرەيتويلىق مەدالىمەن گۇلجاحان نۇرىشەۆا، عاليا قۇرمانعاليەۆا، ناتاليا سەيتاحمەتوۆا، باقىتكۇل جامباەۆالار ماراپاتتالدى.

Abai.kz