اتاۋى ايتىپ تۇرعانداي، وتكەن جەتىدەگى تاقىرىپ بۇگىنگى اڭگىمەگە وزەك. بۇعان الەۋمەتتىڭ نازارىن باۋراپ، ەرىكسىز ويلاندىراتىن، تۇيتكىلىمەن كوڭىلدى اۋلاپ، كوپشىلىكتى تولعاندىراتىن جايتتەر سەبەپ.
ەلوردادا حالىق قالاۋلىلارى ەۋرازيا ەكونوميكالىق وداعىنا قاتىستى كەلىسىمدى بەكىتتى. ماسكەۋدەگى حابار-وشار قۇرالدارى بۇعان پالەندەي ءمان بەرمەدى. ءسىرا، كرەمل ەندىگى جەردە ىرگەدەگى ەلمەن اراداعى وداقتان گورى شەشىمى قيىن تۇيىنگە كوبىرەك باس قاتىراتىن سەكىلدى.

سوڭعى اپتادا احۋال وڭالعان جوق. ورىس اقشاسى قۇنسىزدانا ءتۇستى. وسى اپتادا 1 دوللارعا شاققاندا باعامى 40 رۋبلدەن اسىپ كەتتى. ورتالىق بانك، ايتەۋىر، اۋپىرىمدەپ ءجۇرىپ 39-عا ءتۇسىردى. قىرۋار شىعىنمەن. امەريكاندىق Bloomberg اگەنتتىگى حابارلاعانداي، 2 قازاننان بەرى اقشانى تىزگىندەۋ ءۇشىن 2 ملرد دوللار جۇمسالعان. رۋبل قىركۇيەكتە 7,5 پايىزعا قۇنسىزدانىپ، الەمدەگى ەڭ جىلدام قۇلدىراعان ۆاليۋتاعا اينالدى. اگەنتتىك اقشانىڭ مايىن ىشكەن ماماندارعا سۇيەنە وتىرىپ، رەسەي بانكى جىل سوڭىنا دەيىن دەۆالۆاتسيامەن كۇرەسكە 30 ملرد دوللار بولۋگە ءماجبۇر دەگەن بولجامدى كولدەنەڭ تارتادى. جانى بار پىكىر. ويتكەنى، باس بانك سارسەنبىدە بيۆاليۋتا (دوللار مەن رۋبل) ء«دالىزىن» 44,45-كە دەيىن كەڭەيتۋگە ءماجبۇر بولدى. بۇل - ءرۋبلدىڭ باعامى وسى كورسەتكىشكە بارىپ تىرەلۋى مۇمكىن دەگەن ءسوز. وتكەن جولى 1 دوللاردى 42 رۋبلگە ساتىپ الاتىنداي كۇن تۋسا، بىزگە الاڭداۋعا تۋرا كەلەدى دەگەنبىز. دۇرىسى، باس بانكيردىڭ وسى تاقىلەتتەس پىكىرىن كەلتىرگەنبىز.
«قارا التىن» دا قۋانتپادى. Brent ماركالى مۇنايدىڭ باررەلى تاعى ارزاندادى. كەشە تۇستەن كەيىن لوندون بيرجاسىندا 91 دوللارعا باعالاندى. قارا مايدىڭ ارزانداۋى بىزدەگى بەنزين داعدارىسىنا وڭ اسەرىن تيگىزە قويمادى. جانار-جاعار مايعا كەلگەندە ءالى دە تەرىستىك كورشىمىزگە تاۋەلدىمىز. ءتورتىنشى مۇناي وڭدەۋ زاۋىتى سالىنبايتىن سياقتى. «ودان دا رەسەيدەن ساتىپ العان ءتيىمدى»- دەيدى ءلوببيشىل كوكەلەر. بۇل جەتىدە «سامۇرىق-قازىنا» ءال-اۋقات قورىنىڭ قىزمەتىن تىڭ ارناعا بۇرۋ (ترانسفورماتسيا) جايى ءسوز بولدى. قوردىڭ عانا ەمەس، ۇكىمەتتىڭ، سونىڭ ىشىندە ەكونوميكالىق بلوكتى قۇرايتىن مينيسترلىكتەردى مەملەكەتتىك مۇددەگە قىزمەت ەتۋگە ماجبۇرلەيتىن تەتىك كەرەك. ايتپەسە، قاشاعانداعى تەسىك قۇبىر، مۇنايى مول ەلدەگى بەنزين تاپشىلىعى سىقىلدى كەلەڭسىزدىك پەن ۆ. شكولنيك مىرزانىڭ ۇنەمدەۋ تۋرالى ۋاعىزى جالعاسا بەرەرى انىق. قاشاعان دەمەكشى، مۇناي شىعار-شىقپاس جارىلعان كەنىشتەگى قۇبىرلاردى الماستىرۋ ءۇشىن 3,6 ملرد دوللار قاجەت دەسەدى.
ال ماسكەۋ ءباسپاسوزىنىڭ بۇگىنگى باستى تاقىرىبى - ورىس وليگارحتارىنىڭ شەتەلدە جوعالتقان مال-مۇلكىن بيۋدجەت ەسەبىنەن قالپىنا كەلتىرۋدى كوزدەيتىن «روتەنبەرگ زاڭى». كرەمل قوجايىنىنا جاقىن ادامنىڭ ەسىمىمەن اتالعان زاڭ جوباسىن مەملەكەتتىك دۋما ماقۇلداپ تاستادى.

سرايىل سمايىل "جاس قازاق" گازەتىنىڭ باس رەداكتورى

"جاس قازاق" گازەتى

تاقىرىپ وزگەرتىلىپ الىندى. تۇپۇسقاداعى تاقىرىپ: مۇناي جانە رۋبل-2