سۋرەتشى اڭسا مۇستافانىڭ سالعان سۋرەتتەرى ينتەرنەت قولدانۋشىلار اراسىندا كەڭ تاراپ، الەۋمەتتىك وزەكتى تاقىرىپتاردا جازىلعان سۋرەتتەرى كوپشىلىك نازارىنا ءتۇسىپ، اڭسا سالعان سۋرەتتەردىڭ تانىمالدىعى ارتتى. سۋرەت - ونەر. ال، اڭسانىڭ سالعان سۋرەتتەرىنىڭ ماقساتى - جاستاردى كەلەڭسىز، جاعىمسىز قىلىقتاردان قورعاۋ.

استانادا قازان ايىنىڭ 14 - دە ەۋرازيا ۇلتتىق ۋنيۆەرسيتەتىندە اڭسا مۇستافانىڭ "سويلە، سۋرەت" دەپ اتالاتىن العاشقى كورمەسى وتەدى. كورمە قارساڭىندا اڭسانى از-كەم اڭگىمە تارتقان ەدىك.

اڭسا مۇستافا، سۋرەتشى:

- الەۋمەتتىك تاقىرىپتارداعى سۋرەتتەر سالۋدى قاشان باستادىڭىز? وعان نە تۇرتكى بولدى؟

- بايقاپ قاراسام، بالا كەزدەن سالىپ كەلە جاتقان سۋرەتتەرىمنىڭ ءبارىنىڭ تاقىرىبى - سول ەكەن. ارينە، بۇعان سەبەپ مامانىڭ گازەتى -  «اق بوساعا». گازەتكە دايىندالعان ماقالالارعا كوركەمدىك قاجەت ەدى. سول كەزدە انامنىڭ قاسىنان ءبىر ەلى قالماي جۇرگەندىكتەن گازەت ىسىنە مەندە قاتىسقىم كەلىپ، ماتەريالدارعا سۋرەت سالىپ كورە باستادىم. ەڭ ءبىرىنشى سالعان سۋرەتىم «ۇيادا نە كورسەڭ، ۇشقاندا سونى ىلەرسىڭ» ەدى.

اڭسا مۇستافا. «ۇيادا نە كورسەڭ، ۇشقاندا سونى ىلەرسىڭ»

بۇنى 14-15 جاسىمدا، مەكتەپتە وقىپ جۇرگەندە سالىپپىن. ول تەمەكىنىڭ تۇقىلى مەن اراق شولمەكتەرىنەن جاسالعان ۇيادا وتىرعان نارەستە بولاتىن. قازىر ەسىمە ءتۇسىپ وتىر. ەكىنشى سالعان سۋرەتىم ادامداردىڭ اياق استىندا تاپتالىپ قالۋعا قورقىپ، ءجۇنى ءۇرپيىپ وتىرعان بالاپان. ءسويتىپ-ءسويتىپ سالعان سۋرەتتەرىمنىڭ كوبىندە سيۋجەت نەمەسە ءبىر پروبلەما ارقاۋ بولىپ بەينەلەنەتىن بولدى.

- ادەتتە، بەلگىلى ءبىر تاقىرىپقا جازۋعا (سۋرەت سالۋ) قانداي ءبىر وقيعا الدەبىر كۇندەلىكتى تىرشىلىكتەن كورگەن جايتتەر اسەر ەتە مە؟

- ارينە، اسەر ەتەدى، بەلگىلى ءبىر كورىنىس كورىپ، قورقىپ نەمەسە جيىركەنىپ، كەلىپ سالىپ تاستاعان سۋرەتتەر بار. مىسالى، ءۇيىمىزدىڭ تەرەزەسى ۇلكەن دۇكەننىڭ تۋ سىرتىنا شىعادى. ساتۋشى قىزدار كۇندەلىكتى سول دۇكەننىڭ ارتىنا تىعىلىپ تەمەكى تارتادى. سولاردىڭ ءبىرى ەكىقابات بولا تۇرا، كەشكە دەيىن تۇتىندەتەتىنىن بايقاپ، تەمەكى تارتىپ تۇرعان ەكىقابات شوشقانى بەينەلەدىم.

اڭسا مۇستافا. شوشقا

بىتىرگەن بويدا سۋرەتتى تەرەزەمنەن سولارعا قاراتىپ قويدىم. كورگەن بولار، بىلمەدىم.

- كورمەڭىزگە قانداي تاقىرىپتا سالىنعان سۋرەتتەرىڭىزدى قوياسىز؟

- كورمەگە سۋرەتتەرىمنىڭ ىشىنەن 50-ءىن تاڭدادىم. نەگىزگى تاقىرىپ -  الەۋمەتتىك پروبلەمالار. قىز-كەلىنشەكتەردىڭ اراق ءىشۋى، ۇيدەگى ۇرىس-كەرىستەن بالانىڭ ۇيدەن قاشۋى، وشاق باسىنداعى اتا-انا جانجالى جانە وسىنداي ءار زومبىلىقتان بالالاردىڭ پسيحولوگيالىق قىنجىلىسقا ءتۇسۋى دەگەن سياقتى.

اڭسا مۇستافا. «انام مەنى ولتىرەتىن شىعار»

سۋرەتتەرىمنىڭ اراسىنداعى ەڭ اۋىرى، بىراق سوعان قاراماستان كەڭ تارالعانى «انام مەنى ولتىرەتىن شىعار» اتتى سۋرەت. ول ينتەرنەت كەڭىستىگىندە كەڭىنەن تاراپ، ونشاقتى تىلگە اۋدارىلىپ كەتتى.

- ءسىزدىڭ سالعان سۋرەتىڭىزدى كورىپ، ويلانعان، ومىرىنە وزگەرىس ەنگىزە باستاعان ادامدار بار ما؟

- وزگەرىس بار-جوعىن بىلمەدىم. بىراق ماعان انا سۋرەت قاتتى اسەر ەتتى، جىلادىم، كۇنى بويى كوڭىل-كۇيىم بۇزىلىپ ءجۇردى دەگەندەر كوپ. اقىن قىزدارىمىزدىڭ ءبىرى وزىنە قاتتى اسەر ەتكەن سۋرەتكە قاراپ ولەڭ شىعارعان كەز دە بولدى. كەيبىر سۋرەتتەرىمدى عالامتورداعى پاراقشامنان الىپ، كومەنتتەرىمەن بىرگە تەلەديداردان دا كورسەتىپ جاتتادى. قوزعاعان تاقىرىپتارىمدى الىپ، ءارى قاراي ءوربىتىپ جاتقاندار بارشىلىق. ەلگە جەتىپ، پايداسى تيسە بولدى عوي. السا الا بەرسىن. نەگىزگى ماقسات قولدان كەلگەنشە جامان قىلىقتاردان جاستاردى قورعاۋ.

- قازىرگى سۋرەتشىلىك ونەردەگى الەۋمەتتىك جەلىنىڭ ءرولى قانداي؟

- سالعان سۋرەتتەرىمنىڭ ءساتتى شىقتى دەپ ەسەپتەگەندەرىمدى فەيسبۋكتەگى پاراقشاما سالىپ ءجۇرمىن. پاراقشامدا دوستارىممەن تالقىلاپ وي ءبولىسىپ تۇرامىز. سۋرەتتەرىمدى ۇناتقاندارى رەتۆيت جاساپ تارالىپ كەتىپ جاتقاندارى دا بارشىلىق. دوستارعا كوپ راحمەت.
الەۋمەتتىك جەلى تەك سۋرەتشىلىك ونەردى ەمەس، بارلىق سالانى دامىتىپ جاتىر عوي. بيشىلەر بيلەرىن يۋتۋبقا سالىپ بولىسسە، اقىندار ولەڭدەرىن جاريالايدى، جۋرناليستتەر ماقالاسىن كوپشىلىككە ۇسىنىپ وتىرادى. الەۋمەتتىك جەلىلەر قازىرگى ءومىردىڭ اجىراماس بولشەگىنە اينالدى عوي.

- سۋرەتتەرىڭىزدىڭ ىشىندە وزىڭىزگە ۇنايتىنى قايسىسى؟

- سۋرەتتەرىمنىڭ ىشىندە وزىمە ەڭ قاتتى ۇنايتىنى كوكتەمدە سالعان «كوكتەمگە دايىندىق» دەگەن سۋرەتىم.

اڭسا مۇستافا. كوكتەمگە دايىندىق

ءبىر ايدان سوڭ، قاراسام، جەر شارىنىڭ ار جاعىنداعى برازيليالىقتار تالقىلاپ جاتقانىن كورىپ قاتتى تاڭ قالىپ، قۋانعانمىن. سول سۋرەتكە سونشا نازار اۋدارعان سوڭ، مەن دە قاراي-قاراي جاقسى كورىپ كەتتىم. ول سۋرەتتە جۇرەگى مەن ميىن، كىر جۋعىشقا سالىپ تازارتىپ وتىرعان قىز بەينەلەنگەن.
- بۇدان كەيىن قازاقستاننىڭ وزگە قالالارىندا بولماسا الىس-جاقىن شەتەلدە كورمەڭىزدى وتكىزۋگە بايلانىستى ۇسىنىستار بار ما؟
- بۇيىرسا، تۇڭعىش كورمەم – «سويلە، سۋرەت» - 14 قازاندا ساعات 12-00 دە، استانادا ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە (ميرزويان كوشەسى، 2) اشىلادى. جاقسى وتسە، سەمەي، الماتىداعى ۋنيۆەرسيتەتتەر دە وتكىزەم. باسقا قالالاردان ۇسىنىس تۇسسە، اپارۋعا ءازىرمىن.

- اڭگىمەڭىزگە راحمەت!

سۇحباتتاسقان – ءومىرجان ابدىحالقىۇلى

Abai.kz