نۇرسۇلتان نازارباەۆ ميحايل گورباچەۆتىڭ كەلەشەكتى بولجاي المايتىندىعىنا دالەل بولاتىن كسرو تاريحىنىڭ كەيبىر ساتتەرى تۋرالى اڭگىمەلەگەن. بۇل تۋرالى Tengrinews.kz جازدى.

"مەن بۇل جۇيەدە جۇمىس ىستەدىم - كەڭەس كەزەڭىندە ءسوتسياليزمدى وزگەرتىپ، ارى قاراي جىلجۋعا بولادى دەپ ەسەپتەگەن گورباچەۆ رەفورمالارىن سىناۋشىلاردىڭ ءبىرى بولدىم. ونىڭ "ادام كەلبەتى بار سوتسياليزم" دەگەن ءسوزى بولدى. ونىڭ نە ەكەنىن ەشكىم تۇسىنبەيتىن. بالكىم، ەكونوميكاعا جاقىن دەگەندى ايتقىسى كەلگەن شىعار. بىراق ەگەر مەملەكەتتىك كومپانيالار كورپوراتيۆتىك نارىقتىق قاعيدالارمەن باسقارىلاتىن بولسا، بۇل پروبلەما، وزدەرىڭىز كورگەندەي، تابىستى شەشىلەر ەدى", - دەپ سويلەگەن نازارباەۆ "سامۇرىق-قازىنا" ترانسفورماتسياسى فورۋمىندا.

ول قازاقستان ءۇشىن قىتايدىڭ مەملەكەتتىك كومپانيالارى اناعۇرلىم جارقىن ۇلگى بولا الاتىنىن تىلگە تيەك ەتكەن.

"مەن گورباچەۆ رەفورمالارى تۇرالاي باستاپ، ونىڭ ەشقايدا اپارمايتىنىن كورسەتكەن كەزدە بۇدان شىعار جولدى ىزدەپ، شارق ۇردىم. مەن وعان جاقىن بولدىم، كەڭەستەر ايتۋعا تۋرا كەلدى. "ەگەر سىزدە ەشقانداي باعدارلاما، ستراتەگيا بولماسا، قىتايعا كوڭىل اۋدارايىق" دەدىم. سونداي مەملەكەتتىك قۇرىلىمعا، ءىس جۇزىندە ءتارتىپتىڭ قاڭقاسى بولعان كوممۋنيستىك پارتيا سياقتى جەتەكشى كۇشكە يە بولا وتىرىپ، ورتالىق كوميتەتتىڭ قاۋلىسىن قابىلداپ، پارتياعا نارىقتىق رەفورمالار جۇرگىزۋدى بۇيىرۋعا بولاتىن ەدى. پارتيا ونى جۇرگىزەر ەدى، سونداي ءتارتىپ بولدى. بىراق ول: "قىتاي دەگەن ءبىز ءۇشىن كىم، ءبىز - كەڭەس وداعىمىز، قىتايعا تەڭەسۋگە بولا ما؟ بۇل بىزگە جارامايدى دەدى. شىن مانىندە، قىتايدا جۇرگىزىلگەن رەفورمالار جاقسى ناتيجە بەردى. ارى قاراي قالاي بولاتىنىن تاريح كورسەتەدى، بىراق جەتىستىگى كوزگە انىق كورىنىپ تۇر", - دەدى قازاقستان پرەزيدەنتى. 

اباي-اقپارات