كەشەلى بەرى الەۋمەتتىك جەلىلەردى وسى ءبىر سۋرەت كەزىپ ءجۇر. بۇل سۋرەتتە «قايرات»-«اقتوبە» ويىنىنا بارعان جانكۇيەرلەر كورىنىس تاپقان.

 «كىشى ءجۇز» دەگەندى كىسى بويىنداي ەتىپ جازىپ العان جانكۇيەرلەر شاماسى –«اقتوبە» كومانداسىنىڭ جانكۇيەرلەرى بولسا كەرەك. بىراق اقتوبەلىكتەردىڭ بۇنداي «جانكۇيەرلىگى» قاتتى ايىپتالۋدا. مىسالى، فەيسبۋكتىڭ بەلسەندى اۆتورلارىنىڭ ءبىرى، بەلگىلى تەلەجۋرناليست، پروديۋسەر سەرىك اباس-شاح: «بۇل جانكۇيەرلىك ەمەس، ەسەلاڭدىق...
جۇزباقايلار!
نامىسقوي بولساڭ، جيرينوۆسكي قازاقتى كەمسىتكەندە نەگە ۇندەمەدىڭ؟ قىزۋ قاندى بولساڭ، پۋتين تاريحىمىزدى تابانعا سالعاندا قايدا قارادىڭ؟ مىقتى بولساڭ، نەگە سول كەزدە قازاق دەپ ۇراندامادىڭ؟ الاڭعا نەگە شىقپادىڭ؟

ر.S. ۇلتتىڭ ۇلىلىعىن جاساي الماعان ەلدە، پاسىقتىق پەن سورلىلىقتىڭ سالتانات شەرۋى باستالادى» دەپ جازسا، ساياساتتانۋشى ەرلان قارين:  «فۋتبولدىڭ فاناتتارى ما، الدە رۋشىلدىقتىڭ فاناتتارى ما؟ ىشتەگى اۋرۋلاردىڭ ءبىرى، وندايدى قاتاڭ تىيۋ كەرەك. فۋتبول دا ەمەس، رۋ دا ەمەس، ەڭ الدىمەن ەلدىڭ جانكۇيەرى بولۋى قاجەت» دەدى ءوزىنىڭ جەكە پاراقشاسىنداعى جازباسىندا.

رەداكتسيادان: كەيىنگى كەزدەرى وسىنداي ءبىر كەلەڭسىزدىكتەر كورىنىس بەرىپ قالىپ ءجۇر. وتكەندە ءبىر بىلگىش الەۋمەتتىك جەلىدە وتىرىپ الىپ قازاقتىڭ سانىن اتا-رۋ شەڭبەرىنە سالىپ «ساناپ» شىعىپ ەدى، ەندى «جانكۇيەرلەر» وسىلايشا جانىعىپتى. ءبىر تاڭقالارلىعى رۋ مەن ءجۇزدىڭ اڭگىمەسى رف باسشىسى پۋتين «قازاقتا بۇرىن مەملەكەت بولماعان» دەپ ساۋەگەيسىگەننەن بەرى ءجيىلىپ بارا جاتقانعا ۇقسايدى. ارينە، بۇنداي «ۇساق-تۇيەكتى» ءبىر ەلدىڭ پرەزيدەنتىنەن كورۋدى ءجونسىز دەسەكتە، سىرتقى كۇشتەردىڭ كوكەيىن تەسكەن ويى مەن پيىعىلىنا جانىپ تۇسەتىن جانداردىڭ ىشىمىزدە جوق ەمەستىگىن دە ەسكەرە جۇرگەن ابزال بولار دەيمىز. مىنانداي جانكۇيەرلىكتىڭ جارعا جەتەلەۋى مۇمكىن ەكەندىگىن دە وسى رەتتە ەسكە سالامىز.

Abai.kz