وسى جاعدايدى جازار- جازباسىمدى بىلمەي ءۇش- ءتورت كۇن ءجۇردىم. كادىمگى، قاتارداعى جايت. دابىراتىپ، ناسيحاتتايتىن شارۋا ەمەس. سارا الپىسقىزى دا  كوتەرمەلەۋگە ءزارۋ ەمەس...

اپتانىڭ باسىندا سارا نازارباەۆانىڭ ءىنىسى - ساياحات قوناقاەۆ قايتىس بولىپ، مارقۇمدى قاراكەرەي قابانباي باتىردىڭ كەسەنەسىنىڭ جانىنا اكەلىپ جەرلەگەن ەدى. عالامتور  ساياحات الپىسۇلى تۋرالى  كوز تانىستارىنىڭ، قىزمەتتەستەرىنىڭ پىكىرلەرى مەن كوڭىل ايتۋلارىنا تولىپ كەتتى. وڭدىسى، ءار ءتۇرلى، كەيدە ورىنسىز سوزدەر جازىلا بەرەتىن سايتتاردىڭ بارلىعى وسى جولى تەك قانا دۇرىس سويلەپ، مارقۇمنىڭ وتە قاراپايىم، كىشىپەيىل، كوپشىل، قامقورشىل مىنەزدەرىنە نازار اۋداردى. بۇگىن دە ساياحاتپەن بىرگە ىستەگەن ءبىر توپ قاتارداعى قىزمەتكەرلەر كەلىپ، قۇران وقىتتى. مارقۇم جونىندە ريزاشىلىقپەن سويلەدى. وسى اڭگىمە قولىما قالام العىزدى.

جەرلەۋ راسىمىنە ەلباسى وتباسىمەن تۇگەل قاتىستى. كوپشىلىك توپىراق سالىپ بولىپ اۆتوبۋس، ماشينالارىنا ءمىنىپ جاتقاندا ەلباسى تاعى ءبىر قايتارا قۇران وقۋدى ءوتىندى. باتا جاسالعان سوڭ نۇرسۇلتان ابىشۇلىمەن قاتار تۇرعان سارا الپىسقىزى باس اعاشتاعى «قوناقاەۆ ساياحات الپىسۇلى» دەگەن ءسوزدى وقىپ:

-نەگە «ەۆ» دەپ جازعان، مۇنىڭ كەرەگى جوق، «قوناقاي ساياحات الپىسۇلى» دەپ جازىلعانى دۇرىس بولادى، وزگەرتكەن ءجون،- دەپ، ءىنىسىنىڭ تەگىن قازاقشالاۋعا  ىقىلاس تانىتتى.

ءىنىسىن باقيعا اتتاندىرىپ سالىپ، قايعى ەڭسەسىن باسىپ تۇرسا دا، زاتى قازاق ەكەنىن ەسىنەن شىعارماعان سارا الپىسقىزىنىڭ مىنا ونەگەسى ءىشىمدى جىلىتىپ سالا بەردى. ريزا بولدىق.

تاقتاشا تەز قازاقشالانىپ، تاپسىرىلعانداي جازىلدى.

Abai.kz