قازاقستان رەسپۋبليكاسى

                                                                                      پرەمەر-ءمينيسترى 

                                                                                      ك.ق. ماسىموۆكە

قۇرمەتتى كارىم قاجىمقانۇلى!

وزىڭىزگە بەلگىلى، ەلىمىزدە قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى ىسكە اسىرىلۋدا.

باعدارلامانىڭ ماقساتى قازاقستاندا تۇراتىن بارلىق ەتنوستاردىڭ تىلدەرىن ساقتاي وتىرىپ، ۇلت بىرلىگىن نىعايتۋدىڭ اسا ماڭىزدى فاكتورى رەتىندە مەملەكەتتىك ءتىلدىڭ كەڭ اۋقىمدى قولدانىسىن قامتاماسىز ەتەتىن ۇيلەسىمدى ءتىل ساياساتى بولىپ تابىلادى.

باعدارلامانى ىسكە اسىرۋعا رەسپۋبليكالىق جانە جەرگىلىكتى بيۋدجەتتەردىڭ قاراجاتى، سونداي-اق قازاقستان رەسپۋبليكاسىنىڭ زاڭناماسىندا تىيىم سالىنباعان باسقا دا قاراجاتتار باعىتتالعان. باعدارلامانىڭ ءبىرىنشى كەزەڭىن ىسكە اسىرۋعا مەملەكەتتىك بيۋدجەتتەن كوزدەلگەن جالپى شىعىن 19 134 946 مىڭ تەڭگەنى قۇرايدى.

ال 2015-2020 جىلدار ىشىندە باعدارلامانى قارجىلاندىرۋ كولەمى قازاقستان رەسپۋبليكاسىنىڭ زاڭناماسىنا سايكەس رەسپۋبليكالىق جانە جەرگىلىكتى بيۋدجەتتەردى ءتيىستى قارجىلىق جىلعا قالىپتاستىرۋ كەزىندە ناقتىلاناتىن بولادى.

وسى باعدارلامانى ىسكە اسىرۋ ماقساتىندا جەرگىلىكتى اتقارۋشى ورگاندار مەملەكەتتىك كاسىپورىندار – مەملەكەتتىك ءتىلدى وقىتۋ ورتالىقتارىن قۇردى.

سونىمەن بىرگە، مەملەكەت باسشىسىنىڭ تاپسىرماسىن ورىنداۋ بارىسىندا ەلىمىزدە جەكەشەلەندىرۋدىڭ 2014-2016 جىلدارعا ارنالعان كەشەندى جوسپارى بەكىتىلدى.

وسى باعدارلامانى ىسكە اسىرۋ مەملەكەتتىڭ ەل ەكونوميكاسىنا قاتىسۋىن قىسقارتۋعا جانە وعان جەكە سەكتوردىڭ ۇلەسىن ارتتىرۋ ەسەبىنەن ونىڭ نەگىزىن نىعايتۋعا باعىتتالعان.

جەكەشەلەندىرۋ كاسىپكەرلىكتىڭ دامۋى ءۇشىن مىقتى سەرپىن بەرۋى ءتيىس، ول باسەكەلەستىكتىڭ بولۋىنا الىپ كەلىپ، تۇرعىندارعا كورسەتىلەتىن قىزمەتتەردىڭ ساپاسىن ارتتىرادى جانە ولاردىڭ تۇرمىسىن جاقسارتادى.

جەكەشەلەندىرۋدىڭ 2014-2016 جىلدارعا ارنالعان كەشەندى جوسپارىنا سايكەس، باسەكەلەستىك ورتاعا بەرۋگە جاتاتىن مەملەكەتتىك اكتيۆتەردىڭ جانە كۆازيمەملەكەتتىك سەكتوردىڭ تىزبەسى بەكىتىلدى.

شىنايى ەكونوميكا سەكتورىنا قاجەتتىلىگى از مەملەكەتتىك ۇيىمدار دا جەكەشەلەندىرۋگە شىعارىلدى.

جەكەشەلەندىرۋگە شىعارىلعان كاسىپورىنداردىڭ شىعىنى مول نەمەسە اكتيۆتەرى ءوسىپ كەتكەن، ولاردىڭ تىكەلەي نەمەسە جاناما تۇردە مەملەكەت تاراپىنان سۋبسيديا ءبولۋ ەسەبىنەن قامتاماسىز ەتىلىپ كەلگەنى انىق.

ايتالىق، وبلىستار مەن اۋدان اكىمدىكتەرى وڭىرلىك كوممۋنالدىق يەلىگىندەگى مەملەكەتتىك كاسىپورىنداردى – مەملەكەتتىك ءتىلدى وقىتۋ ورتالىقتارىن ساتۋعا شىعارىپ وتىر.

بۇل ورتالىقتار تەك قانا بيۋدجەت قاراجاتىمەن جۇمىس ىستەپ تۇر جانە ۇلكەن اكتيۆتەرى جوق. مەملەكەتتىك تىلگە قىزىعۋشىلىق ارتىپ وتىرسا دا، ورتالىق جۇمىستارىنان ازاماتتارىمىزدىڭ حابارى جوق، جۇمىستارى اشىق ەمەس، ناتيجەسى بەلگىسىز. ال، جەكەشەلەندىرۋدىڭ باستى شارتى اشىقتىق.

باسەكەلەستىك ورتادا نارىقتى وتكىزۋ كاسىپكەردىڭ نەگىزگى پروبلەماسى بولىپ تابىلادى جانە كەز كەلگەن كاسىپورىننىڭ رەنتابەلدىلىگى سوعان بايلانىستى ەكەنى انىق. ال، الەۋمەتتىك باعىتتاعى ءبىز اتاعان كاسىپورىندار قازىردىڭ وزىندە قارجىلاندىرۋ كوزىمەن جانە نارىقتى وتكىزۋمەن قامتاماسىز ەتىلگەن.

ەگەر، بۇل مەكەمەلەردى جەكەشەلەندىرسەك مەملەكەتتىك تاپسىرىسسىز، قارجىلىق قولداۋسىز ورتالىقتاردىڭ كەلەشەگى جوق جانە جويىلىپ كەتەدى. ال، مەملەكەتتىك تاپسىرىستى ساقتاپ قارجىلاندىرساق، ورتالىقتار بۇرىنعىداي  «جابىق» تۇردە جاۋاپكەرشىلىكسىز جۇمىسىن جالعاستىراتىن بولسا، وندا ولار جۇمىس ىستەۋ تەتىكتەرىنەن ايىرىلىپ، باسەكەلەستىگى جوق ورتادا جەكەلەگەن ادامداردىڭ تابىس كوزىنە اينالادى جانە سىبايلاس جەمقورلىق قۇقىق بۇزۋشىلىعىنا جول اشادى، سونداي-اق مەنشىك يەسىندە ماسىلدىق كوڭiل-كۇيدi تۋدىرادى.

سونىمەن بىرگە، مەملەكەتتىك كاسىپورىننىڭ جاڭا مەنشىك يەسى كىم بولاتىنى بەلگىسىز، ول مەملەكەتتىك ءتىلدىڭ دامۋىنا شىنىمەن دە جانى اشيتىن ادام با نەمەسە جەكە باس پايداسىن عانا ويلايتىن ادامدار ما؟!

مەملەكەتتىك ءتىلدى دامىتۋعا تابىس كوزى دەپ ەمەس، الەۋمەتتىك جانە مەملەكەتتىك ماڭىزدى جوبا دەپ قاراۋىمىز كەرەك.

اتالعان ورتالىقتاردى جەكەشەلەندىرگەن جاعدايدا، باعدارلامانىڭ نەگىزگى ماقساتى – قازاقستاندا تۇراتىن بارلىق ەتنوستاردىڭ تىلدەرىن ساقتاي وتىرىپ، ۇلت بىرلىگىن نىعايتۋدىڭ اسا ماڭىزدى فاكتورى رەتىندە مەملەكەتتىك ءتىلدىڭ كەڭ اۋقىمدى قولدانىسىن قامتاماسىز ەتەتىن ۇيلەسىمدى ءتىل ساياساتىنا –  انىق قول جەتكىزبەگەندەي بولامىز.

اقجول پارتياسى بيزنەستىڭ باسەكەلىك ورتادا دامىعانىن قولدايدى. بىراق، مەملەكەتتىك ءتىلدى ۇيرەتۋدى نارىقتىق باسەكەلى ورتاعا شىعارىپ، مەڭگەرۋدى ازاماتتارىمىزدىڭ قالتاسىمەن بايلانىستىرۋ قانشالىقتى دۇرىس؟!

جوعارىدا اتالعانداردى ەسكەرە كەلىپ، قۇرمەتتى كارىم قاجىمقانۇلى، سىزدەن مەملەكەتتىك ءتىلدى وقىتۋ ورتالىقتارىن جەكەشەلەندىرۋ تۋرالى ماسەلەنى قايتا قاراۋىڭىزدى سۇرايمىز.

قۇرمەتپەن،

«اق جول» قدپ فراكتسياسىنىڭ  دەپۋتاتتارى   

ا. تۇرتاەۆ

ا. پەرۋاشەۆ

ە. نيكيتينسكايا

ا. ابىلداەۆ

ن. جازىلبەكوۆ

ت. ەرعاليەۆ

س. قادىراليەۆا

 م. قازبەكوۆا

«قازاقستان حالقى اسسامبلەياسى» دەپۋتاتتىق توبىنىڭ دەپۋتاتتارى 

ن. نەستەروۆا

ز. ساياپوۆا