بىزدىڭ قوستاناي وبلىسىنىڭ اكىمى نۇرالى سادۋاقاسوۆ تىلشىلەر قاۋىمىن ونشا قاسىنا تارتا بەرمەيدى. تەك ءوزىنىڭ اۋدان مەن قالالاردى ارالاعان ساپارىندا نوكەر رەتىندە ەرتىپ جۇرۋگە عانا رۇقسات ەتەدى. وندا دا بيۋدجەتتەن ناپاقا تاۋىن جۇرگەن ءباسپاسوزدىڭ ءوزىن گازەتتىڭ ءبىرىنشى بەتىنەن تۇسىرمەي، بۇكىل وبلىستا داڭعازا ەتىپ ماقتاۋ ءۇشىن عانا. وسى قاسيەتىنەن دە شىعار. نۇرالى مۇستافاۇلى ءوڭىرىمىزدىڭ بيلىگىن قولىنا العان ءۇش جىلدىڭ ىشىندە جۋرناليستەرمەن ءبىر ەمىن-ەركىن شۇيىركەلەسە قويماپتى. مۇمكىن، مۇنىڭ ءوزى  كەزىندە مىقتاپ تۇرىپ  مەكتەبىنەن وتكەن، سىرت كوزگە سىر بەرمەيتىن بۇرىنعى اكىمىمىز كۋلاگين مىرزادان جۇققان شىعار. كەزىندە سەرگەي ۆيتالەۆيچ تە ءباسپاسوز اتاۋلىدان سىرتاڭقىراپ ءجۇردى.

     سويتكەن اكىمىمىز جاقىندا «كەرەمەت دەموكراتيالىق» مىنەز تانىتتى. دۇيسەنبى كۇنگى ءوزىنىڭ اپپاراتىنىڭ وتىرىسىنان كەيىن وسى ماجىلىسكە شاقىرىلعان جۋرناليستەر قاۋىمىن جەدەل جيناپ الىپ، جەدەلدەتىپ ءباسپاسوز ءماسليحات وتكىزسىن. تىلشىلەر قاۋىمى ابدىراپ قالعان، باياعى «مەن دە اڭ-تاڭ، اپام دا اڭ-تاڭنىڭ» كۇيىن كەشىپ وتىر. ءبىر جاعىنان «وبلىس اكىمى وڭىرىمىزدە قوردالانىپ قالعان پروبلەمالاردى ايتىپ، ءبىر اشىق-جارقىن اڭگىمەلەسەتىن شىعار» دەگەن ۇمىتتە ەدى.

  «باقساق، باقا ەكەن» دەگەندەي، سويتسەك اكىمىمىزدىڭ ويى مۇلدەم باسقادا ەكەن. وبلىستىڭ قاداۋ-قاداۋ ماسەلەلەرىن ەمەس، جەكە باسىنىڭ رەنىشىن ايتۋدى ءجون ساناپتى. سالعاننان-اق «كەيبىرەۋلەر سىزدەردىڭ مەنەن ءوز ساۋالدارىڭىزعا جاۋاپ الا المايدى دەگەندى ايتادى،--دەپ باستادى ءبىسمىللاسىن.—مىنەكەي الدارىڭىزدا تۇرمىن عوي، سۇراي بەرىڭىزدەر»--دەپ تاعى دا «مىرزالىق» تانىتىپ جاتى. بەينە ءبىر الدىن-الا جوسپارلانعان ارنايى ءباسپاسوز ءماسليحاتىن وتكىزۋگە كەلگەندەي. ءسىرا، اكىمىمىز بۇل «جۇزدەسۋدىڭ» الگى جينالىستىڭ جالعاسى ەكەندىگىن مۇلدەم ۇمىتىپ كەتسە كەرەك.

    ەشكىمگە ءسوز بەرمەي، ءوزى سويلەگەن اكىمىمىزدىڭ رەنىشى ءبىر تۇيەگە جۇك بولعانداي كورىنەدى. بۇكىل ەلدى شۋلاتقان قامىستى اۋدانى اكىمىنىڭ ورىنباسارى داۋلەتباي قۇلمانوۆتىڭ استاناعا بارىپ 1,5 ميلليون تەڭگەگە مەيرامحانادا بىرەۋلەردى تويعىزعاندىعى جايلى (مۇنى كەزىنە وسى سايتتا جازعانبىز) ايتقانى ءتىپتى قىزىق شىقتى. استاناعا ساپارعا شىققان شىعىن دەمەۋشىلەردىڭ اقشاسى ەكەن. بيۋدجەتتىكى ەمەس. سوندىقتان دا مۇندا تۇرعان ەشتەڭە جوق. ۇساق-تۇيەك ماسەلە عوي. اكىمنىڭ ورىنباسارى كىنالى بولىپ شىقتى، سول ءۇشىن قىزمەتىنەن كەتتى. ياعني ءىس ءبىتتى، قۋ كەتتى دەگەنگە سايادى. ال سول قۇلمانوۆتىڭ جالعىز ءوزىنىڭ ارەكەتى وبلىسىمىزداعى بارلىق مەملەكەتتىك قىزمەتكەرلەرىنىڭ بەدەلىنە نۇقسان كەلتىردى-اۋ دەگەن ويدى ەستىمەدىك. سوندا قالاي، اكىمدەر مەن ونىڭ ورىنباسارلارى دەمەۋشىلەردىڭ بەلگىلى ءبىر ماسەلەنى شەشۋگە بەرگەن قارجىلارىن وڭدى-سولدى شاشا بەرۋىنە بولا ما ەكەن؟

     جاقىندا وبلىسىمىزدى عانا ەمەس، بۇكىل ەلىمىزدى شۋلاتقان تاعى ءبىر جايت-- اكىمنىڭ سۋ جاڭا دجيپ ساتىپ الىپ، وعان بۇرىنعى كولىگىنىڭ ءنومىرىن تاعىپ الىپ، ىڭ-شىڭسىز جۇرگەندىگى ەدى. مۇندا دا ول كىسىنىڭ ەشبىر كىناسى جوق بولىپ شىقتى. ءبارىن بۇلدىرگەن وسى وبلىستىق اكىمدىككە قىزمەت كورسەتەتىن «شارۋاشىلىق» دەپ اتالاتىن سەرىكتەستىك ديرەكتورى كورىنەدى. بۇل ەشتەڭەنى بىلمەي قالىپتى. مىنە، بۇعان دا جاۋابى ءازىر.

     كەزىندە رەسپۋبليكالىق باسىلىمدار قايتا-قايتا جازعان وسىنداعى قارابالىق قۇس فابريكاسىنىڭ مۇشكىل حالىنە دە بۇل كىسىنىڭ قاتىسى شامالى. ميللياردتاعان قارجى قۇيىلسا دا ءبىر كۇن دە جۇمىس ىستەمەگەن  بۇل قۇس فابريكاسىنىڭ بانكروتقا ۇشىراۋى سونداعى مەنەدجمەنتتىڭ ولقىلىعىنان. ال سول تۇستا وبلىس اكىمىنىڭ ورىنباسارى رەتىندە ءدال وسى كاسىپورىننىڭ جۇمىسىنا تىكەلەي جاۋاپتى قازىرگى اكىمىمىز تىم شاراسىز بولىپ قالىپتى.

    ال اكىمىمىزدىڭ ەڭ باستى رەنىشى جۋرناليستەر بۇل كىسىنىڭ ەڭبەگىن باعالامايتىن كورىنەدى. كەيىنگى كەزدەرى ءوزى تۋرالى باسپاسوزدە ماتەريالدار تىم كوپ جازىلاتىنى بايقالادى. بۇل كىسىنىڭ ىسىنە تىلشىلەر قاۋىمى تىم ءۇڭىلىپ كەتىپتى. نەگە ەكەنىن ءوزى دە تۇسىنبەي دال. وبلىس اكىمدەرىنىڭ ىشىندە ءوزىنىڭ رەيتىنگىسىنىڭ تىم تومەن ەكەندىگى دە ادىلەتسىز دەگەن ويدا. ءوزى ەشكىمنەن دە ولقى تۇسپەيدى ەكەن. ال رەيتينگى كوتەرىلمەيدى.

   مىنەكەي، اياق استىنان وتكىزىلگەن «لەزدەمەدەن» ەستىگەنىمىز وسى. جۋرناليستەر كوپ سۇراق قويعان جوق. تەك وسىنداعى ءوزىن تاۋەلسىز سەزىنەتىن «ناشا گازەتا» اپتالىعىنىڭ ءتىلشىسى عانا وتكىر ماسەلەلەردى كوتەردى. ال بيۋدجەتتەن مول قارجى الىپ، ناپاقاسىن ايىرىپ وتىرعان مەملەكەتتىك تىلدەگىسى دە، ورىس تىلدەگىسى دە تىم بەلسەندىلىك تانىتا قويمادى. ولار ءسىرا «اش قۇلاقتان تىنىش قۇلاق» دەگەن شىعار.

مۇراتبەك داۋرەنۇلى.

قوستاناي.

ءAbaى.kz