بۇگىن پاۆلودار قالاسىندا قازاقتىڭ كورنەكتى جازۋشىسى، دراماتۋرگ، پۋبليتسيست، ابايدان كەيىنگى قازاق ادەبيەتىنىڭ نەگىزىن قالاۋشىلاردىڭ ءبىرى، پەداگوگ-عالىم جۇسىپبەك ايماۋىتوۆتىڭ تۋعانىنا 125 جىل تولۋ ايتۋلى داتاعا وراي ەسكەرتكىش اشىلدى.  

الاش زيالىسىنىڭ قۇرمەتىنە ارنالعان ەسكەرتكىش جۇسىپبەك ايماۋىتوۆ اتىنداعى قازاق مۋزىكالى دراما تەاترىنىڭ الدىندا ورناتىلدى.

- ءمۇسىننىڭ بيىكتىگى 3,6 مەتردى قۇرايدى. ال تۇعىمەن بىرگە بيىكتىگى - 7,6 مەتر. جۇسىپبەك ايماۋىتوۆتىڭ ەسكەرتكىشى قولادان قۇيىلعان، تۇعىرى قويۋ قارا ءتۇستى جىلتىر گرانيتتەن سوعىلعان. ەسكەرتكىشتىڭ اۆتورى - استانالىق ءمۇسىنشى ەرمەك توقتاروۆ. قالا تۇرعىندارى ءمۇسىندى كورىپ، الاش ارداقتىسىنىڭ الىپ تۇلعاسىن، دارالىعىن كوزگە ەلەستەتەدى. سەبەبى، مۇسىنشىلەر ءبىرىنشى كەزەكتە جازۋشىنىڭ بەينەسىنە ءمان بەرگەن، - دەپ حابارلادى مادەنيەت باسقارماسىنان.

قالامگەر ەسكەرتكىشى «كەرەمەت-پۆ» جشس-تىڭ، جەرگىلىكتى ىسكەر كاسىپكەرلەردىڭ دەمەۋشىلىك كومەگى ارقاسىندا بوي كوتەردى.

         ەسكەرتكىشتىڭ سالتاناتتى اشىلۋىنان كەيىن س.تورايعىروۆ اتىنداعى پمۋ-دە رەسپۋبليكالىق عىلىمي-پراكتيكالىق كونفەرەنتسيا ءوتتى.  

سونىمەن قاتار، بۇگىن ساعات 18.00-دە قالامگەر ەسىمى بەرىلگەن وبلىستىق قازاق تەاترى 25-ءشى ونەر ماۋسىمىن الاش ارداقتىسى جۇسىپبەك ايماۋىتوۆ بەينەسى سومدالاتىن «ار الداسپانى - ايماۋىتوۆ» قويىلىمىمەن اشىلادى. بۇل ءبىرتۋار تۇلعا - جۇسىپبەك ايماۋىتوۆتىڭ ساحنالىق بەينەسىن پاش ەتكەن العاشقى پەسا. قويىلىم اۆتورى – قر حالىق ءارتىسى، رەجيسسەر-دراماتۋرگ ەرسايىن تولەۋباي. پەسا سيۋجەتىندە اتاقتى جەرلەسىمىزدىڭ ءماشھۇر ءجۇسىپ كوپەەۆ، جۇمات شانين، مۇحتار اۋەزوۆ پەن امىرە قاشاۋباەۆتارمەن كەزدەسكەن ساتتەرى دە پاش ەتىلەدى.

«ار الداسپانى - ايماۋىتوۆ» سپەكتاكلى جۇسىپبەك ايماۋىتوۆتىڭ 125 جىلدىعىنا وراي ۇيىمداستىرىلعان رەسپۋبليكالىق تەاترلار فەستيۆالىندە كورەرمەنگە جول تارتقان بولاتىن.

جازۋشى مەرەيتويى تۋعان جەرى - باياناۋىل اۋدانىندا دا جالعاسىن تابادى. 20 قىركۇيەك كۇنى «ارداقتى الاش ازاماتى» اتتى مۋزىكالى-ادەبي كەش جانە ۇلتتىق ات سپورت تۇرلەرىنەن جارىستار باياناۋىل اۋدانى مويىلدى القابىندا وتەدى دەپ جوسپارلانعان.

ايتۋلى مەرەيتويعا ارنايى كەلگەن قوناقتار: عالىم جايلىباي، اكىم تارازي، عاريفوللا ەسىم، اشىربەك سىعاي، قالامگەردىڭ نەمەرەسى ريما ايماۋىتوۆا مەن ۆاسيلي ايماۋىتوۆ جانە جازۋشىنىڭ اتالاس تۋعان-تۋىستارى، پاۆلودار وبلىسىنىڭ زيالى قاۋىم وكىلدەرى. 

قازاق زيالى قاۋىمىنىڭ ءىرى تۇلعاسى، اتاقتى قالامگەر، دراماتۋرگ، الاشوردا قايراتكەرى جۇسىپبەك ايماۋىتوۆتىڭ كىندىك قانى تامعان باياناۋىل وڭىرىنەن ءبىر ۋىس توپىراق جازۋشى جەرلەنگەن ماسكەۋ قالاسىنداعى ۆاگانكوۆسكي زيراتىنا 5 قىركۇيەك كومىلگەن بولاتىن.

31 مامىر - ساياسي قۋعىن-سۇرگىن قۇرباندارى ەسكە الۋ كۇنى پاۆلودار قالاسىندا وتكەن ميتينگتە وبلىس اكىمى قانات بوزىمباەۆ الاشوردا قايراتكەرى ج.ايماۋىتوۆتىڭ سۇيەگى جاتقان زيراتقا تۋعان جەرى – باياناۋىلدان توپىراق اپارىپ، باسىنا دۇعا وقىپ، پاۆلودار وبلىسىنان ارنايى دەلەگاتسيا جىبەرۋ تۋرالى باستاما كوتەرگەن بولاتىن. 

وبلىس اكىمىنىڭ باستاماسىمەن ماسكەۋ قالاسىنا قالامگەردىڭ تۋعان جەرىنەن الىنعان توپىراقتى پاۆلودار وبلىسىنىڭ دەلەگاتسياسى: زيالى قاۋىم وكىلدەرى مەن جازۋشىنىڭ تۋعان-تۋىستارى جەتكىزدى.  

ەستەرىڭىزدە بولسا، وسىدان ەكى اي بۇرىن رەسەي فەدەراتسياسىنىڭ ورتالىق ارحيۆىنەن جۇسىپبەك ايماۋىتوۆتىڭ سۇيەگى ۆاگانكوۆسكي زيراتىندا «باۋىرلاستار قابىرىندە» (وبششايا موگيلا) جەرلەنگەن دەگەن جاۋاپ-حات كەلگەن ەدى. بۇل ۇلكەن قابىرستاندا ساياسي قۋعىن-سۇرگىن قۇرباندارى جەرلەنگەن.

كاپسۋلانى تابىستاۋ راسىمىندە ج.ايماۋىتوۆتىڭ نەمەرەسى ريما ايماۋىتوۆا مەن قر جازۋشىلار وداعىنىڭ مۇشەسى، جۋرناليست سايلاۋ بايبوسىن قالامگەر ءومىرى مەن شىعارماشىلىعى تۋرالى ءسوز سويلەگەن ەدى.          ودان كەيىن پاۆلودارلىق دەلەگاتسيا ۇلى وتان سوعىسى جاۋىرگەرلەرى ەسكەرتكىشىنە گۇل شوقتارىن قويۋ راسىمىنە قاتىسقان بولاتىن.

اباي-اقپارات