پەتر پوروشەنكو "كرەملدىڭ ورىس تىلدىلەردى قورعاۋ ساياساتى ۋكراينادا سوعىس شىعارعانىن" جانە كرەملدىڭ بۇل پوزيتسياسى بىرقاتار ەلدەرگە، ونىڭ ىشىندە قازاقستانعا دا قاتەر توندىرەتىنىن ايتتى. بۇلاي دەپ ازاتتىق راديوسى جازدى. قىركۇيەكتىڭ 18-ءى كۇنى ۋكراينا پرەزيدەنتى پەتر پوروشەنكو اقش كونگرەسى پالاتالارىنىڭ بىرىككەن وتىرىسىندا سويلەپ، قازاقستان جايلى دا ايتقان.

مىنبەردە پوروشەنكو 20 جىل بۇرىن بۋداپەشت مەموراندۋمىنا قول قويىلعانىن ەسكە الدى. ول كەلىسىم بويىنشا يادرولىق قارۋدان باس تارتقانى ءۇشىن ۋكراينانىڭ تەرريتوريالىق تۇتاستىعى مەن شەكارالارىنىڭ مىزعىماستىعىنا اقش، ۇلىبريتانيا، رەسەي، فرانتسيا جانە قىتاي كەپىلدىك بەرگەنىن ايتقان ۋكراينا پرەزيدەنتى "سونداعى جەتكەن جەرىمىز رەسەي اگرەسسياسى بولىپ وتىر. وكىنىشكە وراي، كەڭەس وداعى قۇلاعانىمەن، ول ءالى ادامداردىڭ ساناسىندا ءومىر ءسۇرىپ جاتىر جانە رەۆيزياشىل ينستينكتەر ءالى بار. 2008 جىلى رەسەي ابحازيانى، وڭتۇستىك وسەتيانى باسىپ الدى. ەتنيكالىق ورىستاردى جانە ورىس تىلدىلەردى قورعاۋ قۇقىعىن جاريالاۋ ۋكراينادا سوعىس ءورتىن تۇتاتۋعا جەتكىلىكتى بولدى. ولار (ەتنيكالىق ورىستار مەن ورىس تىلدىلەردى ايتادى - رەد.) قازىر مولدوۆادا، قازاقستاندا، گرۋزيادا، بالتىق ەلدەرىندە، پولشادا، بولگاريادا، ءتىپتى اجەپتاۋىر بولىگى گەرمانيادا تۇرادى. كەلەسى كەزەكتە قاي ەل تۇر؟" دەيدى.

پەتر پوروشەنكو كونگرەسس مۇشەلەرى الدىندا ءبىر ساعاتتاي سويلەگەن. اقش دەپۋتاتتارى بىرنەشە مارتە ورىندارىنان تۇرىپ، قول سوعىپتى. پەتر پوروشەنكو اقش-قا رەسمي ساپارمەن قىركۇيەكتىڭ 18-ءى باردى. ساپارى بارىسىندا ول اقش پرەزيدەنتى باراك وبامامەن كەزدەسكەن.

Abai.kz