بۇگىن، «تاڭ تەلەارناسى» رەداكتسياسىندا  قاسىم امانجول ۋكراينا رەسپۋبليكاسىنا بارعان جۋرناليستىك ساپارى تۋراسىندا ءباسپاسوز كونفەرەنتسياسىن وتكىزدى. كونفەرەنتسياعا ۋكراينا كونسۋلى بوبوشكو سەرگىي ولەكساندروۆيچ دە قاتىستى.  اتالمىش ارنانىڭ جاڭا باسشىلىعى -  جۇلدىز كادەن، ارمانجان بايتاسوۆ سياقتى ازاماتتار «تاڭ-دى» قوعامدىق، ەلدىك ماسەلەلەردى كوتەرەتىن تەلەارناعا اينالدىرۋدى ماقسات ەتىپ وتىر. الدىعا جاڭا مىندەتتەر قويعان تەلەارناعا قاسىم امانجول  ارنايى شاقىرىلعان. وسىدان ون جىل بۇرىن «قازاقستان» ارناسىندا كورسەتىلگەن «شىننىڭ ءجۇزى» باعدارلاماسىمەن قالىڭ جۇرتقا جاقسى تانىس قاسىم امانجولدىڭ «تاڭ-عا» كەلگەندەگى العاشقى تالابى - ۋكرايناعا بارىپ، جۋرناليستىك زەرتتەۋ جۇرگىزۋ بولىپتى. «تاڭ» ارناسىنىڭ قولداۋىمەن ۋكرايناعا اتتانعان ءتۇسىرۋ توبى اتو(انتيتەررورلىق وپەراتسيا) ايماعىندا، العى شەپتە بولعان. سەپەراتيستەردەن ازات ەتىلگەن ايماقتاردى ارالاپ، قىرىم تاتارلارىنىڭ جاعدايىن كورگەن جانە قىرىم قايراتكەرلەرىمەن كەزدەسكەن.

قاسىم امانجول ءوزىنىڭ ۋكرايناعا بارۋعا تاۋەكەل ەتۋىن - ءبىر جىلعا جۋىق ۋاقىتتان بەرى دۇربەلەڭ بولىپ جاتقان ۋكرايناداعى جاعدايدى مەملەكەتتىك ارنالارىمىزدىڭ حالىققا ءوز تىلشىلەرى ارقىلى ۇسىنا الماۋىمەن تۇسىندىرەدى. «كيەۆتەگى «مايدان» ساتتەرىنەن، قىرىمداعى رەفەرەندۋم مەن ۋكرايناداعى سوڭعى پرەزيدەنت سايلاۋىنان، سونداي-اق سەپەراتيستەردەن زارداپ كورگەن ۋكراينا حالقىنىڭ تۇرمىسىنان ءتىلشى قوسىندارى، قىمبات تەحنيكالارى بولا تۇرا، قازاقستاننىڭ مەملەكەتتىك ارنالارى ارنايى حابارلار جاساپ حالىققا ۇسىنا المادى»، - دەيدى قاسىم امانجول. ول مەملەكەتتىك ارنالاردىڭ باسشىلىعىن  بۇعا دەيىن بىرنەشە رەت ۋكراينا تۋرالى ارنايى جوبالار، رەپورتاجدار جاساۋعا شاقىرعان. «الايدا حالىقتى تاۋەلسىز دەرەكتەرمەن اقپاراتتاندىرا الماۋ ءبارىمىزدىڭ دە جۋرناليستىك قىزمەتىمىزگە سىن»، - دەيدى ۋكرايناعا جولى تۇسكەن جۋرناليست.  

قاسىم امانجولدىڭ ءوز سوزىمەن ايتقاندا «دايىن اسقا تىك قاسىق بولىپ ۇيرەنگەن» قازاقستاندىق جۋرناليستەردەن ول العاشقى بولىپ، ۋكراينا حالقىن قازاق ءجۋرناليسىنىڭ كوزىمەن كورىپ قايتتى. قاسىم امانجول ءار ءبىر ۋكرايندىقتىڭ بەلسەندى پاتريوت ەكەنىن، ءتىپتى وندا پاتريوتتىق كورىنىستەر سانگە اينالعانىن ايتادى، ۋكرايناداعى ءار ءبىر ازاماتتىڭ وتانعا دەگەن ماحابباتىن جوعارى باعالايدى. ءبىر ايتا كەتەرلىگى، ۋكراينا قايراتكەرلەرى قىرىمنىڭ ۋكراينادان ءبولىنىپ كەتۋىنە وزدەرىن ايىپتى سانايدى جانە قورعاپ قالا الماعانى ءۇشىن ونداعى تاتار حالقىنىڭ الدىندا وزدەرىن ۇياتتى سەزىنەدى ەكەن. دەگەنمەن، ۋكراينا حالقى قازاقستان بيلىگىنىڭ ساياسي جاعدايعا «تۇسىنىستىك» تانىتا سالعانىنا وكپەلى، وتانىنىڭ تاۋەلسىزدىگىنە قول سۇعىلىپ، جازىقسىز قانى توگىلگەن، بەيبىت زاماندا بوسىپ كەتۋگە ءماجبۇر بولعان حالىقتىڭ جاعدايى كىمدى دە بولسا بەيجاي قالدىرماسى انىق ەدى.

ۋكرايناداعى جاعداي – قازاق ءجۋرناليسىنىڭ كوزىمەن. تاۋەلسىز اقپارات، تىڭ دەرەك. ۋكرايناداعى جاعداي تۋرلى جاسالعان «مايدان (مايداننان مايدانعا دەيىن (1-ءبولىم), قىرىم (2-ءبولىم))» اتتى رەپورتاجدىق فيلم 1-2 قازان كۇندەرى "تاڭ" تەلەارناسىنان كورسەتىلەدى. اۆتورى - قاسىم امانجول. قاپى قالماڭىزدار، كورىڭىزدەر.

نۇرعالي نۇرتاي

Abai.kz