قازاقستان پرەزيدەنتىنىڭ پىكىرىنشە، بۇگىنگى كۇنى ازىق-تۇلىك – ەڭ تۇراقتى ۆاليۋتا. اگرارلىق سالا ادامزاتتىڭ بۇگىنى مەن ەرتەڭىنىڭ باستى قۇندىلىعى بولىپ تابىلادى. بۇل تۋرالى مەملەكەت باسشىسى نۇرسۇلتان نازارباەۆ  سوچيدە XII رەسەي مەن قازاقستاننىڭ ايماقارالىق ىنتىماقتاستىعى فورۋمىنىڭ جالپى وتىرىسىندا ءمالىم ەتتى، - دەپ حابارلايدى Bnews.kz.

«نەگىزگى ساۋدا-ساتتىق ءبىزدىڭ وڭىرلەر ارقىلى وتەدى جانە بۇل ءداستۇردى جالعاستىرۋىمىز كەرەك. اسىرەسە قازىر، ءبارىمىز الەمدىك داعدارىستى سەزىپ وتىرعان ساتتە. بۇگىن ءبىز ءسوز ەتكەن ازىق-تۇلىك – بۇگىننىڭ ەڭ تۇراقتى ۆاليۋتاسى. ازىق-تۇلىك ارقاشان بار. قوس مەملەكەت تە – اگرووندىرىستىك ەل، سونىڭ ارقاسىندا ءبىزدىڭ مۇمكىندىگىمىز الدەقايدا جوعارى. ادامزاتتىڭ بۇگىنى مەن ەرتەڭىنىڭ نەگىزگى قۇندىلىعى – اگرارلىق كەشەن»، – دەدى مەملەكەت باسشىسى.

پرەزيدەنتتىڭ ايتۋىنشا، بۇۇ مالىمەتتەرىنە سايكەس، جەر شارىنداعى ادامداردىڭ سانى 2050 جىلعا قاراي 9 ميللياردتان اسىپ جىعىلادى، سوندىقتان عالامدىق كۇن تارتىبىندەگى وزەكتى ماسەلەلەردىڭ ءبىرى – وسى ميللياردتى اسىراپ-ساقتاۋ.

وسى ورايدا نۇرسۇلتان نازارباەۆ قازاقستان مەن رەسەي باعا جەتپەس بايلىققا، الىپ اۋىلشارۋاشىلىق القاپتارىنا جانە اۋىلشارۋاشىلىق تاجىريبەگە يە ەكەنىن الىپ قوستى.

«ەكى مەملەكەتتىڭ اۋىلشارۋاشىلىق جەرلەرىن قوسا ەسەپتەگەندە – 435 ملن گا تەڭ. بۇل الەمدىك رەسۋرستىڭ 10%-ىنان استام. تابيعي كليماتتىق اۋماقتاردىڭ ارالۋاندىعى، قۇنارلى توپىراقتىڭ ارقاسىندا بىرقاتار اگرارلىق سالا بويىنشا باسەكەگە قابىلەتتىمىز. استىق، كۇرىش، مايلى، جەم-ءشوپ داقىلدارى، ەت-ءسۇت ونىمدەرى ءوندىرىسى بويىنشا ءبىزدىڭ مەملەكەتتەرىمىزدىڭ اگروونەركاسىپتىك كەشەنىنىڭ ەكسپورتتىق الەۋەتى زور»، – دەپ قوستى ەلباسى.

اباi.kz