دەپۋتات روزاقۇل حالمۇرادوۆ 2017 جىلى وتەتىن ەكسپو حالىقارالىق كورمەسىنە 2018 جىلى نەلىكتەن تاعى دا 35 ملرد تەڭگە ءبولىنىپ وتىرعانىن تۇسىنبەي الەك، - دەپ حابارلايدى Nur.kz باسىلىمى.

بۇل تۋرالى بۇگىن ول ماجىلىستە «2016-2018 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تانىستىرعان قارجى ءمينيسترى باقىت سۇلتانوۆتان سۇرادى.

باقىت سۇلتانوۆ بايانداماسىندا 2016-2018 جىلدارعا ارنالعان جاڭا بيۋدجەتتە ەكسپو-2017 حالىقارالىق كورمەسىن وتكىزۋگە 306 ملرد تەڭگە قاراستىرىلعانىن جەتكىزدى. بۇعان دەپۋتات روزاقۇل حالمۇرادوۆ ءوز نارازىلىعىن ءبىلدىردى.

“ەكسپو-2017 حالىقارالىق كورمەسىنە 2016 جىلعا 173 ملرد، 2017 جىلعا 98 ملرد تەڭگە قارجى بولىنگەن. كورمە 2017 جىلى اياقتالادى. كورمەنىڭ بارلىق قۇرىلىستارىن 2016 جىلدىڭ سوڭىنا دەيىن ءبىتىرۋ كەرەك دەگەن ەلباسىنىڭ تاپسىرماسى بار. نە سەبەپتەن وسى كورمەگە 2018 جىلى 35 ملرد تەڭگە قارجى قاراستىردىق؟ ۇلتتىق كومپانيادان ۇرلانعان قارجىنىڭ ورنىن تولتىرۋ ءۇشىن سالىپ وتىرمىز با؟ كورمە بىتسە، ءبىز نەگە تاعى قارجى سالامىز؟ 3,5 ملرد بولسا تۇسىنەر ەدىك، اڭگىمە 35 ملرد جونىندە بولىپ وتىر”، – دەدى ول.

دەپۋتاتتىڭ سۇراعىنا جاۋاپ بەرە وتىرا، قارجى ءمينيسترى باقىت سۇلتانوۆ ەكسپو-2017 كورمەسىنىڭ ءىرى جوبا ەكەنىن العا تارتتى.

“بۇل ءبىر كۇندە، ءبىر جىلدا جاسالاتىن جوبا ەمەس. كەلەسى جىلعا قاراستىرىلعان 173 ملرد تەڭگە نەگىزگى قۇرىلىستاردى اياقتاۋعا كوزدەلىپ وتىر. 2017-2018 جىلدارى قاراجات ۇيىمداستىرۋعا بولىنەدى. ويتكەنى، قۇرىلىسپەن جۇمىس بىتپەيدى عوي، ودان ارعى جۇمىستارى دا بار. قۇرىلىس بىتكەننەن كەيىن، مەملەكەتتەرگە پاۆيلوندار دايىنداۋ كەرەك، وسى سەكىلدى جۇمىستارعا كوزدەلگەن. تەرەڭىرەك باعىتتاردى ايتىپ بەرۋ كەرەك بولسا، ۇلتتىق ەكونوميكا مينيسترلىگىنىڭ وكىلدەرى وتىر، جۇمىس توبىنىڭ وتىرىسىندا دا تولىعىراق ايتىپ بەرە الامىز”، – دەدى مينيستر.

اباي-اقپارات