«بەلگىلى زاڭگەر جانگەلدى سۇلەيمەن تولقۇجاتقا رۋدىڭ اتىن جازۋدى ۇسىندى، - دەپ حابارلايدى Kazpravda.kz سايتى بەلسەندىنىڭ Facebook الەۋمەتتىك جەلىسىندەگى پاراقشاسىنا سىلتەمە جاساپ.

 ء«بىز ءبارىمىز ءوز رۋىمىزدى جوعارى باعالاپ، ونى ماقتانىش تۇتامىز. سوندىقتان دا اركىم ءوز قالاۋىمەن قۇجاتىنا رۋىنىڭ اتىن جازدىرۋىنا بولادى. مەنىڭشە، مۇنداي قۇجات اركىمگە قىزىقتى كورىنەرى ءسوزسىز»، - دەيدى جانگەلدى سۇلەيمەن.

سونداي-اق، زاڭگەر: «مەنىڭ بۇل ۇسىنىسىمدى جۇزەگە اسىرۋعا مۇمكىندىك از شىعار. سوندا دا رۋلاردىڭ اتىن قۇجاتقا ەنگىزۋدىڭ زاڭدىق تەتىكتەرىن قاراستىرۋىمىز كەرەك»، - دەپ تۇيەدى ءوز ويىن.  

جانگەلدى سۇلەيمەن رۋلاردىڭ كوپ بولۋىن حالقىمىزدىڭ بايلىعى دەپ سانايدى. سوندىقتان دا وسى ەرەكشە جۇيەنى ساقتاپ قالۋ كەرەك ەكەنىن تىلگە تيەك ەتەدى. ونىڭ پىكىرىنشە، بۇل ماسەلەدە ەلىمىز اقش-قا ۇقسايدى-مىس. ويتكەنى، امەريكاندىقتاردىڭ ارقايسىسىنىڭ ءوز ۇلتى (ماسەلەن، يتاليان، فرانتسۋز، ەۆرەي، قازاق، ورىس، ت.ب) بار. قازاق مەملەكەتتىلىگى دە وسىدان 550 جىل بۇرىن ءحىۇ-ءحۇ عاسىرلاردا رۋلاردىڭ (؟) بىرلەسۋىنەن پايدا بولعان. (قاراڭىز: http://www.kazpravda.kz/rubric/obshchestvo/kazahstantsam-predlagaut-ukazivat-rodovuu-prinadlezhnost-v-pasportah/ )

قوش! بۇل اقپاراتقا «قازپراۆدا» نەگە ەلەڭ ەتتى؟ بەلگىلى زاڭگەر ۇلت پەن رۋدى نەگە شاتاستىرىپ، ءبىزدى اقش-پەن سالىستىرىپ وتىر؟ سوندا زاڭگەردىڭ ويىنشا نايمان، البان، قوڭىرات، اداي، بەرىش، ت.ب دەگەندەر جەكە ۇلت بولعانى عوي. بۇلاي ءبىر قازاقتى مىڭ ءبولۋدىڭ استارىندا نە جاتىر؟ «قازپراۆدا» مۇنى قانداي ماقساتتا جاريالاپ وتىر؟ تۇسىنىكسىز. قازاقتىڭ بىرلىگىنە سىنا قاققىسى كەلەتىندەر ۇلتىمىزدىڭ نامىسىنا تيۋ ءۇشىن رۋشىلدىقتى قوزدىرىپ، قازاقتىڭ ءالسىز جەرىنە جارماسقىسى كەلەتىنى بار ەدى. بۇل دا سونىڭ ءبىر مىسالى بولماعاي...  

ءشارىپحان قايسار

 Abai.kz