وقۋشىنىڭ ۇيقىسى "ۇرلانبايتىن" بولدى
كەلەسى ايدان باستاپ، استانا قالاسىنداعى مەملەكەتتىك قىزمەتكەرلەردىڭ جۇمىس ۋاقىتىنىڭ كەستەسىنە وزگەرتۋ ەنگىزىلەدى، - دەپ حابارلايدى Zakon.kz "استانا LRT". جشس-ءنىڭ توراعاسى تالعات اردانعا سىلتەمە جاساپ.
تالعات ارداننىڭ ايتۋىنشا، مۇنداي شەشىم ارقىلى استانا قالاسىنداعى جول كەپتەلىسىن ازايتۋعا بولادى-مىس. ەندى جۇمىسقا كىمدەردىڭ ەرتە، كىمدەردىڭ كەش كەلەتىنى انىقتالىپ جاتىر ەكەن.
استانا اكىمى ادىلبەك جاقسىبەكوۆتىڭ تاپسىرماسىمەن 14 قىركۇيەكتەن باستاپ ەلوردامىزدىڭ وقۋشىلارىنىڭ دا ساباق كەستەسى وزگەرگەن بولاتىن. وعان قاتىستى ءبىز "شەنەۋنىكتەر وقۋشىلاردىڭ ۇيقىسىن "ۇرلاي" باستادى" ( http://abai.kz/post/view?id=4624) دەگەن ماتەريال جاريالاعانبىز. سول ماتەريالدا: "استاناداعى كەپتەلىستى شەشۋ سوندايلىق ماڭىزدى بولسا، استانانىڭ اكىم-قارالارى، اتقامىنەرلەرى، شەنەۋنىكتەرى جۇمىستارىن 7-40 كەتكەندە باستاسىن" دەگەن ەدىك.
الەۋمەتتىك جەلىلەردە تالقىلانىپ، ءبىزدىڭ پورتال ءۇن قوسقان وسى ماسەلە اقىرى وڭ شەشىمىن تاپتى. ەندى مەكتەپتە ساباق 08:00-دەن بۇرىن باستالسا، ديرەكتورلار جاۋاپقا تارتىلاتىن بولدى. قاداعالاۋ ورگاندارىنىڭ وكىلدەرى وسىنداي مالىمدەمە جاساپ وتىر.
استانا قالاسىنىڭ اكىمى ادىلبەك جاقسىبەكوۆ تاياۋدا ەلورداداعى 17 ءبىلىم وشاعىنىڭ جەتەكشىلەرى تاڭعى ساباقتى 07:40-تا باستاۋدى ۇسىنعان ەدى. بىراق بۇل ۇسىنىس ءبىلىم بەرۋ ۇيىمدارىنىڭ بىرىڭعاي تالاپتارىنا ساي كەلمەيتىن بولىپ شىقتى. وسىعان بايلانىستى پروكۋرورلار جەرگىلىكتى اكىمدىكتەرگە ورتاق مىندەت ءمىنسىز اتقارىلۋ قاجەتتىگىن ەسكەرتتى. تالاپ ورىندالماعان جاعدايدا، مەكتەپ ديرەكتورلارىنا ايىپپۇل سالىنۋى مۇمكىن.
شولپان كوشەنوۆا، استانا قالاسى پروكۋرورىنىڭ اعا كومەكشىسى:
– قر ۇكىمەتى بەكىتكەن قاۋلىعا سايكەس ساباقتار 08:00-دەن بۇرىن باستالماۋى كەرەك. ەگەر بۇل تالاپ ورىندالماسا، ليتسەنزيا جارامدىلىعى توقتاتىلادى. وعان قوسا مەكتەپ ديرەكتورلارىنا 40 مىڭ تەڭگەدەي ايىپپۇل سالىنادى. بۇل اكىمشىلىك قۇقىقبۇزۋشىلىق بولىپ ەسەپتەلەدى.
ءشارىپحان قايسار
Abai.kz
