استانانىڭ شەنەۋنىكتەرى مەكتەپ وقۋشىلارىنىڭ ۇيقىسىن «ۇرلاي» باستادى. ۇيىقتاپ جاتقان بەسىكتەگى بالاسىن تەربەيتىن قازاق ەدىك. ەندى شەنەۋنىكتەر ولاردىڭ ۇيقىسىن «ۇرلاۋ» ارقىلى استانا قالاسىنىڭ جول-كولىك قوزعالىسىن رەتتەمەك ەكەن...

14 قىركۇيەكتەن باستاپ ەلوردامىزدىڭ بۇلدىرشىندەرى ساعات تاڭعى 7-40-تا مەكتەپتە وتىرۋلارى ءتيىس. قالالىق ءبىلىم باسقارماسىنىڭ مالىمەتىنشە، مۇنداي تاپسىرمانى استانا اكىمى ادىلبەك جاقسىبەكوۆ بەرگەن.

«قالاداعى 17 مەكتەپتە ساباق بۇرىنعىدان ەرتە، 7:40-تا باستالاتىن بولدى. بۇل اكىمنىڭ تاپسىرماسى. قالاداعى جول-كولىك قوزعالىسىن جەڭىلدەتۋ ءۇشىن وسىنداي قادامعا بارىپ وتىرمىز. ويتكەنى، قالادا ترانسپورت وتە كوپ»، – دەپ مالىمدەگەن قالالىق ءبىلىم باسقارماسى.

سوندا دەيمىز-اۋ، قالاداعى كەپتەلىستى وسىنداي جولمەن شەشۋ قاجەت پە؟ مەملەكەت بيۋدجەتىن ۇنەمدەيمىز دەپ، وقۋشىلاردىڭ تەگىن تاماعىن اۋزىنان جىرىپ العانىمىز ازداي ەندى ولاردىڭ باقانداي 50 مينۋتىن «ۇرلاپ» جاتىرمىز. سوندا بەسىكتەن بەلى شىقپاعان بالالارىمىزدىڭ قانداي كىناسى بار ەدى؟ ەگەر دە، استاناداعى كەپتەلىستى شەشۋ سوندايلىق ماڭىزدى بولسا، استانانىڭ اكىم-قارالارى، اتقامىنەرلەرى، شەنەۋنىكتەرى جۇمىستارىن 7-40 كەتكەندە باستاسىن. وقۋشىلاردىڭ ارقايسىسى ءدال سولار سەكىلدى «دجيپكە» ءمىنىپ، قالانىڭ جولدارىندا جۇيىتكىپ جۇرگەن جوق. ياكي، شەنەۋنىكتەر قوعامدىق كولىكپەن ءجۇرسىن. سوندا كەپتەلىس بولمايدى.

وسىنداي كۇيىنگەن كەزدە مۇقاعالي ماقاتاەۆتىڭ ولەڭى ەسكە تۇسەدى. مۇقاڭشا: «كىم بولساڭ، ول بول، رۇقسات جوق، ۇيىقتاپ جاتقان ۇلىمدى تەربەتۋگە» دەپ ايتاتىن ءبىر ازاماتتىڭ تابىلماي تۇرعانى-اي!

ءشارىپحان قايسار

Abai.kz