الماتىدا جاس كەلىنشەك 5-ءشى قاباتتان ەكى بالاسىن لاقتىرىپ، ارتىنشا ءوزى دە سەكىرىپ كەتكەن. جانتۇرشىگەرلىك وقيعا تاڭعى مەزەتتە، كوپشىلىكتىڭ كوز الدىندا بولعان، - دەپ حابارلايدى كتك ارناسى. سونداي-اق، ارنا تىلشىلەرىنىڭ ايتۋىنشا بۇل كەلىنشەكتىڭ كۇيەۋى دە، ءوزى دە ءدىن ۇستانىپ، بەس ۋاقىت ناماز وقىعان كورىنەدى.

8 جاستاعى جەتكىنشەك سول جەردە جان تاپسىرسا، كەلىنشەك پەن 2 جاستاعى قىزى شۇعىل اۋرۋحاناعا جەتكىزىلىپتى. دارىگەرلەر ەكەۋىنىڭ دە جاعدايىن اۋىر دەپ وتىر. ايەلدىڭ مۇنداي قادامعا بارۋىنىڭ سەبەبى بەلگىسىز. تەك ازىرگە انىعى – ونىڭ جاسى 33-تە، ەسىمى – جادىرا ەكەن. وتباسىمەن قالادا پاتەر جالداپ تۇرىپتى. وقيعا بولعان كەزدە وتاعاسى جۇمىسقا كەتكەن دەسەدى.

ەل جاعاسىن ۇستاتقان بۇل وقيعا ساتباەۆ پەن تۇرعىت وزال كوشەلەرىنىڭ قيىلىسىنداعى كوپقاباتتى ۇيلەردىڭ بىرىندە بولعان. تەرەزە ءتۇبىن جاعالاي كوكونىس ساتىپ تۇرعان ساتۋشىلاردىڭ كوز الدىندا. 5-ءشى قاباتتاعى تەرەزەدەن كەلىنشەك الدىمەن 8 جاستاعى، كەيىن 2 جاستاعى قىزىن كۇشتەپ شىعارىپ، لاقتىرىپ جىبەرىپتى.  

- ءبىز ويلادىق انا بالا تەرەزە الدىندا وتىرىپ قۇلاپ كەتتى مە دەپ. قاراساق تەرەزە اشىق، ەكىنشى قىز، قاسىندا ماماسى. انا قىزدى الدى دا ماماسى لاقتىرىپ جىبەردى. ءبىز ايقايلاپ ۇلگەرمەدىك. جاڭاعى قىز ءومىر سۇرگىسى كەلدى. تەرەزەدەن ۇستاپ، جىبەرمەي، جىلاپ ايقايلادى. اناۋ پىشاقپەن ءبىر جەرىنە ءتيىستى مە، شەشەسى الدى دا، ارتىنا يتەرىپ جىبەردى، - دەيدى كۋاگەرلەر.    

وسىدان كەيىن ايەلدىڭ ءوزى دە تەرەزەدەن سەكىرىپ كەتكەن. ءسويتىپ، ۇشەۋى دە ءبىرىنشى قاباتتاعى دۇكەننىڭ شاتىرىنا كەلىپ قۇلاپتى. تەك 103 قىزمەتى جەتكەنشە بالانىڭ ۇلكەنى سول جەردە جان تاپسىرسا، كىشىسى مەن كەلىنشەك امان قالعان. بىراق جاراقاتتارى تىم اۋىر. قازىر ەكەۋى دە جانساقتاۋ بولىمىندە جاتىر. وقيعاعا قاتىستى قىلمىستىق ءىس تە قوزعالىپ وتىر.

سالتانات ازىربەك، الماتى قالاسى ءىىد رەسمي وكىلى:

- الدىن-الا بولجام جوق. ويتكەنى تەرگەۋ ەندى عانا باستالىپ وتىر. وسى ىسكە قاتىستى كۋاگەرلەردە سۇراق-جاۋاپ الۋ پروتسەسى جاسالادى. كۇيەۋى دە بار، تولىق وتباسى ەكەن.

بىراق قايعىلى وقيعا ورىن العان كەزدە وتاعاسى جۇمىسقا شىعىپ كەتىپتى. ول الماتىداعى جاڭادان اشىلعان مەشىتتە قىزمەتكەر ەكەن دەگەن اقپارات بار. كەلىنشەگى دە 5 ۋاقىت نامازعا جىعىلعان ادام بولىپتى. ەسىمى  – جادىرا، 33 جاستا. ال قىزدارىنىڭ اتتارى – ايشا جانە اديا. وتباسى الماتىدا پاتەر جالداپ تۇرىپتى.

كتك ارناسى