قازاق عارىشكەرى ايدىن ايىمبەتوۆ ەرتەڭ (2 قىركۇيەك) حالىقارالىق كوسموس ستانساسىنا اتتانادى. ونىڭ اعاسى جاقان بارىمبەكوۆتىڭ ايتۋىنشا، ايدىن عارىشقا ۇشۋدى 12 جىل بويى ارمانداپ كەلگەن ەكەن. حالىقارالىق عارىش ستانساسىنا قۇرامىندا قازاقستاندىق ايدىن ايىمبەتوۆ، رەسەيلىك سەرگەي ۆولكوۆ جانە دانيالىق اندرەاس موگەنسەن بار.

«وسىدان ەكى اي بۇرىن ول ەكيپاجعا ۇمىتكەر رەتىندە قابىلداعاندا شەكسىز قۋانىشقا بولەنگەن ەدىك. ايدىننىڭ دا قۋانىشىن ايتىپ جەتكىزۋ قيىن. ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ ۇجىمى بۇل حاباردى ەستىگەندە ورىندارىنان تۇرىپ، ۇزاق قول شاپالاقتادى. سەبەبى، ا.ايىمبەتوۆ ءبىزدىڭ ۋنيۆەرسيتەتتىڭ «فيزيكا جانە ينفورماتيكا» ماماندىعى بويىنشا سىرتتاي ءبولىمىن وقىپ شىققان بولاتىن»، – دەيدى ج.بارىمبەكوۆ.

سونداي-اق جەتىسۋ ۋنيۆەرسيتەتىنىڭ پروفەسسورى ج.بارىمبەكوۆ ايدىن تاۋەلسىز قازاقستان تاريحىنداعى العاشقى عارىشكەر ەكەنىن دە اتاپ ءوتتى.

ونىڭ ايتۋىنشا، عارىش كەڭىستىگىن باعىندىرعان تۇڭعىش قازاق توقتار اۋباكىروۆ ول كەزدە كسرو ازاماتى بولسا، كەڭەس وداعى كۇيرەگەننەن كەيىن 1994, 1998 جانە 2001 جىلدارى عارىشتا بولعان تالعات مۇساباەۆ رەسەي ازاماتتىعىندا بولعان. قازعارىشتىڭ باسشىسى ەل ازاماتتىعىن تەك 2007 جىلى العان كورىنەدى.

«ايدىن التى جىل بويى ماسكەۋ تۇبىندە «جۇلدىزدى قالاشىقتا» ءبىلىم الدى. 2009 جىلى ۇشۋى ءتيىس ەدى، الايدا ەكونوميكالىق داعدارىسقا بايلانىستى كەيىنگى قالدىرىلدى. ول بۇل كۇندى 12 جىل كۇتتى. ايدىن وزىنە جۇكتەلگەن مىندەتتى ابىرويمەن ورىندايدى دەپ سەنەمىن»، – دەيدى ج.بارىمبەكوۆ.

«مەن اۋلەتىمىزدىڭ ۇلكەنىمىن، ونىڭ اكەسى ءۇش جىل بۇرىن كوز جۇمدى. اكەسىنىڭ بۇل كۇندى كورمەي كەتكەنى وتە وكىنىشتى»، – دەپ تولىقتىردى عارىشكەردىڭ تۋىسى.

Abai.kz