بەيبىت ءومىر ءسۇرىپ جاتقان ادام ءۇشىن  “تۇننەن تۇگەل شىعايىق” دەگەن تىركەستىڭ اسا ءمانى بولماۋى مۇمكىن. ال  ۋكراينانىڭ  شىعىسىنداعى ميلليونداعان تۇرعىن وسى تىلەكپەن كوز شىرىمىن الادى. دونباسس وڭىرىندەگى دۇربەلەڭ ءالى دە سايابىر تاپپاي تۇرعان كەز.  ۋكراينا قاۋىپسىزدىك كوميتەتىنىڭ سوڭعى ستاتيستيكالىق مالىمەتى بويىنشا ىرگەدەگى ءىرى كورشىسى - ورىس سولداتتارىمەن سوعىسۋعا ۋكراينانىڭ ەكى ءجۇز مىڭنان استام اسكەرى جۇمىلدىرىلعان ەكەن. بۇگىنگى كۇنگە دەيىن رەسمي مالىمەت ۋكراينا تاراپىنان ەكى مىڭعا جۋىق ساربازدىڭ جەر جاستانعانىن ايتادى. ەكى ەل اراسىندا اقپاراتتىق مايدان دا قىزىپ تۇر.  ال 25 تامىز - ۋكراينانىڭ تاۋەلسىزدىك كۇنى قارساڭىندا "ەرەكشە" ەسكەرتكىش ورناتىلدى.

زاپوروجە قالاسىنىڭ باس الاڭىنا جايعاسقان تاس ءمۇسىن  - «ورىس الەمى» جانە سول «الەمدى» قورعايمىن دەپ الەككە تۇسكەن «اپەندىگە» ارنالعان. قالانىڭ قاراپايىم تۇرعىنى، يدەيا اۆتورى ماكسيم دروزدەنكو: «ەسكەرتكىش ارقىلى ەسى اۋىسقان باسشىنىڭ بۇگىنگى  «بولمىسىن» كورسەتكىم كەلدى»،- دەگەندى ايتادى. بۇل ءبىر مىسال عانا. كۇننەن كۇنگە كيەۆ قانا ەمەس، قاراپايىم تۇرعىنداردىڭ دا باۋىرلاس ەلگە قاباعى قاتۋلانىپ كەلەدى.  ۋكراينا كوشەلەرىنەن “يت ۇرەدى، كەرۋەن كوشەدى”،-دەيتىن ۇران سوزدەردى ءجيى كورۋگە بولادى.

ال كيەۆ قالاسىنىڭ باس الاڭىنان “سول كىسىنىڭ” سۇلباسى بەينەلەنگەن دارەتحانا قاعازىن دا ساتىپ الۋ ەش قيىن ەمەس. وسىلايشا ءاربىر ۋكرايندىق ءوزىنىڭ ىشكى قارسىلىعىن ءبىلدىرىپ جاتىر.

نازگۇل نۇرلانوۆا، «قامشى» پورتالىنىڭ كيەۆتەگى ارنايى ءتىلشىسى