يندۋستريالاندىرۋ باعدارلاماسى اياسىندا تۇركىستان مەن كەنتاۋ قالالارىندا جاڭا 15 نىسان ىسكە قوسىلادى. بۇل جايىندا وقو اكىمى بەيبىت اتامقۇلوۆ اتالعان ايماقتارداعى يندۋستريالدى ايماقتارعا جاساعان ساپارى بارىسىندا ايتتى.

ءوڭىر باسشىسى تۇركىستان قالاسىنداعى يندۋستريالدى ايماققا ات باسىن بۇرىپ، اتقارىلىپ جاتقان جۇمىستارمەن تانىستى. بۇعان دەيىن بىرنەشە رەت سىنعا ىلىككەن نىسان جۇمىسىن تەكسەرگەن بەيبىت باكىرۇلى وعان وڭ باعا بەرىپ وتىر. جالپى اۋماعى 40 گەكتاردى قۇرايتىن ايماقتا بارلىعى 8 كاسىپورىن بوي كوتەرەدى. جىل سوڭىنا دەيىن ولاردىڭ ەكەۋىنىڭ قۇىرىلىسى اياقتالسا، تاعى ۇشەۋىنىڭ ىرگەتاسى قالانادى. زاۋىتتاردىڭ بارلىعى دەرلىك قۇرىلىس ماتەريالدارىن شىعارۋمەن اينالىسادى. اتالعان كاسىپورىندار 335 جۋىق ادامدى جۇمىسپەن قامتيدى.

وبلىس اكىمى قۇرىلىس جۇمىستارىنىڭ مەزگىلىنەن اۋىتقىماي، ۋاقىتىلى اياقتالۋى ءۇشىن جەرگىلىكتى بيلىك وكىلدەرىنە ناقتى تاپسىرمالار بەردى.

مۇنان كەيىن ب.باكىرۇلى كەنتاۋداعى يندۋستريالدى ايماقتا بولىپ، اتقارىلىپ جاتقان جۇمىستارمەن تانىستى. جالپى اۋماعى 25 گەكتاردى قۇرايتىن نىساندا 7 جوبا جۇزەگە اسىرىلادى. ولاردىڭ ۇشەۋى قالاداعى ترانسفارماتور زاۋىتىنا قاجەتتى قوسالقى بولشەكتەردى شىعارۋمەن اينالىسپاق. جوبالاردى ىسكە اسىرۋ ءۇشىن بارلىعى 2 ملرد 127 ملن تەڭگە ينۆەستيتسيا تارتىلادى جانە 165 جاڭا جۇمىس ورنى اشىلماق. سونداي-اق، يندۋستريالدى ايماق قاجەتتى ينفراقۇرىلىمنىڭ بارلىعىمەن قامتىلادى.

ساپار سوڭىندا ءوڭىر باسشىسى اتالعان يندۋستريالدى ايماقتاردى جاڭا كاسىپورىندارمەن تولىقتىرۋ ءۇشىن تۇركىستان مەن كەنتاۋ اكىمدەرىنە ينۆەستورلار تارتۋدى تاپسىردى.

Abai.kz