مەملەكەت باسشىسى نۇرسۇلتان نازارباەۆ ۇلتتىق بانك توراعاسى قايرات كەلىمبەتوۆتى قابىلدادى، دەپ حابارلايدى today.kz اقوردانىڭ ءباسپاسوز قىزمەتىنە سىلتەمە جاساي وتىرىپ.

كەزدەسۋ بارىسىندا ق.كەلىمبەتوۆ ەلدىڭ قارجى سەكتورى مەن بانك جۇيەسىنىڭ احۋالى تۋرالى باياندادى. نۇرسۇلتان نازارباەۆ كۇردەلى ەكونوميكالىق جاعدايعا بايلانىستى كوپ نارسە ۇلتتىق بانكتىڭ جۇمىسىنا، سونداي-اق مەملەكەتتىڭ اقشا-نەسيە ساياساتىنا تاۋەلدى ەكەنىن اتاپ ءوتتى.

- بيۋدجەتتىڭ جاعدايىنىڭ ناشارلاۋىنا، بارلىق ەكسپورتتىق تاۋارلارىمىزعا باعانىڭ تومەندەۋىنە بايلانىستى ۇلتتىق بانكتىڭ جۇمىسىن جوعارى بىلىكتىلىكپەن جۇرگىزۋى اسا ماڭىزدى، - دەپ اتاپ ءوتتى قازاقستان پرەزيدەنتى.

ۇلتتىق بانك توراعاسى بيىلعى قاڭتار مەن ماۋسىم ارالىعى كەزەڭىندە ينفلياتسيا 1,4 پايىزعا تەڭ بولعانىن، بۇل رەتتە جىلدىق ينفلياتسيا 3,9 پايىزدى قۇراعانىن ايتتى.

- بۇل وسى ۋاقىتقا دەيىنگى ەڭ تومەن كورسەتكىش، ياعني ءبىز ينفلياتسيانى 3-4 پايىز دەڭگەيىندە ساقتاۋ جونىندەگى تاپسىرمانى ورىندادىق. بۇل ورايدا، ۇلتتىق بانكتىڭ جيىنتىق حالىقارالىق رەزەرۆى 29 ميلليارد دوللار بولدى. سالىمدار ءبىرىنشى جارتىجىلدىقتا 2,3 پايىزعا ۇلعايدى. سونىمەن قاتار، تولەم مەرزىمى 90 كۇننەن اسىپ كەتكەن قارىزدار ۇلەسىن ازايتۋ ماسەلەسى شەشىلدى، بۇرىن ونىڭ كولەمى 33 پايىزعا جەتكەن بولسا، قازىرگى ۋاقىتتا ول 9,98 پايىزعا دەيىن تومەندەدى، - دەدى ق.كەلىمبەتوۆ. مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرما بەرگەن.

اباي-اقپارات